ကျိုက်ထိုတွင် စစ်တပ်က ပစ်ခတ်သော လက်နက်ကြီးကျည်ကြောင့် ပြည်သူများ၏ နေအိမ်များ ထိခိုက်ပျက်စီး

ကျိုက်ထိုတွင် စစ်တပ်က ပစ်ခတ်သော လက်နက်ကြီးကျည်ကြောင့် ပြည်သူများ၏ နေအိမ်များ ထိခိုက်ပျက်စီး

ရန်ကုန်၊ ဇန်နဝါရီ ၂၁

မွန်ပြည်နယ်၊ ကျိုက်ထိုမြို့နယ်တွင် စစ်တပ်က ပစ်ခတ်သော လက်နက်ကြီးကျည်ထိမှန်၍ ပြည်သူများ၏နေအိမ်များ ထိခိုက်ပျက်စီးကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုကြသည်။

ဇန်နဝါရီ ၁၉ ရက်နေ့ ည ၁၀ နာရီအချိန် ပဲခူးတိုင်း၊ ဝေါမြို့နယ်၊ အုန်းတောဘုန်းကြီးကျောင်းဘေးရှိ နွာစိုးနိုင် ပဲရုံဖွင့်ရန် မြေဖို့ထားသော နေရာတွင် စစ်တပ်က အမြောက်ချ၍ ၁၂၀ မမ လက်နက်ကြီး ၅ လုံးပစ်ခတ်ခဲ့ကြောင်း၊ အဆိုပါ လက်နက်ကြီးကျည်သည် တစ်ဖက်ကမ်း မွန်ပြည်နယ်၊ ကျိုက်ထိုမြို့နယ်၊ ခရွဲကျေးရွာ၊ ထင်းတဲအပိုင်း အနီးဝန်းကျင်တွင် ဗုံး ၂ လုံး၊ စစ်ကွင်းကျေးရွာအနီး (ထန်းတော ဝန်းကျင်)ကျရောက်ပေါက်ကွဲခဲ့ကြောင်း သိရှိရသည်။

“ခရွဲကျေးရွာအနီး ထင်းတဲအပိုင်း ရှိ မအိစနေ အိမ်ပေါ်ကို လက်နက်ကြီးကျည်ကျတယ်။ မပေါက်ကွဲခဲ့ဘူး။ ခေါင်မိုးတော့ပေါက်သွားတယ်။ အိမ်ရှင်တွေတော့ မနေရဲကြတော့ဘူး” ဟု ဒေသပြည်သူတစ်ဦးက ပြောဆိုသည်။

အလားတူ ၂၀၂၃ ခုနှစ် ဒီဇင်ဘာလ ၃ ရက်နေ့တွင် စစ်ကောင်စီတပ်က တပ်စွဲ၍ အထက်ကွေ့ကြီး နှင့် လက်ပံရွာမှတစ်ဆင့် လက်နက်ကြီးဖြင့် ပစ်ခတ်ရာ ကိုဇော်ငြိမ်းဦး အိမ်သို့ ထိမှန်ခဲ့ပျက်စီးခဲ့ကြောင်း သိရှိရသည်။