နောင်ချိုမြို့၊ကျောက်မဲမြို့နှင့်သီပေါမြို့များတွင် စစ်တပ်၏ လေကြောင်းတိုက်ခိုက်မှုနှင့် လက်နက်ကြီးပစ်ခတ်မှုများကြောင့် ပြည်သူ ၄၆ ဦးသေဆုံးပြီး ၃၅ ဦးဒဏ်ရာရကာ အဆောက်အအုံ ၁၅၀ ကျော်ပျက်စီးခဲ့
ရန်ကုန်၊ ဇူလိုင် ၂၂
ရှမ်းပြည်မြောက်ပိုင်း၊ နောင်ချိုမြို့၊ကျောက်မဲမြို့နှင့်သီပေါမြို့များတွင် စစ်ကောင်စီ၏ လေကြောင်းတိုက်ခိုက်မှုနှင့် လက်နက်ကြီးပစ်ခတ်မှုများကြောင့် ပြည်သူ ၄၆ ဦးသေဆုံးပြီး ၃၅ ဦးဒဏ်ရာရကာ အဆောက်အအုံ ၁၅၀ ကျော်ပျက်စီးခဲ့ကြောင်း ရှမ်းလူ့အခွင့်အရေးမဏ္ဍိုင်က ပြောဆိုသည်။
TNLA၊ MNDAA နှင့် PDF တပ်ဖွဲ့တို့၏ ၁၀၂၇ စစ်ဆင်ရေးဒုတိယပိုင်း စတင်သည့် ဇွန်လ ၁၉ ရက်နေ့မှ ဇူလိုင်လ ၄ ရက်နေ့အထိ နှစ်ပတ်တာကာလအတွင်း အကြမ်းဖက်စစ်တပ်က တရုတ်ရေနံနှင့်သဘာဓာတ်ငွေ့ပိုက်လိုင်း တစ်လျှောက်ရှိ မြို့များတွင် သေဆုံးထိခိုက်မှုများစေသော ပေါင် ၅၀၀ ဗုံးများ အသုံးပြုခြင်းအပါအ၀င် အမြောက်နှင့် လေကြောင်းတိုက်ခိုက်မှုများကို မြို့များနှင့် ရွာများအပေါ် ပိုမို စုစည်းပစ်မှတ်ထားလုပ်ဆောင်ခဲ့ကြောင်း သိရှိရသည်။
ဇွန်လ ၂၅ ရက်နေ့တွင် နောင်ချိုမြို့နယ်အတွင်းရှိ အကြမ်းဖက်စစ်တပ်စခန်းများကို TNLA နှင့် PDF ပူးပေါင်းတပ်ဖွဲ့တို့က ၀င်ရောက်တိုက်ခိုက်ခဲ့ပြီးနောက် အကြမ်းဖက်စစ်တပ်သည် မြို့အတွင်းသို့ တိုက်ရိုက် လက်နက်ကြီးများ ပစ်ခတ်ခဲ့ရာ အမျိုးသမီး ၂ ဦးသေဆုံးကာ အမျိုးသား ၂ ဦးဒဏ်ရာရရှိခဲ့ကာ ဘူတာရပ်နှင့် ဈေးရပ်တွင်းရှိ နေအိမ် များစွာပျက်စီးခဲ့ကြောင်း၊ အဆိုပါနေ့တွင်ပင် အုမ္မသီးကျေးရွာတွင် တပ်စွဲထားသော အကြမ်းဖက်စစ်တပ်သည် တရုတ်ရေနံနှင့် သဘာ၀ဓာတ်ငွေ့ ပိုက်လိုင်းကိုဖြတ် ကာ ဆမ္မဆယ် ကျေးရွာဘက်သို့ လက်နက်ကြီးများ ပစ်ခတ်ခဲ့ရာ နေအိမ်အများ အပြား ပျက်စီးခဲ့သည့်အပြင် လက် နက်ကြီးတစ်လုံးသည် ပိုက်လိုင်းမှ ၈၀ မီတာသာကွာဝေးသော ချိုခမ်းဘုန်းကြီး ကျောင်းဝင်းအတွင်း ကျရောက်ကာ သံဃာတစ်ပါး ဒဏ်ရာရရှိခဲ့ကာ ကျောင်းအဆောက်အအုံ ပျက်စီးခဲ့ကြောင်း သိရှိရသည်။
