စစ်ကောင်စီ၏ ဝန်ထမ်းနှင့်အငြိမ်းစားများအားလုံးကို လစာတိုးမြှင့်ပေးသည့် သတင်းကြောင့် အမေရိကန်တစ်ဒေါ်လာ ၅၁၀၀ ဝန်းကျင်နှင့် အခေါက်ရွှေစျေး ၆၂ သိန်းကျော်သို့ ရောက်ရှိ
ရန်ကုန်၊ ဇူလိုင် ၂၇
အကြမ်းဖက်စစ်ကောင်စီက ဝန်ထမ်းနှင့် အငြိမ်းစားများအားလုံးကို လာမည့်ဩဂုတ်လ ၁ ရက်နေ့မှစတင်၍ ထောက်ပံ့ကြေး လစာတိုးမြှင့်ပေးမည်ဖြစ် ကြောင်း ယမန်နေ့တွင် ကြေညာလိုက်ရာ အဆိုပါ သတင်းကြောင့် ပြည်တွင်းစျေးကွက်တွင် အမေရိကန်တစ်ဒေါ်လာ ၅၁၀၀ ဝန်းကျင်နှင့် အခေါက်ရွှေတစ်ကျပ်သားလျှင်ငွေကျပ် ၆၂ သိန်းဝန်းကျင်သို့ ရောက်ရှိနေကြောင်း စျေးကွက်အတွင်းမှ စုံစမ်းသိရှိရသည်။
အကြမ်းဖက်စစ်ကောင်စီက ဝန်ထမ်းများနှင့် အငြိမ်းစားများအားလုံးကို ဩ ဂုတ် လ ၁ ရက်နေ့မှစတင်၍ ငွေကျပ် သုံးသောင်း ထပ်မံတိုးမြှင့်ပေးမည်ဖြစ်ကြောင်း၊ ၂၀၂၃ ခုနှစ်အောက်တိုဘာလတွင် နိုင်ငံ့ဝန်ထမ်းများကို လက်ရှိလစာအပြင် တစ်ဦးလျှင် ငွေကျပ် ၃၀၀၀၀ ထောက်ပံ့ကြေးကို ပထမအကြိမ် တိုးမြှင့်ပေးခဲ့ကြောင်း၊ ယခုအခါ လာမည့် ဩဂုတ်လ ၁ ရက်နေ့မှစတင်၍ ဒုတိယအကြိမ်အဖြစ် ဝန်ထမ်းများနှင့် အငြိမ်းစားဝန်ထမ်းများအားလုံးကို အပိုထောက်ပံ့ကြေးအဖြစ် ငွေကျပ် ၃၀၀၀၀ စီ ဒုတိယအကြိမ် ထပ်မံ တိုးမြှင့်မည်ဖြစ်ကြောင်း စစ်ကောင်စီက ကြေညာခဲ့သည်။
စစ်ကောင်စီက ယမန်နေ့ည ထိုသို့ ကြေညာပြီးနောက်ပိုင်း စျေးကွက်တွင် လှုပ်ခတ်မှုများဖြစ်လာပြီး ရွှေစျေးနှင့် ဒေါ်လာစျေးများ မြင့်တက်လာကြောင်း စျေးကွက်အတွင်းမှ စုံစမ်းသိရှိရသည်။
“အရွက်က ပေါက်စျေးက တစ်ဒေါ်လာ ၅၀၀၀ ။ တကယ်အဝယ်ဆိုရင်တော့ တစ် ဒေါ်လာ ၅၁၀၀ လောက်ပေးရမယ်။ အဝယ်တွေ အရမ်းတက်နေတယ်” ဟု ရန်ကုန်အခြေစိုက် နိုင်ငံခြားငွေလဲဒိုင်တစ်ဦးက ရှင်းပြသည်။
အလားတူ ရွှေစျေးကွက်တွင်လည်း အခေါက်ရွှေတစ်ကျပ်သား ငွေကျပ် ၆၂ သိန်းကျော်တွင် စျေးပေါက်နေကြောင်း၊ စျေးကွက်တွင် အဝယ်များပြားနေကြောင်း ၊ ကမ္ဘာ့ရွှေစျေးမှာ ကျဆင်းနေသော်လည်း မြန်မာ့ရွှေစျေးမှာ လစာတိုးသည့်ဂယက်ကြောင့် စျေးနှုန်းမြင့်တက်လျက်ရှိကြောင်း သိရှိရသည်။
