ရေစကြိုမြို့၊ ခလရ ၂၅၈ တပ်အတွင်းမှ ထွက်လာသော စစ်သား ၃ ဦးကို ပစ်ခတ် ဖမ်းဆီးစဥ် ၁ ဦး သေဆုံးပြီး သေနတ် ၁ လက် သိမ်းဆည်းရရှိ
ရန်ကုန်၊ ဒီဇင်ဘာ ၆
မကွေးတိုင်း၊ ရေစကြိုမြို့၊ ခလရ ၂၅၈ တပ်အတွင်းမှ ထွက်လာသော စစ်ကောင်စီ တပ်သား ၃ ဦးကို ပစ်ခတ်ဖမ်းဆီးစဥ် တစ်ဦးသေဆုံးပြီး သေနတ် ၁ လက် သိမ်းဆည်းရရှိခဲ့ကြောင်း ရေစကြိုမြို့နယ် ပြည်သူ့ကာကွယ်ရေးတပ်ဖွဲ့မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောကြား သည်။
ယနေ့ ဒီဇင်ဘာလ ၆ ရက် နံနက် ၉ နာရီခန့်က ခလရ ၂၅၈ တပ်အတွင်းမှ အကြမ်းဖက်စစ်သား ၃ ဦး တပ်ပြင်ထွက်သွားကြောင်း သတင်းအရ ပြည်သူ့ကာကွယ်ရေးတပ်ဖွဲ့ဝင်များမှ သွားရောက် ဖမ်းဆီးရာ ပြန်လည် ခုခံသောကြောင့် ပစ်ခတ်ဖမ်းဆီးရာမှ ၁ ဦးသေဆုံးပြီး သေနတ် ၁ လက်၊ ကျည်ဘောက် ၃ ခု၊ ကျည် ၆၇ တောင့်နှင့်အတူ အသုံးအဆောင်ပစ္စည်းများ သိမ်းဆည်းရ ရှိခဲ့ကြောင်း သိရသည်။
“ခလရ ၂၅၈ တပ်နောက်ဘက်မှာ၊ တပ်ထဲကနေ ထွက်လာတယ်ဆိုတာ သတင်းရလို့ သွားဖမ်းတော့ သူတို့က ပြန်ခုခံတာနဲ့ အပြန်အလှန်ပစ်ခတ်မှုဖြစ်ခဲ့တာ၊ သေသွားတဲ့ တစ်ယောက်ဆီကနေ MA 1 သေနတ်တစ်လက်၊ ကျည်ဘောက် ၃ လောက်နဲ့ ကျည်အနည်းငယ်ရခဲ့တာ၊ ကျန်တဲ့နှစ်ယောက်က ထွက်ပြေးသွားတယ်၊ ကျနော်တို့ ရဲဘော်တွေ အထိအခိုက်မရှိခဲ့ပါဘူး” ဟု ရေစကြိုမြို့နယ် ပြည်သူ့ ကာကွယ်ရေးတပ်ဖွဲ့မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောကြား သည်။
