ခင်ဦးမြို့နယ်တွင် ၇၇ နှစ်မြောက် အာဇာနည်နေ့ ဂုဏ်ပြု အခမ်းအနား မြို့နယ်အဆင့် ပြုလုပ်
ရန်ကုန်၊ဇူလိုင် ၁၉
စစ်ကိုင်းတိုင်း ရွှေဘိုခရိုင်၊ ခင်ဦးမြို့နယ်တွင် မြို့နယ်ပြည်သူ့အုပ်ချုပ်ရေးအဖွဲ့က ၇၇ နှစ်မြောက် အာဇာနည်နေ့ အခမ်းအနားကို ဇူလိုင်လ ၁၉ ရက်နေ့တွင် ပြုလုပ်ခဲ့ကြောင်း သိရှိရသည်။
အခမ်းအနားတွင် NUG အစိုးရ၊ သက်ဆိုင်ရာ ဝန်ကြီး ဌာနအသီးသီး၏ ရေးရာတာဝန်ခံများမှ ဌာနအလိုက် ဂုဏ်ပြု ပန်းခွေများဖြင့် အလေးပြုခြင်း၊ မြို့နယ် ပအဖ နာယက၊ လျှပ်စစ်နှင့် စွမ်းအင် တိုင်း တာဝန်ခံ၊ မြို့နယ် ပအဖ ခေါင်းဆောင်၊ ပကဖ တာဝန် ခံနှင့် ရေးရာတာဝန်ခံများမှ အာဇာနည်နေ့ အထိမ်းအမှတ် ဂုဏ်ပြုစကားများ ပြောဆိုခြင်း၊ ဗိုလ်ချုပ်အောင်ဆန်းနှင့်တကွ အာဇာနည်ခေါင်းဆောင်ကြီးများကို ၁၀:၃၇ မိနစ်အချိန်တွင် ဂုဏ်ပြုပန်းခွေ၊ ဂုဏ်ပြုသေနတ် ပစ်ဖောက်၊ ဥသြများဆွဲ၍ အလေးပြုခြင်းများအပါအဝင် အာဇာနည်နေ့အထိမ်းအမှတ် ဂုဏ်ပြုတေးသီချင်းများ သီဆိုခဲ့ကြကြောင်း သိရှိရသည်။
