မတူပီမြို့နယ်ရှိ ခမရ-၃၀၄ ဂိတ်စခန်းကို ဝင်ရောက် တိုက်ခိုက်၊ ဆောမြို့ရှိ ဦးဖိုးလှိုင်ခန်းမ၌ တပ်စွဲထားသော စစ်သားများကို ပစ်ခတ် တိုက်ခိုက်
ရန်ကုန်၊ စက်တင်ဘာ ၇
ချင်းပြည်နယ်၊ မတူပီမြို့နယ်ရှိ အကြမ်းဖက် စစ်တပ်၏ ခမရ-၃၀၄ ဂိတ်စခန်းကို CDF မတူပီက ဝင်ရောက် တိုက်ခိုက်ခဲ့ကြောင်း NUG ကာကွယ်ရေးဝန်ကြီးဌာနက ထုတ်ပြန်ထားသည်။
စက်တင်ဘာလ ၄ ရက်နေ့ နံနက် ၈ နာရီ ၃၀ တွင် မတူပီမြို့နယ်၊ မတူပီ – ပလက်ဝ လမ်းပိုင်းရှိ အကြမ်းဖက် စစ်တပ်၏ ခမရ- ၃၀၄ ဂိတ်စခန်းကို CDF–Matupi က ဝင်ရောက် တိုက်ခိုက်ခဲ့ကြောင်း သိရသည်။
တိုက်ခိုက်မှုအတွင်း အကြမ်းဖက် စစ်တပ်ဘက်မှ တပ်သား ၃ ဦးထိခိုက် ဒဏ်ရာရရှိခဲ့ပြီး CDF – Matupi ဘက်မှ အထိခိုက်မရှိ ပြန်လည်ဆုတ်ခွာနိုင်ခဲ့ကြောင်း သိရသည်။
ထို့ပြင် မကွေးတိုင်း၊ ဆောမြို့ရှိ ဦးဖိုးလှိုင်ခန်းမ၌ တပ်စွဲထားသော စစ်သားများကို PDF တပ်ဖွဲ့က ပစ်ခတ်တိုက်ခိုက်ခဲ့ကြောင်း NUG ကာကွယ်ရေးဝန်ကြီးဌာနထံမှ သိရသည်။
စက်တင်ဘာလ ၆ ရက်နေ့ ည ၉ နာရီ ၃၁ မိနစ်ခန့်တွင် ဆောမြို့နယ်၊ ဆောမြို့၊ ဦးဖိုးလှိုင်ခန်းမရှိ အကြမ်းဖက် စစ်သားများက လက်နက်ငယ်၊ စက်လတ်၊ ၆၀ မမ၊ ၄၀ မမ၊ အီနာဂါ ဗုံးသီးများဖြင့် မြို့အတွင်းကို ရမ်းသမ်း ပစ်ခတ်ခဲ့သောကြောင့် ပြည်သူ့ကာကွယ်ရေးတပ်မတော် ဂန့်ဂေါခရိုင် အမှတ် ၃၊ ၅၊ ၁၃ တပ်ရင်းများနှင့် မင်းဘူးခရိုင် အမှတ် ၁ တပ်ရင်းတို့ ပူးပေါင်းကာ ပြန်လည်ပစ်ခတ် တိုက်ခိုက်ခဲ့ကြောင်း သိရသည်။
ပစ်ခတ်တိုက်ခိုက်မှုအတွင်း အကြမ်းဖက် စစ်တပ်ဘက်မှ တပ်ကြပ်ကြီး ၂ ဦး၊ တပ်သား ၁ ဦး ထိခိုက် ဒဏ်ရာရ ရှိခဲ့ပြီး ဒဏ်ရာအခြေအနေ စိုးရိမ်ရကြောင်း၊ PDF တပ်ဖွဲ့ဝင်များဘက်မှ အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်း သိရှိရသည်။
အကြမ်းဖက် စစ်တပ်၏ လက်နက်ကြီးများဖြင့် ပစ်ခတ်မှုကြောင့် ပြည်သူ ၁ ဦး ထိခိုက်ဒဏ်ရာရရှိပြီး ဆောမြို့ တောင်တိုက် ဘုန်းကြီးကျောင်း၊ မြောက်တိုက် ဘုန်းကြီးကျောင်း၊ ဦးထွန်းနီအိမ်၊ သမ္မဝါယမ တိုက် စသော နေရာများကို လက်နက်ကြီးများ ကျရောက်ပေါက်ကွဲခဲ့ကာ အဆောက်အဦးများ ထိခိုက်ပျက်စီးမှု ရှိခဲ့ကြောင်း သိရသည်။
