တောင်ငူ အမှတ် ၂ ရဲစခန်းမှ ဒုရဲအုပ် နေဝန်းထွန်းအပါအဝင် ရဲ ၃ ဦး ပစ်ခတ်ခံရပြီး သေဆုံး၊ မောင်တောတွင် လက်နက်မချသော စစ်ကောင်စီတပ်ဖွဲ့ဝင်များကို ပစ်ခတ် တိုက်ခိုက်မှု ၅ ဦးသေဆုံး
ရန်ကုန်၊ နိုဝင်ဘာ ၁၅
ပဲခူးတိုင်း၊ တောင်ငူခရိုင်၊ ဇေယျဝတီမြို့တွင် တောင်ငူ အမှတ် ၂ ရဲစခန်းမှ ဒုရဲအုပ် နေဝန်းထွန်း အပါအဝင် ရဲ ၃ ဦး ပစ်ခတ်ခံရပြီး သေဆုံးခဲ့ကြောင်း ရဲသတင်းရင်းမြစ်က ရန်ကုန်ခေတ်သစ် မီဒီယာသို့ ပြောဆိုသည်။
နိုဝင်ဘာလ ၁၄ ရက်နေ့တွင် ဇေယျဝတီမြို့၌ တောင်ငူ အမှတ် ၂ ရဲစခန်းမှ ဒုရဲအုပ် နေဝန်းထွန်း အပါအဝင် ရဲ ၃ ဦး တော်လှန်ရေး အဖွဲ့များက ပစ်ခတ် တိုက်ခိုက်ခဲ့ရာ သေဆုံးခဲ့ကြောင်းသိရသည်။
“ဇေယျဝတီက ရဲ ၂ ဦးလည်း သေတယ်။ ၁ ယောက်လွတ်သွားတယ်။ နေဝန်းထွန်း အလောင်းက အခုတောင်ငူအမှတ် ၂ စခန်းထဲမှာ နာရေးဘုတ်မှာ အသက် ၄၃ နှစ်လို့ ရေးထားတယ်” ဟု ရဲသတင်းရင်းမြစ်မှ ရန်ကုန်ခေတ်သစ်သတင်းဌာနသို့ ပြောကြားသည်။
သေဆုံးသွားသော ဒုရဲအုပ် နေဝန်းထွန်းသည် စစ်ကြောရေး၌ ရက်စက် ကြမ်းတမ်းစွာ ပြုမူတတ်သည့် ရဲအရာရှိ တစ်ဦးဖြစ်ကြောင်း ရဲသတင်းရင်းမြစ်များထံမှ သိရှိရသည်။
ထို့ပြင် ရခိုင်ပြည်နယ်၊ မောင်တောမြို့နယ်၊ ကံပြင်သာစည်ကျေးရွာအနီးတွင် လက်နက်ချအညံ့ခြင်းမရှိသည့် စစ်ကောင်စီတပ်ဖွဲ့ဝင်များကို လိုက်လံတိုက်ခိုက်ရှင်းလင်းခဲ့ရာ ၅ ဦးသေဆုံးပြီး ဒဏ်ရာရရှိသူ အချို့ ရှိခဲ့ ကြောင်း ရခိုင်တပ်တော် AA တပ်ဖွဲ့က ထုတ်ပြန်သည်။
ယနေ့ နိုဝင်ဘာလ ၁၅ ရက် နံနက် ၅ နာရီ ၃၆ မိနစ်ခန့်တွင် မောင်းတောမြို့နယ်၊ ကံပြင်သာစည်ကျေး ရွာ အရှေ့မြောက်ဘက် ၃ ဒသမ ၃ ကီလိုမီတာအကွာအဝေး၌ လက်နက်ချအညံ့ခံရန် အသိပေးထား သော်လည်း လက်နက်ချအညံ့ခြင်းမရှိသည့် အကြမ်းဖက်စစ်ကောင်စီတပ်ဖွဲ့ဝင်များကို လိုက်လံတိုက် ခိုက်ခဲ့ရာ စစ်ကောင်စီတပ်ဖွဲ့ဝင် ၅ ဦးသေဆုံးပြီး ထိခိုက် ဒဏ်ရာရရှိသူ အချို့ရှိကြောင်း သိရသည်။
ရခိုင်တပ်တော်အနေဖြင့် အကြမ်းဖက်စစ်ကောင်စီတပ်ဖွဲ့များ လက်နက်ချအညံ့ခံရန် အသိပေးထားပြီး လက်နက်ချအညံ့ခံခြင်းမရှိသူများကို ဆက်လက်တိုက်ခိုက်သွားမည်ဖြစ်ကြောင်း သတိပေး ထုတ်ပြန်ထားသည်။
