ချောင်းဦးမြို့တွင်းမှ မိုင်းရှင်းရန် ထွက်လာသော စစ်သားများကို မိုင်းဆွဲတိုက်ခိုက်မှု စစ်တပ်ဘက်မှ ၂ ဦးသေဆုံးပြီး စစ်သား အလောင်းများကို ထွေ/အုပ်ရုံးသို့ သယ်ဆောင်သွား
စစ်ကိုင်းတိုင်း၊ ချောင်းဦးမြို့တွင်းမှ မိုင်းရှင်းရန် ထွက်လာသော အကြမ်းဖက် စစ်သားများကို မိုင်းဆွဲ တိုက်ခိုက်ရာ စစ်တပ်ဘက်မှ ၂ ဦးသေဆုံးပြီး စစ်သားအလောင်းများကို ထွေ/အုပ်ရုံးသို့ သယ်ဆောင်သွားကြောင်း BLDF အညာမိုင်းတပ်ဖွဲ့မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။
ယနေ့ ဒီဇင်ဘာလ ၁၇ ရက်နေ့ ည ၇ နာရီခန့်တွင် မုံရွာ- မန္တလေးလမ်းပိုင်းတွင် မိုင်းရှင်းရန် ချောင်းဦးမြို့တွင်းမှ ထွက်လာသော အကြမ်းဖက် စစ်ကောင်စီ တပ်သားများကို တော်လှန်ရေး တပ်ဖွဲ့များက ပဒေသာမိုင်း ၂ လုံးဖြင့် ဖောက်ခွဲ တိုက်ခိုက်ခဲ့ရာ စစ်သား ၂ ဦးပွဲချင်းပြီး သေဆုံးပြီး ထိခိုက်ဒဏ်ရာရရှိသူများလည်းရှိကြောင်းသိရသည်။
မိုင်းဆွဲ တိုက်ခိုက်မှုကြောင့် သေဆုံးသွားသော စစ်သား မသာ အလောင်များနှင့် ထိခိုက် ဒဏ်ရာရရှိသော စစ်သားများကို ၎င်းတို့ တပ်စွဲထားသော ချောင်းဦးမြို့နယ် အထွေထွေအုပ်ချုပ်ရေးမှူးရုံးထဲသို့ ကားဖြင့် ပြန်လည် သယ်ဆောင်သွားကြောင်း သိရှိရသည်။
“ချောင်းဦးမြို့ထဲက မုံရွာ-ချောင်းဦးလမ်းမပေါ်မှာ မိုင်းဆွဲ တိုက်ခိုက်ခဲ့တာပါ။ အင်အားက ၇ ကောင်လောက်ရှိပါတယ်။ နေ ရာ ခွဲပြီး ကောက်ကြတာ သေဆုံးဒဏ်ရာရတဲ့သူတွေကိုတော့ ချောင်းဦး အထွေထွေ အုပ်ချုပ်ရေးမှူး ရုံးထဲသယ်သွားပါတယ်။ ရမ်းပစ်တာတော့ရှိတယ်။ သိပ်တော့မကြာလိုက်ဘူး။ သေတာပဲ အတည်ပြုနိုင်တယ်။ ဒဏ်ရာရတဲ့သူတွေကတော့ မသိရသေးဘူး” ဟု BLDF အညာမိုင်းတပ်ဖွဲ့မှ တာဝန်ရှိသူ တစ်ဦးက ပြောဆိုသည်။
အဆိုပါ တိုက်ခိုက်မှုကို ချောင်းဦးမြို့နယ် ပြည်သူ့ကာကွယ်ရေးတပ်ဖွဲ ဗမာလွတ်မြောက်ရေး ဒီမိုက ရက်တစ်တပ်ဦး BLDF တပ်ခွဲ အညာမိုင်း တပ်ဖွဲ့မှ ရဲဘော်များက လုပ်ဆောင်ခဲ့ခြင်းဖြစ်ပြီး အကြမ်း ဖက်စစ်သားများက လက်နက်ငယ်များဖြင့် ရမ်းသမ်းပစ်ခတ်ခဲ့သော်လည်း ပြည်သူ့ ကာကွယ်ရေး တပ်ဖွဲ့ဝင်များ အထိအခိုက်မရှိ ပြန်လည် ဆုတ်ခွာနိုင်ခဲ့ကြောင်း သိရသည်။
