ဖလမ်းမြို့သိမ်းတိုက်ပွဲတွင် ပိတ်မိနေချိန် ကယ်ထုတ်ပေးရန် စစ်သားများက အကူအညီတောင်းသော်လည်း လေယာဉ် အဆုံးရှုံး မခံနိုင်၍ ကယ်ဆယ်ရန် စစ်ကောင်စီက ငြင်းဆန်
ချင်းပြည်နယ်၊ ဖလမ်းမြို့သိမ်း တိုက်ပွဲတွင် ပိတ်မိနေသော စစ်သားများက လေယာဉ်ဖြင့် ကယ်ထုတ်ရန် စစ်ကောင်စီထံ အကူအညီ တောင်းခံခဲ့သော်လည်း လေယာဉ် အဆုံးအရှုံး မခံနိုင်၍ ကယ်မထုတ်နိုင်ဟု ပြန်လည် ပြောဆိုခဲ့ကြောင်း ချင်းညီနောင် အဖွဲ့က ဖမ်းဆီးရမိသော စစ်သုံ့ပန်းက ဝန်ခံ ပြောဆိုလိုက်သည်။
အဆိုပါ ပြောကြားချက်သည် ယနေ့ ဇန်နဝါရီလ ၃၁ ရက်နေ့တွင် ဖလမ်းမြို့သိမ်း စစ်ဆင်ရေးအတွင်း ချင်းညီနောင်မှ ဖမ်းဆီးရမိသော စစ်သုံ့ပန်းများ မေးမြန်းချက် အပိုင်း -၁ အဖြစ် ထုတ်ပြန်သည့် ဗီဒီယိုတွင် စစ်သုံ့ပန်း တပ်သား ကျော်ဇော်လွင် နှင့် တပ်ကြပ် အောင်ဇော်ဦး က ဝန်ခံပြောဆိုခဲ့ခြင်းဖြစ်သည်။
ဖလမ်းမြို့နယ်သိမ်းတိုက်ပွဲတွင် ပိတ်မိနေသော စစ်သားများနှင့် စစ်မှုထမ်း ၂၄ ဦးသည် ၎င်းတို့ကို လေယာဉ်ဖြင့် ကယ်ထုတ်ပေးရန် စစ်ကောင်စီကို ပြောဆိုခဲ့သော်လည်း လေယာဉ် ၁ စီးနှင့် စစ်သား ၂၄ ဦး မလဲနိုင်ကြောင်း ပြန်လည် ပြောဆိုခဲ့သည်ဟု သိရသည်။
“လေယာဉ်နဲ့ စစ်ကူက လေယာဉ်ပစ်ကူခေါ်တာ လေယာဉ်က ထပ်မလာတော့ဘူး။ ကျွန်တော်တို့ဆို လေယာဉ်တောင်းတယ်။ ၂၄ ယောက်တည်းက လေယာဉ်တောင်းတာ ကျွန်တော်တို့ကို ၁၀ လုံးညွန့်က ပေးထားပြီး အဲဒီ ၁၀ လုံးညွန့်ကို ရောက်ပြီဆိုရင် လေယာဉ်လာခေါ်မယ်ဆိုပြီး သူတို့ ကိုယ်တိုင်က ကတိပေးထားတာ အဲဒီကတိပေးထားတာတဲ့ဟာကို သူတို့ကိုယ်တိုင်က ကတိဖျက်တာ အဲဒီဟာကို စိတ်နာနေကြတာ ဒီက အဖွဲ့တွေက လေယာဉ် တစ်စီးနဲ့ မင်းတို့ လူ ၂၄ ယောက်နဲ့ မလဲနိုင်ဘူးဆိုတဲ့ စကားကို တအားစိတ်နာသွားတာ ကျွန်တော်တို့တွေ တချို့တွေဆို စစ်မှုထမ်းတွေ ပါတယ်။ ကျွန်တော်တို့ လူဟောင်းတွေတောင် စိတ်နာနေတာဆိုတော့ စစ်မှုထမ်း တွေဆို ပြောမနေနဲ့တော့။ ဒီမှာ လူဟောင်းဆို အများဆုံးပါမှ ၄ ၊ ၅ ယောက်ထဲ ပါတာပါ။ ကျန်တာ စစ်မှုထမ်း တွေချည်းပဲ” ဟု စစ်သုံ့ပန်း တပ်သား ကျော်ဇော်လွင်က ပြောဆိုသည်။
အကြမ်းဖက် စစ်ကောင်စီက လေယာဉ် အဆုံးအရှုံးမခံနိုင်ကြောင်း ပြောဆိုချက်ကို စစ်သုံ့ပန်းများက စိတ်နာနေပြီး စစ်ကောင်စီ အမြစ်ပြတ်သည့်အထိ ပြန်လည် တိုက်ခိုက်သွားမည်ဟုဆို စစ်သုံ့ပန်း တပ်ကြပ် အောင်ဇော်ဦး က ထပ်မံ ပြောကြားသည်။
“ကျွန်တော်တို့ကတော့ ဒီက လွတ်သွားရင်လည်း ကလေးမြို့ကို မပြန်တော့ဘူး ။ ဒီအထဲမှာပဲ ပူးပေါင်းတော့မယ်။ မလုပ်ချင်တော့ဘူး စိတ်နာတယ်။ စားနပ်ရိက္ခာပေးပါဆိုတာ မင်းတို့အတွက်နဲ့ လေယာဉ်အဆုံးရှုံးမခံနိုင်ဘူးတဲ့ ။ ငါ့လေယာဉ်တစ်ခုခုဖြစ်တာနဲ့ မင်းတို့ဖြစ်တာ ဘာမှမဖြစ်ဘူးတဲ့ ငါလေယာဉ် တစ်ခုခုအဖြစ်မခံနိုင်ဘူးတဲ့ ။ ဘာမှ မလုပ်ပေးနိုင်ဘူးတဲ့ အဲဒါဆို ဘာလုပ်တော့မှာလဲ ကျွန်တော်တို့။ ဘာမှလုပ်စရာမရှိတော့ဘူး သူတို့ကို ပြန်တိုက်ဖို့ပဲ ရှိတော့တယ်။ ကျွန်တော်တို့ မကယ်နိုင်ဘူးတဲ့ ။ ငါ့လေယာဉ်တစ်ခုခုဖြစ်မှာ လေယာဉ် အဆုံးရှုံးမခံနိုင်ဘူးတဲ့” ဟု စစ်သုံ့ပန်း တပ်ကြပ် အောင်ဇော်ဦး က ပြောဆိုသည်။
ဖလမ်းမြို့သိမ်း တိုက်ပွဲအတွင်း ပိတ်မိနေသော စစ်သားများတွင် ထိခိုက် ဒဏ်ရာရရှိသူ ၂၀ ကျော်ပါဝင်ပြီး အကြမ်းဖက် စစ်ကောင်စီက လာရောက် ကယ်တင်ခြင်းမရှိခြင်းကြောင့် ဒဏ်ရာ အခြေအနေ မခံနိုင်၍ တောင်ပေါ်မှ ပြုတ်ကျပြီး သေဆုံးသူများလည်းရှိကြောင်း၊ ထိခိုက်ဒဏ်ရာ မရရှိသော ပိတ်မိနေသော စစ်သားများသည် တောတောင်များအတွင်း ထွက်ပြေးစဉ် အစားရေစား ငတ်ပြတ်ပြီး တော်လှန်ရေး တပ်ဖွဲ့များနှင့် တွေ့ဆုံကာ ဖမ်းဆီးနိုင်ခဲ့ခြင်းဖြစ်ကြောင်း သိရသည်။
