ဘောလခဲမြို့မရဲစခန်းမှ ရဲ ၂ ဦးလက်နက်ခဲယမ်းများယူဆောင်ပြီး အလင်းဝင်
ကရင်နီပြည်၊ ဘောလခဲမြို့မရဲစခန်း ရဲစခန်းမှ ရဲတပ်ကြပ်ကြီး ၁ ဦးနှင့် ရဲတပ်ကြပ်တစ်ဦးတို့သည် လက်နက်ခဲယမ်းများယူဆောင်ပြီး အလင်းဝင်ခဲ့ကြောင်း ဘောလခဲပြည်သူ့ကာကွယ်ရေးတပ်ဖွဲ့ – BPDF တပ်ဖွဲ့မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောကြားသည်။
ဒီဇင်ဘာလ ၁၈ ရက်နေ့က ဘောလခဲမြို့မရဲစခန်းမှ ရဲတပ်ကြပ်ကြီးတစ်ဦး AK-M22 အမျိုးအစား သေနတ် ၁ လက်၊ ကျည်ဘောက် ၃ ဘောက် ၊ ၇ ဒသမ ၆၂ ကျည်ဆံ အတောင့် ၆၀ ဖြင့် လည်း ကောင်း၊ ရဲတပ်ကြပ်တစ်ဦးသည် G3 ကျည်ဘောက် ၄ ဘောက်၊ G3 ကျည်ဆံ (၇ ဒသမ ၆၂ ကျည်) အတောင့် ၄၀၀ ဖြင့်လည်းကောင်း အလင်းဝင်ခဲ့ခြင်းဖြစ်ကြောင်း သိရသည်။
“ဆုငွေကိုတော့ အလင်းဝင်သူရဲ့ လက်နက်ခဲယမ်းအမျိုးအစား အလိုက် ထိုက်သင့်တဲ့ ခံစားခွင့် ဆုငွေ ကြေးတွေကို ပေးအပ်ချီးမြှင့်ခဲ့တာရှိပါတယ်။ လွတ်မြောက်နယ်မြေကိုတော့ အလင်းဝင်လာကို လုံခြုံ စိတ်ချရဖို့အတွက် ဆင့်ကဲဆင့်ကဲ တာဝန်ယူချိတ်ဆက်ပို့ဆောင်ပေးရပါတယ်” ဟု ဘောလခဲပြည်သူ့ ကာကွယ်ရေးတပ်ဖွဲ့ – BPDF တပ်ဖွဲ့မှ တာဝန်ရှိသူက ရန်ကုန်ခေတ်သစ်သတင်းဌာနထံသို့ ပြောကြားသည်။
လက်နက်ခဲယ်းများနှင့်အတူ အလင်းဝင်ရောက်ခဲ့သည့် ရဲ ၂ ဦးကို ဘောလခဲပြည်သူ့ကာကွယ်ရေး တပ်ဖွဲ့ (BPDF) က လုံခြုံစိတ်ချရသော လွတ်မြောက်နယ်မြေတစ်ခုသို့ ပို့ဆောင်ထားပြီးဖြစ်ကြောင်း သိရသည်။
အကြမ်းဖက်စစ်ကောင်စီကို စွန့်လွှတ်ကာ CDM ပြုလုပ် အလင်းဝင်လိုသော စစ်သား၊ ရဲတပ်သားများ အနေဖြင့် ဘောလခဲပြည်သူ့ကာကွယ်ရေးတပ်ဖွဲ့ (BPDF) ထံ ဆက်သွယ်စုံစမ်းနိုင်ပြီး နွေးထွေးစွာကြို ဆို လက်ခံသွားမည်ဖြစ်ကြောင်း အသိပေးထားသည်။