ထို့ပြင် ဇွန်လ ၂၅ ရက်နေ့မှ ၃၀ ရက်နေ့အထိ စစ်ကောင်စီတပ်သည် နောင်ချိုမြို့ပေါ်ရပ်ကွက်များနှင့် မြို့အနောက်ပိုင်းရှိ ကျေး ရွာများကို လက်နက်ကြီးပစ်ခတ်မှုနှင့် လေကြောင်းတိုက်ခိုက်မှုတို့ ဆက်တိုက်ပြုလုပ်ခဲ့ရာ နေအိမ် ၁၂ လုံးခန့် ပျက်စီးခဲ့ပြီး ပြည်သူတစ်ဦးသေဆုံးခဲ့ကြောင်း သိရှိရသည်။
ကျောက်မဲမြို့နယ်အတွင်းတွင်မူ ဇွန်လ ၁၉ ရက်မှ ဇူလိုင်လ ၂ ရက်နေ့အထိ စစ်ကောင်စီ၏ လေ ကြောင်းတိုက်ခိုက်မှုနှင့် လက်နက်ကြီးပစ်ခတ်မှုတို့ကြောင့် ပြည်သူ ၄၄ ဦးသေဆုံးကာ ၂၅ ဦးဒဏ်ရာရရှိပြီး နေ အိမ်အလုံး ၁၀၀ ကျော်ပျက်စီးခဲ့ကြောင်း၊ သို့သော် ဒေသခံလူမှုကူညီရေးအဖွဲ့များမှ ဇူလိုင်လအစောပိုင်းတွင် အရပ်ဝတ်ဖြင့် ရုပ်အလောင်း ၆၀ ကို ကောက်ယူခဲ့ရသော မှတ်တမ်းအရ ပြည်သူ ထိခိုက်သေဆုံးမှု ပိုမိုများပြားနိုင်ကြောင်း ထုတ်ပြန်ချက်တွင် ဖော်ပြထားသည်။
ဇွန်လ ၁၉ ရက်နေ့နှင့် ဇွန်လ ၂၄ ရက်နေ့တို့တွင် အကြမ်းဖက်စစ်တပ်က ကျောက်မဲမြို့နယ် အနောက်မြောက်အရပ်ရှိ ကျေးရွာ၂ ရွာကိုလေကြောင်းတိုက်ခိုက်မှုပြုလုပ်ခဲ့ရာ အရပ်သား ၃ ဦးထိခိုက်ခဲ့ပြီး နေအိမ်များလည်းပျက်စီးခဲ့ကြောင်း သိရှိရသည်။
ဇွန်လ ၂၅ ရက်တွင်လည်း နံနက် ၆ နာရီခန့်မှ စတင်ကာ TNLA/PDF တပ်များက ကျောက်မဲမြို့နေရာအနှံ့ရှိ အကြမ်းဖက်စစ်တပ်စခန်းများကိုထိုးစစ်ဆင်တိုက်ခိုက်ခဲ့ရာမှ တိုက်ပွဲများစတင်ဖြစ်ပွားခဲ့ကြောင်း၊အကြမ်းဖက်စစ်တပ်၏ လက်နက်ကြီးပစ်ခတ်မှုနှင့် လေကြောင်းတိုက်ခိုက်မှုများကြောင့် ဇွန်လ ၂၅ ရက်နေ့တွင် ကျောက်မဲမြို့ ပေါ်ရှိ ပြည်သူ ၈ဦးသေဆုံးကာ ၁၁ဦးဒဏ်ရာရရှိခဲ့သည့်အပြင် မြို့ပေါ်ရပ်ကွက်များမှနေအိမ်အများအပြား ပျက်စီးခဲ့ကြောင်း သိရှိရသည်။
ဇွန်လ ၂၆ ရက်နေ့တွင် TNLA ပူးပေါင်းတပ်ဖွဲ့သည် ကျောက်မဲမြို့ရပ်ကွက် ၁ ရှိ စစ်ကောင်စီအမြောက်တပ် ၃၅၂ နှင့် စစ်ကောင်စီတပ်များတပ်စွဲခဲ့သော ကျောက်မဲဆေးရုံ၊ရဲစခန်း၊အထွေထွေအုပ်ချုပ်ရေးမှုရုံးနှင့် မီးသတ်ဌာနတို့ကို ထိန်းချုပ်နိုင်ခဲ့ကြောင်း သိရှိရသည်။
