သာယာဝတီ၊ အသရော်ရွာမှ မပိုးအိနှင့် မနွေးနွေးမြင့်ခိုင် တို့ကို စစ်မှုထမ်း မဲပေါက်သည်ဟုဆိုကာ ကျေးရွာ အုပ်ချုပ်ရေးအဖွဲ့က ငွေကျပ် ၂၅ သိန်းစီ ခြိမ်းခြောက် တောင်း၍ ပေးလိုက်ရ
ရန်ကုန်၊ ဖေဖော်ဝါရီ ၁၅
ပဲခူးတိုင်း၊ သာယာဝတီမြို့နယ်၊ အသရော်ရွာမှ မပိုးအိနှင့် မနွေးနွေးမြင့်ခိုင် တို့ကို စစ်မှုထမ်းရန် မဲပေါက်သည်ဟုဆိုကာ ကျေး ရွာ အုပ်ချုပ်ရေးအဖွဲ့က ငွေကျပ် ၂၅ သိန်းစီ ခြိမ်းခြောက် တောင်းခံခဲ့ကြောင်း ငွေတောင်းခံရသူများအမျိုးသမီးမိသားစုများ၏ မိတ်ဆွေများက ရန်ကုန်ခေတ်သစ် သတင်းဌာနထံသို့ ပြောဆိုသည်။
ယမန်နေ့ ဖေဖော်ဝါရီလ ၁၄ ရက်နေ့ သာယာဝတီမြို့နယ်၊ အသရော်အုပ်စုအတွင်းရှိ ကျေးရွာများမှ အမျိုးသမီးများ စစ်မှုထမ်းရမည်ဆိုကာ ကျေးရွာအုပ်စု အုပ်ချုပ်ရေးမှူး မြင့်သိန်း နှင့် ရာအိမ်မှူး တင်ထူးတို့က ဦးဆောင်၍ မဲနှိုက်ရွေးချယ်မှု လုပ်ဆောင်ခဲ့ကြောင်း ၊ ယင်းနောက် အဆိုပါ မဲနှိုက်ရွေးချယ်မှုအတွင်း အသရော်ရွာမှ မပိုးအိနှင့် မနွေးနွေးမြင့်ခိုင် တို့ကို စစ်မှုထမ်းရန် မဲပေါက်သည်ဟုဆိုကာ အုပ်ချုပ်ရေးမှူးနှင့် ရာအိမ်မှူးများက ငွေညှစ်တောင်းခံခဲ့ကြောင်း၊ စစ်မှုမထမ်းလိုပါက ကျေးရွာအုပ်ချုပ်ရေးအဖွဲ့ကို တစ်ဦးလျှင် ငွေကျပ် ၂၅ သိန်းဆီ ပေးဆောင်ရမည်ဟု ခြိမ်းခြောက် တောင်းခံခဲ့သောကြောင့် မိသားစုဝင်များက ငွေကြေးပေးဆောင်ခဲ့ရကြောင်း သိရှိရသည်။
“အသရော်အုပ်စုအတွင်းက အမျိုးသမီးတွေကို စစ်မှုထမ်းရမယ်ဆိုပြီး အမည်စာရင်း ကောက်ယူမှုတာတွေကို အုပ်ချုပ်ရေးမှူး မြင့်သိန်း နှင့် ရာအိမ်မှူး တင်ထူး တို့က ဦးဆောင်လုပ်ဆောင်နေတာ အဲတာကို တစ်ရွာကို ၂ ဦး စစ်မှုထမ်းရမယ်ဆိုပြီး မဲနှိုက်ရွေးချယ်ခဲ့တာ အသရော်ရွာသူ မပိုးအိ နဲ့ မနွေးနွေးမြင့်ခိုင် တို့ မဲပေါက်တယ်ဆိုပြီး အုပ်ကြီးနဲ့ ရာအိမ်မှူးက ခြိမ်းခြောက် ငွေညှစ်တာ စစ်မှုထမ်း အမည်စာရင်း ပယ်ဖျက်ပေးမယ်ဆိုပြီး တစ်ဦးဆီကို ငွေကျပ် ၂၅ သိန်း ခြိမ်းခြောက် တောင်းတာ မိသားစုတွေကလည်း ကြောက်လန့်ပြီး ပေးလိုက်ရတယ်လို့ သိရတယ်” ဟု ဒေသပြည်သူများ တစ်ဦးက ပြောဆိုသည်။
သာယာဝတီမြို့နယ်အတွင်းရှိ ကျန်ရှိနေသော ကျေးရွာများတွင် အုပ်ချုပ်ရေးမှူးနှင့် ရာအိမ်မှူးများက အမျိုးသမီး စစ်မှုထမ်း စာရင်းများ လိုက်လံ ကောက်ခံမှုများ စတင်လုပ်ဆောင်နေကြောင်း သိရသည်။
အကြမ်းဖက် စစ်ကောင်စီ၏ ပြောခွင့်ရ ဇော်မင်းထွန်းကလည်း ဖေဖော်ဝါရီလ ၇ ရက်နေ့တွင် ၎င်းတို့၏ ဝါဒဖြန့် သတင်းစာနှင့် မီဒီယာများမှတစ်ဆင့် ပြည်သူ့စစ်မှုထမ်း နည်းဥပဒေအရ အမျိုးသမီးများသည်လည်း စစ်မှုထမ်းရန် အကျုံးဝင်နေပြီး အမျိုးသမီးများကို ဆင့်ခေါ်ရန် အစီအစဉ် မရှိသေးသော်လည်း ခြိမ်းခြောက်မှုများရှိနေကြောင်း ဝန်ခံပြောဆိုထားသည်။
ဓာတ်ပုံ- သာယာ၀တီတွင် စစ်တပ်နှင့်ရဲများက စစ်မှုထမ်းဥပဒေ အသိပညာပေး စာရွက်များ လိုက်လံဝေငှနေစဉ်။ (ပုံအဟောင်းဖြစ်ပါသည်။)
