မုံရွာမြို့နယ်၊ ကြိုးကြာကန်ရွာကို စစ်တပ်က မီးရှို့ဖျက်ဆီးမှု နေအိမ် ၅ လုံးပြာကျပြီး အိမ်မွေးတိရစ္ဆာန်များ မီးလောင်သေဆုံး
ရန်ကုန်၊ ဖေဖော်ဝါရီ ၈
စစ်ကိုင်းတိုင်း၊ မုံရွာမြို့နယ်၊ ကြိုးကြာကန်ကျေးရွာကို အကြမ်းဖက် စစ်တပ်က မီးရှို့ဖျက်ဆီးမှု နေအိမ် ၅ လုံးပြာကျပြီး အိမ်မွေးတိရစ္ဆာန်များ မီးလောင်သေဆုံးခဲ့ကြောင်း ဒေသပြည်သူများက ပြောဆိုသည်။
ဖေဖော်ဝါရီလ ၇ ရက်နေ့တွင် မုံရွာမြို့ အနောက်မြောက်တိုင်း စစ်ဌာနချုပ် (နမခ) မှ ထွက်လာသည့် အကြမ်းဖက် စစ်တပ် စစ်ကြောင်းသည် ကျီးဗဒုံကျေးရွာကို စတင်စစ်ကြောင်းထိုးလာပြီး မင်းတဲကျေးရွာတွင် ညအိပ်တပ်စွဲကာ ယနေ့ ဖေဖော်ဝါရီလ ၈ ရက်နေ့တွင် ကြိုးကြာကန်ရွာကို သေနတ််များ ပစ်ဖောက်ကာ ၀င်ရောက်စီးနင်းပြီး ပြည်သူ့ပိုင် နေအိမ်များကို မီးရှို့ဖျက်စီးခဲ့ခြင်းဖြစ်ကြောင်းသိရသည်။
“မနေ့ညက မင်းတဲမှာ ညအိပ်တဲ့စစ်ကြောင်းဗျ၊ ဒီမနက်ကြကြိုးကြာကန်ရွာ၀င်ပြီးမီးရှို့တာ နေအိမ် ၅ လုံးနဲ့ အိမ်မွေးတိရစ္ဆာန်တွေ မီးလောင်သေဆုံးသွားတယ်” ဟု ဒေသ ပြည်သူ့ကာ ကွယ်ရေးအဖွဲ့၀င်တစ်ဦးက ပြောဆိုသည်။
အကြမ်းဖက် စစ်တပ် မီးရှို့ဖျက်စီးမှုကြောင့် နေအိမ် ၅ လုံး၊ နွားစာတဲ ၃ လုံး၊ သိုး အကောင် ၂၀၊ နွား ၁ ကောင်၊၀က် ၁ ကောင်နှင့် ဆိုင်ကယ်များ၊ လယ်ယာသုံးစက်ပစ္စည်းများ၊ မီးလောင်ဆုံးရှုံးခဲ့ကြောင်း၊ အကြမ်းဖက် စစ်တပ် စစ်ကြောင်း ဝင်ရောက်လာချိန်တွင် ပြည်သူများရှောင်ရှားနိုင်ခဲ့သောကြောင့် ထိခိုက် ဒဏ်ရာရရှိသူမရှိကြောင်း သိရသည်။
ဖေဖော်ဝါရီလ ၃ ရက်နေ့ ကလည်း အကြမ်းဖက် စစ်တပ်က မုံရွာမြို့နယ် နဂါးတွင်းကျေးရွာကို မီးရှို့ဖျက်ဆီးခဲ့ခြင်းကြောင့် ပြည်သူပိုင် နေအိမ် ၁၀၀ ကျော် မီးလောင်ဆုံးရှုံးခဲ့ကြောင်း သိရှိရသည်။
![](https://yktnews.com/wp-content/uploads/2024/02/426323792_749068800654062_2616003937597806805_n.jpg)
![](https://yktnews.com/wp-content/uploads/2024/02/426619955_749069013987374_4025320389129256375_n.jpg)
![](https://yktnews.com/wp-content/uploads/2024/02/426626992_749068923987383_4901968470091685148_n.jpg)