မူဆယ်နှင့် ကွတ်ခိုင်တို့တွင် တိုက်ပွဲ ၄ နေရာဖြစ်ပွားပြီး ၁၀၅ မိုင်ရှိ စစ်တပ်ဂိတ်ကို TNLA က ဝင်ရောက် ပစ်ခတ်၊ စစ်တပ်ပစ်ခတ်သော လက်နက်ကြီး ထိမှန်ပြီး ပြည်သူ ၂ ဦးသေဆုံး
ရန်ကုန်၊ စက်တင်ဘာ ၁
ရှမ်းပြည်နယ်၊ မူဆယ်နှင့် ကွတ်ခိုင်တို့တွင် တိုက်ပွဲ ၄ နေရာ ဖြစ်ပွားပြီး ၁၀၅ မိုင်ရှိ စစ်တပ်ဂိတ်ကို TNLA က ဝင်ရောက် ပစ်ခတ်ခဲ့ကြောင်း PSLF/TNLA သတင်းနှင့်ပြန်ကြားရေးဌာနက ထုတ်ပြန်ထားသည်။
ယနေ့ စက်တင်ဘာလ ၁ ရက်နေ့ နံနက် ၄ နာရီ ၃၀ မိနစ်တွင် မူဆယ်မြို့နယ်၊ ၁၀၅ မိုင်ရှိ အကြမ်းဖက် စစ်တပ်ဂိတ်ကို တအာင်းတပ်မတော် – TNLA က ဝင်ရောက်တိုက်ခိုက်ခဲ့ကြောင်း၊ တိုက်ခိုက်မှု ဖြစ်ပွားပြီးနောက် အကြမ်းဖက် စစ်တပ် လက်အောက်ခံ တပ်မ ၉၉ ၊ ခမရ ၄၂၀ခနှင့် ပြည်သူ့စစ် ပူးပေါင်းတပ်များနှင့် TNLA တပ်ဖွဲ့တို့ ၄ နေရာ တိုက်ပွဲဖြစ်ပွားခဲ့ကြောင်း သိရသည်။
ယနေ့ နံနက် ၁၁ နာရီ ၅၀ မိနစ်တွင် အကြမ်းဖက် စစ်တပ်၏ တပ်မ ၉၉ ၊ ခမရ ၄၂၀ ၊ ဒစက/ခလရ ၂၆၁ နှင့် ပြည်သူ့စစ် ပူးပေါင်းတပ်ဖွဲ့က လွယ်ကျလော့မှ TNLA တပ်မဟာ ၁ တပ်ရင်း ၁၁၂ ရှိရာကို ထိုးစစ်ဆင်လာခဲ့ပြီး ဆိုင်ခေါင်အနီးတွင် နှစ်ဖက် တိုက်ပွဲထပ်မံဖြစ်ပွားခဲ့ကြောင်း သိရှိရသည်။
မွန်းလွဲ ၁၂ နာရီ ၅၀ မိနစ်တွင် အကြမ်းဖက် စစ်တပ်၏ စကခ ၁၇ ၊ ခမရ ၅၇၇ ၊ ရမခ/ခလရ ၄၅ နှင့် ပြည်သူ့စစ်ပူးပေါင်းတပ်တို့က တအာင်းတပ်မတော်ရှိရာ လွယ်နောတောင်ကို စစ်ကြောင်းထိုးလာသောကြောင့် တိုက်ပွဲဖြစ်ပွားခဲ့ကြောင်း၊ ညနေ ၄ နာရီ ၅၅ မိနစ်တွင် အကြမ်းဖက် စစ်တပ်၏ စကခ ၁၇ ၊ ခမရ ၅၇၇ တပ်တို့က TNLA ရှိရာ ကွတ်ခိုင်မြို့နယ်၊ ခိုမုန်းကျေးရွာအနီးကို ၂ ကြိမ် ထိုးစစ်ဆင် လာသောကြောင့် နှစ်ဖက် တိုက်ပွဲများ ပြင်းထန်စွာဖြစ်ပွားခဲ့ကြောင်း သိရသည်။
တိုက်ပွဲဖြစ်ပွားရာ နေရာနှင့် အနီးဝန်းကျင်ကို အကြမ်းဖက် စစ်တပ်၏ နမ့်ဖက်ကာတပ်စခန်းမှ လွယ်မောက်တောင်ကို လက်နက်ကြီး ၂၄ ကြိမ်၊ လွယ်ကျလော့စခန်းမှ စယ်လန့်ရွာကို ၅၁ ကြိမ်၊ ၁၀၅ မိုင်မှ စယ်လန့်ကို ၃ ကြိမ် ပစ်ခတ်တိုက်ခိုက်ခဲ့ကြောင်း၊ ထို့ပြင် ညနေ ၅ နာရီ ၄၀ မိနစ်တွင် တံတားဦးမှ ဂျက်ဖိုက်တာ ၁ စီးဖြင့် တိုက်ပွဲဖြစ်ပွားရာ ခိုမုန်းအနီးကို လာရောက်ဗုံးကျဲတိုက်ခိုက်ခဲ့ကြောင်း သိရှိရသည်။
မွန်းလွဲ ၂ နာရီတွင် နမ့်ဖက်ကာရှိ အကြမ်းဖက် စစ်တပ်၏ ၁၂၃ တပ်စခန်းက လက်နက်ကြီး ပစ်ခတ်မှုကြောင့် ကွတ်ခိုင်မြို့နယ်၊ ဇီးဒဘန်ရွာကို ကျရောက်ပေါက်ကွဲခဲ့ပြီး အသက် ၃၉ နှစ်အရွယ် ဦးဇော်ဒွဲ နှင့် အသက် ၆၂ နှစ်အရွယ် ဦးဘောင်ရာတို့ သေဆုံးခဲ့ပြီး အမျိုးသမီး ၂ ဦး ထိခိုက် ဒဏ်ရာရရှိခဲ့ကြောင်း သိရသည်။
