ဆားလင်းကြီးတွင် စစ်ကြောင်းထိုးလာသော စစ်တပ်ကို တိုက်ခိုက်မှု စစ် ကောင်စီ တပ်ဘက်မှ ၈ ဦးသေဆုံး
ရန်ကုန်၊ ဇန်နဝါရီ ၁၈
စစ်ကိုင်းတိုင်း၊ ဆားလင်းကြီးမြို့နယ်တွင် စစ်ကြောင်းထိုးဝင်ရောက်လာသော စစ်တပ်ကို တော်လှန်ရေးတပ်ဖွဲ့များက တိုက်ခိုက်ရာ စစ်ကောင်စီတပ်ဘက်မှ စစ်သား ၈ ဦးသေဆုံးကြောင်း Hero Fighter (အထူးတပ်ရင်း)မှ သတင်းနှင့် ပြန်ကြားရေး တာဝန်ခံက ရန်ကုန်ခေတ်သစ်သတင်းဌာနထံသို့ ပြောဆိုသည်။
ဇန်နဝါရီလ ၁၆ ရက်နေ့ မုံရွာမှ အင်အား ၁၀၆ ဦးဖြင့် ဆားလင်းကြီးမြို့သို့ စစ်ကြောင်းထိုးဝင်ရောက်လာသော စစ်တပ်ကြောင်းသည် ဇန်နဝါရီလ ၁၇ ရက်နေ့ နံနက် ၇ နာရီအချိန် ဆားလင်းကြီးမြို့၊ အရှေ့ဘက် ဆားထုံးကျေးရွာသို့ ရောက်ရှိလာစဉ် တော်လှန်ရေးတပ်ဖွဲ့များက ရှေ့ထွက်မိုင်းများ၊ လက်နက်ငယ် ဖြင့် ဖောက်ခွဲပစ်ခတ်တိုက်ခိုက်ခဲ့ကြောင်း၊ ဇန်နဝါရီလ ၁၇ ရက်နေ့ နံနက် ၉ နာရီမှ ၉ နာရီ ၄၅ မိနစ်အထိ တစ်ကြိမ်၊ နံနက် ၁၀ နာရီမှ နံနက် ၁၀ နာရီ ၁၅ မိနစ်အထိ တစ်ကြိမ်၊ မွန်းတည့် ၁၂ နာရီမှ မွန်းတည့် ၁၂ နာရီ ၁၅ မိနစ်အထိ တစ်ကြိမ် စုစုပေါင်း ၃ ကြိမ် တိုက်ပွဲဖြစ်ပွားခဲ့ကြောင်း သိရှိရသည်။
အဆိုပါတိုက်ပွဲ ၃ ကြိမ်လုံးတွင် စစ်ကောင်စီတပ်ဘက်မှ ၈ ဦးသေဆုံးပြီး ၄ ဦး ဒဏ်ရာရရှိကြောင်း၊ စစ်တပ်မှာ ရှေ့သို့ ဆက်မတိုး နိုင်တော့ဘဲ ဆားလင်းကြီး မြို့သို့ ပြန်လည် ဆုတ်ခွာသွားကြောင်း သိရှိရသည်။
“တိုက်ပွဲကတော့ ကျနော်တို့ ဦးဆောင်တိုက်တာပါ။ တိုက်ပွဲ တစ်နေ့တည်း ၃ ကြိမ်ဖြစ်တယ်။ ဆားလင်းကြီးမှာတော့ မနေ့က နာမည်ကျော်တဲ့ တိုက်ပွဲပဲ” ဟု Hero Fighter (အထူးတပ်ရင်း)မှ သတင်းနှင့်ပြန်ကြားရေး တာဝန်ခံက ရန်ကုန် ခေတ်သစ်သတင်းဌာနထံသို့ ပြောဆိုသည်။
#နွေဦးတော်လှန်ရေး #khitthitmedia #myanmarmedia #burmesemedia #foryou #foryoupage #NUG #springrevolution #HeroFighter #စစ်ကောင်စီ
