မူဆယ်တွင် ၁၀၅ မိုင် စစ်တပ်စခန်းက ပစ်ခတ်သည့် လက်နက်ကြီးကျည် ဘုန်းကြီးကျောင်းထဲသို့ ကျရောက်ပေါက်ကွဲပြီး ကိုရင်တစ်ပါး ဒဏ်ရာရ၊ နမ့်ခမ်းတွင် စစ်တပ်က လက်နက်ကြီးများ ဆက်တိုက်ပစ်နေ

မူဆယ်တွင် ၁၀၅ မိုင် စစ်တပ်စခန်းက ပစ်ခတ်သည့် လက်နက်ကြီးကျည် ဘုန်းကြီးကျောင်းထဲသို့ ကျရောက်ပေါက်ကွဲပြီး ကိုရင်တစ်ပါး ဒဏ်ရာရ၊ နမ့်ခမ်းတွင် စစ်တပ်က လက်နက်ကြီးများ ဆက်တိုက်ပစ်နေ

ရန်ကုန်၊ နိုဝင်ဘာလ ၂၂

ရှမ်းပြည်နယ်မြောက်ပိုင်း၊ မူဆယ်မြို့နယ်တွင် ၁၀၅ မိုင်စစ်တပ်စခန်းက ပစ်ခတ်လိုက်သည့် လက်နက်ကြီးကျည် အောက်နမ့်ဟွယ်ကျေးရွာ၊ ဇေယျာမင်္ဂလာ ဘုန်းကြီးကျောင်းအတွင်းကျရောက်ပေါက်ကွဲပြီး ကိုရင်ကြီးတစ်ပါး ဒဏ်ရာရရှိကြောင်း ဒေသပြည်သူများနှင့် TNLA ၏ ထုတ်ပြန်ချက်အရ သိရှိရသည်။

ယနေ့ နိုဝင်ဘာလ ၂၂ ရက်နေ့ နံနက် ၁၁ နာရီ ၅၀ မိနစ်အချိန်တွင် မူဆယ်မြိုနယ် ၁၀၅ မိုင်ရှိ စစ်ကောင်စီတပ်စခန်းက ပစ်ခတ်လိုက်သော လက်နက်ကြီးကျည်သည် အောက်နမ့်ဟွယ်ကျေးရွာ၊ ဇေယျမဂ်လာဘုန်းကြီးကျောင်းတိုက်အတွင်း ၁ လုံးကျရောက်ပေါက်ကွဲခဲ့ကြောင်း၊ ဘုန်းကြီးကျောင်းအတွင်း စစ်တပ်၏ လက်နက်ကြီးကျရောက်ပေါက်ကွဲမှုကြောင့် ကိုရင်ကြီး ၁ ပါး ပေါင်နှစ်ဖက်လုံးတွင် ကျည်စထိမှန်ဒဏ်ရာရရှိခဲ့ကြောင်း၊ ကား ၃ စီးနှင့် ကျောင်းအဆောက်အအုံ ၃ ခုလည်း ပျက်စီးခဲ့ကြောင်း သိရှိရသည်။

အလားတူ ယနေ့နံနက် ၉ နာရီ ဝန်းကျင်အချိန် စစ်ကောင်စီ၏ စခန်းသစ်တပ်စခန်းက လက်နက်ကြီးပစ်ခတ်ခဲ့သဖြင့် နမ့်ခမ်းမြို့၊ မန်လုံကျေးရွာသို့ ကျရောက်ပေါက်ကွဲခဲ့ပြီး နေအိမ် ၁ လုံး ထိခိုက်ပျက်စီးခဲ့ကြောင်း သိရှိရသည်။

“စစ်တပ်က မနေ့ညကရော၊ အခုရော တစ်ချိန်လုံး လက်နက်ကြီးတွေ ပစ်နေတယ်။ မရပ်မနားကို ပစ်နေတာ” ဟု နမ့်ခမ်းမြို့မှ စစ်ဘေးရှောင် ပြည်သူတစ်ဦးက ပြောဆိုသည်။