သရက်ချောင်းတွင် တိုက်ပွဲဖြစ်ပွားပြီး စစ်တပ်ဘက်မှ ၁၁ ဦးသေဆုံး၊ စစ်သား အလောင်းများ တင်ဆောင်လာသည့် စစ်ကားကိုလည်း မိုင်းဆွဲ တိုက်ခိုက်
ရန်ကုန်၊ အောက်တိုဘာ ၁၇
တနင်္သာရီတိုင်း၊ သရက်ချောင်းမြို့နယ်တွင် တိုက်ပွဲဖြစ်ပွားပြီး အကြမ်းဖက် စစ်တပ်ဘက်မှ စစ်သား ၁၁ ဦးသေဆုံးခဲ့ကြောင်း ထားဝယ်ခရိုင်အမှတ် ၂ တပ်ရင်းမှ တာဝန်ရှိသူ တစ်ဦးက ရန်ကုန်ခေတ်သစ် မီဒီယာသို့ ပြောဆိုသည်။
ယနေ့ အောက်တိုဘာလ ၁၇ ရက်နေ့ နံနက် ၇ နာရီ ၁၃ မိနစ်ခန့်တွင် သရက်ချောင်းမြို့နယ်၊ ကတွဲကျေးရွာမှ ထွက်ခွာလာသည့် အင်အား ၅၃ ဦး ပါ အကြမ်းဖက် စစ်တပ် စစ်ကြောင်းကို ရငဲကျေးရွာနှင့် ကတွဲကျေးရွာ ရွာချင်းဆက်လမ်းပေါ်တွင် ပြည်သူ့ကာကွယ်ရေး တပ်မတော်၊ထားဝယ်ခရိုင်အမှတ် ၂ တပ်ရင်း(T5-Zone)က မိုင်းဆွဲပစ်ခတ် တိုက်ခိုက်ခဲ့ပြီး မိနစ် ၃၀ ခန့် တိုက်ပွဲ ဖြစ်ပွားခဲ့ကြောင်း သိရပါသည်။
တိုက်ပွဲအတွင်း အကြမ်းဖက် စစ်တပ်ဘက်မှ စစ်သား ၁၁ ဦး သေဆုံးပြီး အများအပြား ထိခိုက်ဒဏ်ရာရှိကာ PDF ရဲဘော်များ အထိခိုက်ကျဆုံးမရှိ ပြန်လည်ဆုတ်ခွာနိုင်ခဲ့ကြောင်း ထားဝယ်ခရိုင် အမှတ် ၂ တပ်ရင်း (T5-Zone) မှ တာဝန်ရှိသူ တစ်ဦးက ပြောဆိုသည်။
အဆိုပါ တိုက်ပွဲ၌ သေဆုံးသွားသော စစ်သား ရုပ်အလောင်းများနှင့် ဒဏ်ရာရသူများကို လာရောက်သယ်ယူသော စစ်ကား ၁ စီးကို ပုတီးတစ်လုံး ပြောက်ကျားတပ်ဖွဲ့က ထပ်မံ မိုင်းဆွဲတိုက်ခိုက်ခဲ့ပြီးစစ်သားများ တိုက်ခိုက်မှု အခြေအနေကို အတည်မပြုနိုင်သေးကြောင်း သိရသည်။
တိုက်ပွဲ ဖြစ်ပွားပြီးနောက် အကြမ်းဖက် စစ်တပ် စစ်ကြောင်းက ရငဲကျေးရွာအတွင်းရှိ ပြည်သူပိုင် နေအိမ် ၃ လုံးကို မီးရှို့ ဖျက်ဆီးသွားကြောင်း သိရှိရသည်။
