ဆောထိမြို့နယ်ရှိ စစ်ကောင်စီ တပ်သားများ စွန့်ခွာ ထွက်ပြေးသွားသော ကွန်ဖဲ့စခန်းကို KNLA က မီးရှို့ရှင်းလင်း
ရန်ကုန်၊ ဒီဇင်ဘာ ၁၁
ကရင်ပြည်နယ်၊ KNU ဆောထိမြို့နယ်ရှိ အကြမ်းဖက် စစ်ကောင်စီ တပ်သားများ စွန့်ခွာ ထွက်ပြေးသွားသော ကွန်ဖဲ့စခန်းကို KNLA က မီးရှို့ရှင်းလင်းခဲ့ကြောင်း KNU ဗဟိုက ထုတ်ပြန်ထားသည်။
နိုဝင်ဘာလ ၁၇ ရက်နေ့တွင် ဆောထိမြို့နယ် အတွင်းရှိ အကြမ်းဖက် စစ်တပ်၏ တောင်ခြေရင်း ရှေ့တန်း တပ်စခန်းကို ကရင်အမျိုးသား လွတ်မြောက်ရေး တပ်မတော် (KNLA) နှင့် တော်လှန်ရေး ပူးပါင်းတပ်ဖွဲ့များက တိုက်ခိုက် သိမ်းပိုက်နိုင်ခဲ့ပြီး ယင်းစခန်းနှင့် အပြန်အလှန်လုံခြုံရေးအရ အထောက်အကူယူထားသည့် ဝင်းကလုံး စစ်စခန်းမှာလည်း မလုံခြုံတော့သဖြင့် ဒီဇင်ဘာလ ၂ ရက်နေ့တွင် ဝင်းကလုံး စခန်း၌ တပ်စွဲထားသော ခမရ−၃၅၂ စစ်ကြောင်း တ မှာ စခန်းကို စွန့်ခွာ ထွက်ပြေးသွားကြောင်း သိရသည်။
ထို့နောက် ဒီဇင်ဘာလ ၇ ရက်နေ့တွင် ကွန်ဖဲ့စခန်း၌ တပ်စွဲထားသော အကြမ်းဖက် စစ်ကောင်စီတပ်သားများသည် စခန်းကို စွန့်ခွာ ထွက်ပြေးသွားသောကြောင့် ဒီဇင်ဘာလ ၁၀ ရက်နေ့တွင် ကရင်အမျိုးသားလွတ်မြောက်ရေးတပ်မတော် (KNLA) မှ သွားရောက် မီးရှို့ ရှင်းလင်းခဲ့ကြောင်း သိရှိရသည်။
ကွန်ဖဲ့စခန်းများကို စွန့်ခွာ ထွက်ပြေးသွားသော အကြမ်းဖက် စစ်ကောင်စီ တပ်သားများသည့် မြို့နှင့်အနီးဆုံး တပ်စခန်းများ၌ ပြန်လည် အင်အားဖြည့် ပူးပေါင်းထားကြောင်း သိရသည်။
