မြောက်ဥက္ကလာပမြို့နယ် လျှပ်စစ်မီတာရုံးစောင့် စစ်တပ်ကို ယနေ့ နံနက်ပိုင်း ဝင်ရောက်ပစ်ခတ်မှုဖြစ်

မြောက်ဥက္ကလာပမြို့နယ် လျှပ်စစ်မီတာရုံးစောင့် စစ်တပ်ကို ယနေ့ နံနက်ပိုင်း ဝင်ရောက်ပစ်ခတ်မှုဖြစ်

ရန်ကုန်၊ နိုဝင်ဘာ ၂၄

ရန်ကုန်တိုင်း၊ မြောက်ဥက္ကလာပမြို့နယ်၊ အ၀ိုင်းကြီးနားရှိ လျှပ်စစ်မီတာရုံးစောင့် စစ်တပ်ကို ယနေ့ နံနက်ပိုင်း ဝင်ရောက်ပစ်ခတ်ခဲ့ကြောင်း Yangon Army မှ တာဝန်ရှိသူက ရန်ကုန်ခေတ်သစ်သတင်းဌာနထံသို့ ပြောဆိုသည်။

နိုဝင်ဘာလ ၂၄ ရက်နေ့ နံနက် ၆ နာရီ ၂၀ မိနစ်အချိန် မြောက်ဥက္ကလာပမြို့နယ်၊ အ၀ိုင်းကြီးနားရှိ လျှပ်စစ်မီတာရုံးစောင့်စစ်တပ်ကို အနောက်ပိုင်းခရိုင်ပကဖအဖွဲ့နှင့် Yangon Army တို့ပူးပေါင်း၍ ဝင်ရောက်ပစ်ခတ်ခြင်းဖြစ်ကြောင်း သိရှိရသည်။

“မနက်ပိုင်းက ပစ်ခတ်သံတွေတော့ ကြားလိုက်တယ်။ မြောက်ဥက္ကလာအ၀ိုင်းနားမှာ။ မနက်နည်းနည်းစောတော့ ပစ်ခတ်သံ တော်တော်ပီပီသသကြားရတာ” ဟု မြောက်ဥက္ကလာ၊ ဆေးတက္ကသိုလ် ၂ အနီးနေထိုင်သူ ပြည်သူတစ်ဦးက ပြောဆိုသည်။

Yangon Army နှင့် အနောက်ပိုင်းခရိုင်ပကဖအဖွဲ့က ယမန် နေ့ ညပိုင်းကလည်း တောင်ဥက္ကလာပမြို့နယ် လျှပ်စစ်မီတာရုံးစောင့် စစ်တပ်ကို ဝင်ရောက်ပစ်ခတ်ခဲ့ကာ စစ်သားတချို့ ထိခိုဒဏ်ရာရရှိမှုရှိကြောင်း သိရှိရသည်။

ပြည်သူများကို မျိုးစုံဖိနှိပ်အနိုင်ကျင့်နေသော ဌာနများအားလုံးကို ထိရောက်စွာ တိုက်ခိုက်သွားမည်ဖြစ်ကြောင်း ရန်ကုန်အခြေစိုက် တော်လှန်ရေးတပ်ဖွဲ့များက သတိပေးချက် ထုတ်ပြန်ထားသည်။

ဓာတ်ပုံ- ရန်ကုန်တွင် လုံခြုံရေး ယူထားသော အကြမ်းဖက်စစ်ကောင်စီတပ်ဖွဲ့ဝင်များ။ (ပုံအဟောင်းဖြစ်ပါသည်။)