ဇွန်လ ၂၆ ရက်နေ့တွင်လည်း တိုက်ပွဲများပြင်းထန်စွာဖြစ်ပွားခဲ့ပြီး အကြမ်းဖက် စစ်တပ်က လက်နက်ကြီးများ၊ လေကြောင်းပစ်ကူများဖြင့် တိုက်ခိုက်ခဲ့ရာ ညနေပိုင်းတွင် အိမ်ရှေ့တွင် ထိုင်နေသော ပြည်သူ ၆ဦး အပါအ၀င် ပြည်သူ ၇ ဦးထိမှန် သေဆုံးခဲ့ကာ ဇွန်လ ၂၇ ရက်မှ ၂၉ ရက်အထိ အကြမ်းဖက်စစ်တပ်မှ ကျောက်မဲမြို့ပေါ်နှင့်အနီးတစ်ဝိုက် ရှိ ကျေး ရွာများကို လေ ကြောင်း တိုက်ခိုက်မှုများ ဆက်တိုက်ပြုလုပ်ခဲ့ရာ ပြည်သူ ၂၁ ဦးသေဆုံးပြီး ၇ ဦးဒဏ်ရာရခဲ့ကြောင်း သိရှိရသည်။
ထို့ပြင် ဇွန်လ ၃၀ ရက် ည ၁၁ နာရီခန့်တွင် အကြမ်းဖက်စစ်တပ်သည် ပေါင် ၅၀၀ ဗုံး ၃ လုံးကို မြို့အတွင်း ကျဲချခဲ့ရာ ဟော်တယ်၊ ဘုန်း ကြီးကျောင်း အပါအ၀င် အနည်းဆုံး နေအိမ် ၂၀ ပျက်စီးပြီး ပြည်သူ ၃ ဦးသေဆုံးကာ ၅ ဦးဒဏ်ရာရခဲ့ကြောင်း သိရှိရသည်။
သီပေါမြို့နယ်တွင်မူ ဇွန်လ ၂၅ ရက်နေ့ညပိုင်းမှစတင်ကာ ဇွန်လ ၂၇ ရက်နေ့အထိ တိုက်ပွဲကြီးကြီးမားမားမရှိဘဲ ဒုဌ၀တီမြစ်ကူးတံတားအနီးရှိ အကြမ်းဖက်စစ်တပ်၏ တပ်စခန်းနှင့် ခလရ ၂၃ တပ်များက TNLA တပ်ဖွဲ့၀င်များရှိရာ ဆွတ်လန်းကျေးရွာဘက်သို့ လက်နက်ကြီးဆက်တိုက်ပစ်ခတ်ခဲ့ကြောင်း၊ ဒုဌ၀တီမြစ်ကူးတံတားအနီးရှိတပ်စခန်းမှ ပစ်လိုက်သော လက်နက်ကြီးသည် TNLA တပ်ဖွဲ့ဝင်များမရှိသော သီပေါမြို့ပန်းတိမ်တောင်ရပ်ကွက်အတွင်းသို့ ကျရောက်ခဲ့ရာ ပြည်သူ့နေအိမ်တစ်လုံး ထိခိုက်ပျက်စီးခဲ့ကြောင်း သိရှိရသည်။
ဇူလိုင်လ ၁ ရက်နေ့ညပိုင်း ၇နာရီဝန်းကျင်တွင် သီပေါမြို့နယ် စံဖိတ်ကျေးရွာအုပ်စု စံလှိုင်ရွာအနီးတွင် TNLA/PDF ပူးပေါင်းတပ်ဖွဲ့နှင့် အကြမ်းဖက်စစ်ကောင်စီတပ်တို့ တိုက်ပွဲများဖြစ်ပွားခဲ့ပြီးနောက် စစ်ကောင်စီတပ်မှ လေကြောင်းမှ ဗုံးကြဲ တိုက်ခိုက်ခဲ့ရာ ပြည်သူ ၅ ဦး ထိခိုက်ဒဏ်ရာရရှိခဲ့ပြီး နေအိမ် ၂လုံးပျက်စီးခဲ့ကြောင်း သိရှိရသည်။
ဇူလိုင်လ ၄ ရက်နေ့ညပိုင်းတွင်မူ TNLAနှင့် MNDAA ပူးပေါင်းတပ်ဖွဲ့သည် ဒုဌ၀တီမြစ်ကူးတံတားအနီးရှိ အကြမ်းဖက်စစ်တပ်စခန်းကို လာရောက်ထိုးစစ်ဆင်တိုက်ခိုက်ခဲ့ရာ တိုက်ပွဲများပြင်းထန်စွာဖြစ်ပွားခဲ့ပြီးနောက် ည ၈ နာရီဝန်း ကျင်ခန့်တွင် အကြမ်းဖက်စစ်တပ် ခမရ ၂၃ က ပစ်လိုက်သော လက်နက်ကြီးသည် ပန်းတိမ်တောင်ရပ်ကွက်အတွင်းသို့ ကျရောက်ခဲ့ပြီး ပြည်သူတစ်ဦး ထိမှန်ဒဏ်ရာရကာ နေအိမ် ၃လုံးပျက်စီးခဲ့ကြောင်း သိရှိရသည်။
