ရခိုင်တွင် ရေကြီးနစ်မြုပ်မှုကြောင့် ပြည်သူ ၆ ဦး သေဆုံး၊ ထိခိုက်ပျက်စီးမှုများ များပြားသည့်အတွက် အရေးပေါ်အကူအညီများ လိုအပ်နေ

ရခိုင်တွင် ရေကြီးနစ်မြုပ်မှုကြောင့် ပြည်သူ ၆ ဦး သေဆုံး၊ ထိခိုက်ပျက်စီးမှုများ များပြားသည့်အတွက် အရေးပေါ်အကူအညီများ လိုအပ်နေ

ရန်ကုန်၊ ဩဂုတ် ၁၅

ရခိုင်ပြည်နယ်တွင် မိုးအဆက်မပြတ်ရွာသွန်းမှုကြောင့် မြစ်ရေ၊ ချောင်းရေ မြင့်တက်ပြီး ရေကြီးနစ်မြုပ်မှုကြောင့် ပြည်သူ ၆ ဦး သေဆုံးခဲ့ကြောင်း ရက္ခိုင့်အမျိုးသားအဖွဲ့ချုပ်မှ ဩဂုတ်လ ၁၄ ရက်နေ့တွင် ကြေညာချက် ထုတ်ပြန်ထားသည်။

ရခိုင်ပြည်၏ ထက်ဝက်နီးပါးရှိသည့် မြို့နယ်များရှိ ကျေးရွာများတွင် ရေကြီးခဲ့ရပြီး လက်ရှိအချိန်တွင် မြစ်ရေ ၊ ချောင်းရေ မြင့်တက်မှု တဖြည်းဖြည်းလျော့ကျလာခဲ့၍ ပုံမှန်အနေအထားသို့ ပြန်လည်ရောက်ရှိသွားပြီ ဖြစ်သော်လည်း ဘူးသီးတောင်၊ မောင်တော၊ မြောက်ဦး၊ ကျောက်တော်၊ မင်းပြား၊ မြေပုံ၊ တောင်ကုတ်၊ သံတွဲ စသည့် မြို့နယ်များရှိ ကျေးရွာများမှာ ရေလွှမ်းမိုးမှုဒဏ်ကို အများဆုံးခံခဲ့ရပြီး ကမ်းပါးများ ပြိုကျခြင်း၊ လူနေအိမ်၊ အဆောက်အအုံ၊ ဆေးရုံ၊ စာသင်ကျောင်း၊ သာသနိကအဆောက်အဉီများ၊ ရေနစ်မြှုပ်ခြင်း၊ ကျွဲ၊ နွား၊ ဝက်၊ ကြက်၊ ဆိတ် အစရှိသည့် တိရစ္ဆာန်များ ရေထဲမျောပါသွားခြင်း၊ သေဆုံးခြင်း၊ စပါးခင်းများ၊ ပုစွန်ကန်၊ ငါးကန်များ ပျက်စီးဆုံးရှုံးခြင်း၊ တာတမံ၊ ရေတွင်း ရေကန်များတွင် ဆားငံရေများ ဝင်ရောက်ခြင်း၊ ကာရီ (ဆည်)၊ တံတားအချို့ ပျက်စီးကာ လမ်းပန်းဆက်သွယ်ရေးပြတ်တောက်ခြင်းစသည့် အခက်အဲများ ကြုံတွေ့နေရကြောင်း သိရှိရသည်။

ထို့ပြင် ရခိုင်ဒေသအနေနှင့် ဆိုင်ကလုန်းမိုခါမုန်တိုင်းဒဏ်ကို မေလ ၁၄ ရက်နေ့တွင် အလူးအလဲခံစားရပြီး အမိုးအကာအောက်သို့ အလျင်အမြန်ရောက်ရှိရေး အဓိက အလေးထားဆောင်ရွက်နေစဉ် ယခုကဲ့သို့ ရေကြီးမှုကို ထပ်မံကြုံတွေ့လိုက်ရသည့်အတွက် ရခိုင်ဒေသရှိ ပြည်သူများအနေနှင့် အခြေခံစားသောက်ကုန်၊ ဆန်၊ ဆီ၊ ဆား၊ ဆေးဝါး၊ စားနပ်ရိက္ခာ၊ သောက်သုံးရေ စသည်တို့ အရေးပေါ်လိုအပ်ကြောင်းလည်း သိရှိရသည်။

