ရခိုင်ပြည်နယ်အတွင်းရှိ ကျေးရွာများကို စစ်တပ်က လက်နက်ကြီးဖြင့် ပစ်ခတ်မှုကြောင့် ပြည်သူ ၄ ဦးသေဆုံးပြီး ပြည်သူ ၂၀ ကျော်ကို အကြောင်းမဲ့ ဖမ်းသွား
ရန်ကုန်၊ နိုဝင်ဘာ ၂၆
ရခိုင်ပြည်နယ်အတွင်းရှိ ကျေးရွာများကို အကြမ်းဖက် စစ်တပ်က လက်နက်ကြီးဖြင့် ပစ်ခတ်မှုကြောင့် ပြည်သူ ၄ ဦးသေဆုံးပြီး ပြည် ၃၀ ကျော်ကို အကြောင်းမဲ့ ဖမ်းဆီးသွားကြောင်း AA သတင်းရင်းမြစ်က ပြောဆိုသည်။
နိုဝင်ဘာလ ၂၅ ရက်နေ့တွင် မောင်တောမြို့နယ်၊ ကိုင်းကြီးရွာကို အကြမ်းဖက် စစ်တပ်၏ မောရဝတီဗျူဟာကုန်းက လက်နက်ကြီးဖြင့် ပစ်ခတ်မှုကြောင့် ဦးနေဝင်း သေဆုံးခဲ့ကြောင်း သိရသည်။
နိုဝင်ဘာလ ၂၄ ရက်နေ့ ညနေ ၄ နာရီကျော်ခန့်တွင် ရသေ့တောင်မြို့နယ်၊ လိုင်ဂွင်ရွာကို အကြမ်းဖက် စစ်တပ်၏ ရီစိုးချောင်း ဗျူဟာကုန်းက လက်နက်ကြီးဖြင့် ပစ်ခတ်မှုကြောင့် ဦးချမ်းသာစိန်သေဆုံးခဲ့ကြောင်း သိရှိရသည်။
နိုဝင်ဘာလ ၂၃ ရက်နေ့တွင် မင်းပြားမြို့နယ်၊ ကေသလာချောင်းဝရွာကို မယ်တော်တောင်၌ တပ်စွဲထားသော အကြမ်းဖက် စစ်တပ်က လက်နက်ကြီးဖြင့် ပစ်ခတ်မှုကြောင့် ဦးဖြူလုံး သေဆုံးခဲ့ကြောင်း သိရသည်။
နိုဝင်ဘာလ ၂၂ ရက်နေ့ ည ၇ နာရီကျော်ခန့်တွင် မြောက်ဦးမြို့နယ်၊ လီညှင်းသာရွာကို အကြမ်းဖက် စစ်တပ်၏ ရေတပ်က လက်နက်ကြီးဖြင့် ပစ်ခတ်မှုကြောင့် ရပ်ရွာအုပ်ချုပ်ရီးမှူးအိမ်မှ နေအိမ်ကို ပြန်လာသည့် ဦးကျော်သာ ကျည်စထိမှန်ပြီး သေဆုံးခဲ့ကြောင်း သိရသည်။
ကျောက်ဖြူမြို့၊ စေတီတောင်ရပ်ကွက်မှ မခင်ငြိမ်းငြိမ်းချမ်းနှင့် ကုလဘာတောင်ရပ်ကွက်မှ ဦးထွန်းနု တို့ကို အကြမ်းဖက် စစ်တပ်က နိုဝင်ဘာလ ၂၂ ရက်နေ့တွင် အကြောင်းမဲ့ ဖမ်းသွားကြောင်း၊ ပုဏ္ဏားကျွန်းမြို့၊ အလယ်စုရပ်ကွက်မှ ဦးထွန်းမောင်၊ ဦးမောင်စောသန်း၊ ဦးထွန်းတင်နု၊ ကိုဇော်ဇော်ဝင်း နှင့် ရွာဟောင်းပိုင်းရပ်ကွက်မှ ကိုမြတ်ကျော်နိုင် တို့ကို နိုဝင်ဘာလ ၂၁ ရက်နေ့တွင် အကြမ်းဖက် စစ်တပ်က အကြောင်းမဲ့ ဖမ်းဆီးသွားကြောင်း သိရှိရသည်။
အလားတူ နိုဝင်ဘာလ ၂၅ ရက်နေ့ ညနေ ၃ နာရီခန့်တွင် စစ်တွေမြို့နယ်၊ သဲချောင်း ကျေးရွာ အုပ်ချုပ်ရေးမှူး ဦးစံမြကျော် သဲချောင်း ကျေးရွာနေ ကိုထွန်းကျော်အောင်၊ ကိုဝေယံစိုး၊ ဦးမောင်သန်း၊ ကားပြင်သူ အမျိုးသား ၂ ဦး၊ စစ်တွေမြို့နယ်၊ သဲချောင်းရွာနေ မရာမာလူမျိုး ကိုဇော်ထွန်းနှင့် အမျိုးတော်စပ်သူ အသက် ၃၀ အရွယ် မရာမာအမျိုးသား ၁ ဦး၊ ကိုအောင်နိုင်ဦး၊ ကိုအောင်နိုင်ဝင်း၊ ကိုအတုနန့် အဂန္တုမရာမာ အမျိုးသား ၁ ဦး၊ မူဆလင် ၃ ဦးတို့ကို အကြောင်းမဲ့ ဖမ်းဆီးသွားကြောင်း သိရသည်။
အဆိုပါ ဒေသခံ အမျိုးသား ၁၆ ယောက်ဦးကို အကြမ်းဖက် စစ်တပ်က စစ်တွေမြို့ အမှတ် ၁ ရဲစခန်းတွင် ဖမ်းဆီးထားပြီးကြောင်း သိရှိရသည်။
ဓာတ်ပုံ- ယမန်နေ့ စစ်သင်္ဘောက ပေါက်တောမြို့ စျေးကို လက်နက်ကြီးဖြင့် ပစ်ခတ်သဖြင့် မီးလောင်နေခဲ့စဉ်။
