ကြာအင်းဆိပ်ကြီးမြို့ အခြေစိုက် ခလရ ၃၂ တပ်ရင်းမှ တပ်သား ၁ ဦး လက်နက်ဖြင့် အလင်းဝင်လာသောကြောင့် ငွေကျပ် သိန်း ၅၀ ချီးမြှင့်
ရန်ကုန်၊ စက်တင်ဘာ ၇
ကရင်ပြည်နယ်၊ ကြာအင်းဆိပ်ကြီးမြို့ အခြေစိုက် ခလရ ၃၂ တပ်ရင်းမှ တပ်သား ၁ ဦး လက်နက်ဖြင့် အလင်းဝင်လာသောကြောင့် ငွေကျပ် သိန်း ၅၀ ချီးမြှင့်ခဲ့ကြောင်း ကေအဲန်ယူ – ဒူးပလာယာ ခရိုင်က ထုတ်ပြန်ထားသည်။
စက်တင်ဘာလ ၄ ရက်နေ့တွင် နို့တကောမြို့နယ်၊ ကြာအင်းဆိပ်ကြီးမြို့ အခြေစိုက် အကြမ်းဖက် စစ်တပ်၏ ခလရ-၃၂ တပ်ရင်းမှ တပ်သား စိုင်းဖြိုးအောင်သည် လက်နက်ခဲယမ်းများဖြင့် KNU – တပ်မဟာ ၆ ၊ KNLA – တပ်ရင်း ၁၇ ၊ တပ်ခွဲ ၂ ထံကို လာရောက် အလင်းဝင်ခဲ့ကြောင်း သိရသည်။
အလင်းဝင်လာသော တပ်သားသည် အကြမ်းဖက် စစ်တပ်၏ မတရားဖိနှိပ် အုပ်ချုပ်မှု စနစ်ကို မနှစ်သက်သောကြောင့် တပ်မှ ကြိုးစားရုန်းထွက် လွတ်မြောက်ကာ ပြည်သူ့ရင်ခွင်ကို ခိုလှုံပြီး စစ်အာဏာရှင်စနစ် ချုပ်ငြိမ်းသွားသည်အထိ တိုင်းရင်းသားလက်နက်ကိုင် တော်လှန်ရေးသမားများနှင့် အတူ ပူးပေါင်းပါဝင် ကူညီသွားမည်ဖြစ်ကြောင်း၊ ၎င်းနှင့်အတူ MA-1 ၁ လက်၊ ကျည်ဘောက် ၅ ဘောက်၊ ၅.၅၆ ကျည်တောင့် ၇၅ တောင့် နှင့် အီကွေးမင့် ၁ စုံ တို့ ယူဆောင်လာသောကြောင့် KNU – ကရင်အမျိုးသားအစည်းအရုံး၊ ဒူးပလာယာခရိုင် မှ ထောက်ပံ့ငွေအဖြင့် မြန်မာငွေ (၅,၀၀၀,၀၀၀) သိန်းငါးဆယ် ကျပ် တိတိ ချီးမြှင့်ခဲ့ကြောင်း သိရှိရသည်။
အကြမ်းဖက် စစ်တပ်၏ မတရားဖိနှိပ်အုပ်အုပ်ချုပ်မှု စနစ်အတွက် အထောက်အကူဖြစ်စေသော မည်သည့် ထောင့်တိုင်မှန်သမျှကို ဆန့်ကျင်ရန် နှင့် အာဏာသိမ်း စစ်ကောင်စီ လက်အောက်ခံတပ်မှ မည့်သည့် စစ်သားမဆို တပ်ကို စွန့်ခွါကာ KNU – ကရင်အမျိုးသားအစည်းအရုံး နှင့် နွေးထွေးသော ပြည်သူလူထုများ၏ ရင်ခွင်သို့ လာရောက်ပူးပေါင်းရန် KNU – ကရင်အမျိုးသားအစည်းအရုံး နှင့် ပြည်သူလူထုများမှ လှိုက်လှဲစွာ ဖိတ်ခေါ်လျက်ရှိကြောင်း၊ ၎င်းတို့၏ ရှေ့ဆက် ဘဝ ရပ်တည်နိုင်ရေးအတွက် ကူညီထောက်ပံ့ပေးသွားမည် ဖြစ်ကာ ၎င်းနှင့်အတူ ပါလာသော လက်နက်အမျိုးအစားအလိုက် ကာလတန်ဖိုးနှင့်အညီ ထပ်မံပေးအပ်မည်ပြီး သာမာန် ပြည်သူအဖြစ်လုပ်ကိုင်စားသောက်သွားမည်ဆိုပါက ၎င်း၏ အလုပ်အကိုင်အခွင့်အလမ်းအတွက် ကူညီဆောင်ရွက်ပေးသွားမည် ဖြစ်ကြောင်းလည်း KNU – ကရင်အမျိုးသားအစည်းအရုံး၊ ဒူးပလာယာခရိုင် တာဝန်ရှိသူများက ထုတ်ပြန်ထားသည်။