ရခိုင်ဒေသရှိ ပြည်သူများအတွက် စိုက်ပျိုးရေး၊ မွေးမြူရေး၊ ကျန်းမာရေးလုပ်ငန်းများ၊ မျိုးစပါးများ၊ လယ်ယာသုံးနှင့် ရေလုပ်ငန်းသုံးပစ္စည်းများ၊ စားနပ်ရိက္ခာ၊ ဆေးဝါးများ အပါအဝင် အခြားအရေးပေါ်အကူအညီများကို လူသားချင်းစာနာထောက်ထားမှုဆိုင်ရာ အကူအညီများကို ဆောင်ရွက်ပေးနေသည့် ကမ္ဘာ့နိုင်ငံကြီးများ၊ အိမ်နီးချင်းနိုင်ငံများ၊ အာဆီယံနိုင်ငံများ၊ နိုင်ငံတကာအဖွဲ့အစည်းများမှ အမြန်ဆုံးကူညီပေးကြပါရန်လည်း ရက္ခိုင့်အမျိုးသားအဖွဲ့ချုပ်မှ အကူအညီတောင်းခံထားသည်။

ထို့ပြင် ရေကြီးခြင်း နောက်ဆက်တွဲအနေနှင့် ဝမ်းပျက်ဝမ်းလျှောရောဂါ၊ အဆုတ်ရောင်၊ အဆုတ်ပွရောဂါ၊ နှာစေးချောင်းဆိုး၊ အအေးမိခြင်းတို့ ဖြစ်ပွားနိုင်ပြီး လျှပ်စစ်ဓာတ်လိုက်ခြင်း၊ မြေပြိုခြင်း၊ မြေကျွံခြင်း၊ သစ်ပင်များလဲကျခြင်း၊ အဆောက်အအုံဟောင်းများ ပြိုကျခြင်း၊ မြွေ၊ ကင်း စသည့် အဆိပ်ရှိ သတ္တဝါများ ထွက်လာတတ်ခြင်း စသည့် အခြေအနေများဖြစ်နိုင်သည့်အတွက် ပြည်သူများ သတိထား သွားလာရန်နှင့် ဆေးကုသခံယူရန်နှင့် ကျန်းမာရေးစောင့်ရှောက်မှုများ လိုအပ်ပါက ဒေသအုပ်ချုပ်ရေးရုံးများမှ တစ်ဆင့် ဆက်သွယ်နိုင်ကြောင်းလည်း ရက္ခိုင့်အမျိုးသားအဖွဲ့ချုပ်၏ ထုတ်ပြန်ချက်တွင် ဖော်ပြထားသည်။

ရက္ခိုင့်အမျိုးသားအဖွဲ့ချုပ်/ ရက္ခိုင့်တပ်တော် (ULA/AA) အနေနှင့် ရေစတင် ကြီးလာချိန်တွင် အရေးတကြီးနှင့် အရေးပေါ်ချက်ချင်း ပြောင်းရွှေ့ပေးရန် လိုအပ်သည့် နေရာများမှ ပြည်သူများကို ဘေးလွတ်ရာနေရသို့ ချက်ချင်းပြောင်းရွှေ့ပေးနိုင်ခဲ့ကြောင်း၊ ကြိုတင်ကာကွယ်တားဆီးခြင်းကို အရပ်ဘက်အဖွဲ့အစည်းများ၊ လူမှုအဖွဲ့အစည်းများ၊ လူထုအခြေပြုအဖွဲ့အစည်းများ၊ ပရဟိတအသင်းအဖွဲ့များနှင့် လက်တွဲ၍ ထိရောက်စွာ ပြုလုပ်နိုင်သည့်အတွက် လူအသေအပျောက် အနည်းဆုံးဖြစ်ခဲ့ရခြင်းဖြစ်ကြောင်း၊ ပူပေါင်းဆောင်ရွက်သူများ အာလုံးကို ကျေးဇူးတင်ရှိကြောင်းလည်း ထုတ်ပြန်ချက်တွင် ပါရှိသည်။