ကံမတွင် လူငယ်များကို ပေါ်တာဆွဲဖမ်းဆီးပြီး စစ်တပ်ထံ ရောင်းစားနေသည့် ညောင်ပင်ကွင်းရွာ အုပ်ချုပ်ရေးမှူး စိန်ဝင်းမောင် ပစ်ခတ်ခံရပြီး သေဆုံး၊ စစ်သားများ လိုက်ပါလာသည့် ကား ၁ စီးကိုလည်း တိုက်ခိုက်မှု ၃ ဦးသေဆုံး
ရန်ကုန်၊ ဒီဇင်ဘာ ၃၀
မကွေးတိုင်း၊ ကံမမြို့နယ်တွင် လူငယ်များကို ပေါ်တာဆွဲ ဖမ်းဆီးပြီး အကြမ်းဖက် စစ်တပ်ထံ ရောင်းစားနေသည့် ညောင်ပင်ကွင်းကျေးရွာ အုပ်ချုပ်ရေးမှူး စိန်ဝင်းမောင်ကို ပစ်ခတ် တိုက်ခိုက်ရာ ပွဲချင်းပြီး သေဆုံးခဲ့ကြောင်း သရက်ခရိုင် အမှတ် ၄ တပ်ရင်းမှ သတင်း နှင့်ပြန်ကြားရေးတာဝန်ခံ ကိုမြတ်က ရန်ကုန်ခေတ်သစ်သတင်းဌာနထံသို့ ပြောဆိုသည်။
ဒီဇင်ဘာလ ၂၇ ရက်နေ့ ည ၇ နာရီ ၄၀ မိနစ်ခန့်တွင် ကံမြို့နယ်အတွင်းရှိ လူငယ်များကို စစ်တပ်နှင့် ပူးပေါင်းကာ ပေါ်တာဆွဲဖမ်းဆီးပြီး စစ်မှုထမ်း လူစားမပေးနိုင်သည့် ကျေးရွာများထံမှ ငွေကျပ် သိန်း ၁၀၀ ယူဆောင်ကာ စစ်မှုထမ်း လူစားထိုး ရောင်းစားနေသည့် ညောင်ပင်ကွင်းကျေးရွာ အုပ်ချုပ်ရေးမှူး စိန်ဝင်းမောင်ကို ပစ်ခတ် တိုက်ခိုက်ရာ ပွဲချင်းပြီး သေဆုံးခဲ့ကြောင်း သိရသည်။
“သူက စစ်တပ်နဲ့ ပူးပေါင်းပြီးတော့ ပေါ်တာလိုက်ဆွဲတယ်။ သူက ပွဲစားလို့ ဖြစ်နေတာပေါ့။ ကံမမြို့နယ်ထဲက ကျေးရွာတွေမှာ စစ်ကောင်စီက စစ်မှုထမ်းဖို့အတွက် လူပေးဖို့တောင်းတာတွေရှိတယ်။ အဲလိုအချိန်မှာ လူမပေးနိုင်တဲ့ ရွာတွေက စန်းဝင်းမောင်အုပ်ကြီးဆီမှာ သိန်း ၁၀၀ နဲ့လူဝယ်ရ တာပေါ့။ တကယ်က သူက ကံမမြို့နယ်စစ်ကောင်စီနဲ့ ပေါင်းပြီးလုပ်စားနေတာ ပြီးရင်သူတို့ကအချိုးကျ ခွဲဝေယူကြတာ နောက်ထပ်ကြားသိရတာတစ်ခုက ကံမမြို့နယ်အပြင် ပန်းတောင်းမြို့နယ်ကပါ သူ့ဆီက လူစားထိုးဝယ်ရတာတွေရှိတယ်လို့ သိရတယ်” သရက်ခရိုင်အမှတ် ၄ တပ်ရင်း သတင်း နှင့်ပြန်ကြားရေး တာဝန်ခံ ကိုမြတ်က ပြောဆိုသည်။
အဆိုပါ တိုက်ခိုက်မှုကို ပြည်သူ့ကာကွယ်ရေး တပ်မတော် အမှတ်-၁ စစ်ဒေသ မကွေးတိုင်း သရက်ခရိုင်အမှတ်-၄ တပ်ရင်း တပ်ခွဲ ၂ ရဲဘော်များက လုပ်ဆောင်ခဲ့ခြင်းဖြစ်ကြောင်း သိရသည်။
ထို့ပြင် ကံမမြို့နယ်၊ ကျောက်မဲကျေးရွာနှင့် ဖရုံလှကျေးရွာ အကြားတွင် အကြမ်းဖက်စစ်သားများ လိုက်ပါလာသော အိမ်စီးကား ၁ စီးကို မိုင်းဆွဲ ပစ်ခတ်တိုက်ခိုက်ခဲ့ရာ စစ်သား ၃ ဦးသေဆုံးခဲ့ကြောင်း သရက်ခရိုင် အမှတ် ၄ တပ်ရင်း သတင်းနှင့်ပြန်ကြားရေးတာဝန်ခံ ကိုမြတ်က ဆက်လက်ပြောဆိုသည်။
ဒီဇင်ဘာလ ၂၉ ရက်နေ့ နံနက် ၆ နာရီ ၃၀ မိနစ်ခန့်တွင် ကံမမြို့မှ မုံရွာ -ပုသိမ် လမ်းပိုင်းဘက်သို့ ကံပြား – ပြကြီးလမ်း အတိုင်း မောင်းနှင်လာသော အကြမ်းဖက်စစ်ကောင်စီတပ်သား ၁၅ ဦးခန့်လိုက်ပါလာ သည့် အဖြူရောင် Light Truck ကားကို ကျောက်မဲကျေးရွာနှင့် ဖရုံလှကျေးရွာ အကြား အရောက်တွင် မိုင်းဆွဲ ပစ် ခတ် တိုက်ခိုက်ခဲ့ရာ စစ်သား ၃ ဦး သေဆုံးပြီး ၅ ဦးထိခိုက်ဒဏ်ရာရရှိခဲ့ကြောင်း၊ ထိခိုက်ဒဏ်ရာရရှိသည့် စစ်သားများကို ဥသျှစ်ပင်မြို့ရှိ စစ်ဆေးရုံသို့ သယ်ဆောင်ကာ ဆေးကုသနေကြောင်း သိရ သည်။
“မိုင်းဆွဲတယ်။ လက်နက်ငယ်နဲ့ဝိုင်းပစ်တယ်။ ၅ မိနစ် ၁၀ မိနစ်လောက်ပဲကြာခဲ့တယ်။ သူတို့ဘက် ပြန်ပစ်ခတ်နိုင်တာမျိုးမရှိဘူး။ ကျနော်တို့ဘက်က ပစ်တယ်။ ပြန်ဆုတ်လာတယ်။ သေဆုံးတဲ့သူတွေ ကိုတော့ ကံမပြန်သယ်တယ်လို့ ကြားတယ်။ ဒဏ်ရာရတဲ့သူတွေကိုတော့ သူတို့ဦးတည်နေတဲ့ ပုသိမ်-မုံရွာ လမ်းအတိုင်းတက်ပြီးတော့ ဥသျှစ်ပင်စစ်ဆေးရုံကို ပို့ဆောင်ကုသထားတယ်လို့ သတင်းရထားတယ်၊ အဲဒီဆေးရုံတင်ထားတဲ့အထဲက ၃ ယောက်ကလည်း ဒဏ်ရာအပြင်းအထန်ရထားလို့ သေနိုင်တယ်လို့ သိရတယ်” ဟု သရက်ခရိုင်အမှတ် ၄ တပ်ရင်း သတင်းနှင့်ပြန်ကြားရေး တာဝန်ခံ ကိုမြတ်က ပြောဆိုသည်။
အဆိုပါ တိုက်ခိုက်မှုကို ပြည်သူ့ကာကွယ်ရေးတပ်မတော် အမှတ်-၁ စစ်ဒေသ မကွေးတိုင်း သရက် ခရိုင် အမှတ် -၄ တပ်ရင်း တပ်ခွဲ ၂ မိုင်းတပ်စိတ်မှ ရဲဘော်များက လုပ်ဆောင်ခဲ့ခြင်းဖြစ်ပြီး ပြည်သူ့ ကာကွယ်ရေးတပ်ဖွဲ့ဝင်များ အထိအခိုက်မရှိ ပြန်လည် ဆုတ်ခွာနိုင်ခဲ့ကြောင်း သိရသည်။
“ထပ်ဖြည့်ပြောချင်တာ ပြည်သူတွေထက် စစ်ကောင်စီထောက်တိုင်တွေပေါ့။ ကံမြို့နယ်၊ မင်းတုန်း မြို့နယ်၊ သရက်မြို့နယ်ထဲမှာ ရှိတဲ့ စစ်ကောင်စီခန့် အုပ်ချုပ်ရေးမှူးတွေကို ပြောချင်တာ။ လက်ရှိ စစ်ကောင်စီက စစ်ရှုံးနေတယ်။ စစ်ရှုံးနေလို့ စစ်မှုထမ်းဖို့အတွက် ဒေသခံပြည်သူတွေကို မတရားဖမ်း ဆီးပြီးတော့ သူတို့တပ်အင်အားကို ဖြည့်နေရတယ်။ စစ်ပွဲတွေမှာ ကျဆုံးနေတာဟာ သေချာတယ်။ သူတို့ဘက်ကို ရပ်တည်နေတယ်ဆိုရင် အခုလိုမျိုး အသက်အန္တရာယ်တွေရှိမယ်။ ကျနော်တို့ ရှင်းလင်း ရတာမျိုးတွေရှိမယ်။ အဲဒါကြောင့် စစ်ကောင်စီနဲ့မပူးပေါင်းဖို့ ၊ စစ်ကောင်စီလက်အောက်ကနေ ရုန်း ထွက်ဖို့ အဓိက သူတို့ကို ပြောချင်ပါတယ်” ဟု သရက်ခရိုင် အမှတ်-၄ တပ်ရင်း သတင်းနှင့်ပြန်ကြား ရေးတာဝန်ခံ ကိုမြတ်က ဆက်လက် ပြောဆိုသည်။
