မြောက်ဦးနှင့် ကျောက်ဖြူတို့ကို စစ်ကောင်စီက အကြမ်းဖက် တိုက်ခိုက်မှု သံဃာ ၁ ပါး အပါအဝင် ပြည်သူ ၃ ဦးသေဆုံးပြီး ၇ ဦး ဒဏ်ရာရ ၊ ငလျင်ဒဏ်သင့်နေချိန် စစ်တပ်က တစ်နိုင်ငံလုံးကို လေယာဉ်ဖြင့် ဆက်လက်ဗုံးကျဲ
ရန်ကုန်| ဧပြီ ၁
မြန်မာနိုင်ငံ အလယ်ပိုင်းတွင် ငလျင်ဒဏ် သင့်နေအချိန် မြောက်ဦးနှင့် ကျောက်ဖြူမြို့နယ်တို့ကို စစ်ကောင်စီက လေယာဉ်ဖြင့် ဗုံးကျဲခြင်း၊ လက်နက်ကြီးဖြင့် ပစ်ခတ်ခြင်းတို့ဖြင့် တိုက်ခိုက်ခဲ့ရာ သံဃာ ၁ ပါး အပါအဝင် ပြည်သူ ၃ ဦးသေဆုံးပြီး ၇ ဦး ဒဏ်ရာရရှိကြောင်း သိရှိရသည်။
ယမန်နေ့ မတ်လ ၃၁ ရက်နေ့ ည ၈ နာရီကျော်အချိန် စစ်ကောင်စီက လေကြောင်းဖြင့် မြောက်ဦးမြို့နယ်ကို ဗုံးကျဲတိုက်ခိုက်ခဲ့၍ အသက် ၆၆ နှစ်အရွယ် ဦးအောင်ကျော်ဇံ သေဆုံးသွားကြောင်း ဒေသခံများက ပြောသည်။
“မနေ့က ည ၈ နာရီကျော်လောက်မှာ Cluster (ပဒေသာဗုံး) တစ်လုံးနဲ့ အလယ်ဈေးရပ်ကွက်ကို ဗုံးကြဲခဲ့တယ်။ အသက် ၆၀ ကျော်အရွယ် အမျိုးသားတစ်ဦး သေဆုံးသွားပါတယ်။ ငလျင်ကြောင့် တစ်နိုင်ငံလုံး ပူဆွေးဒုက္ခရောက်နေတဲ့အချိန်မှာ အရပ်သားတွေကို ဗုံးကြဲတိုက်ခိုက်နေတယ်။ တော်တော်လေးကို ရက်စက်တာဗျာ” ဟု မြောက်ဦးဒေသပြည်သူတစ်ဦးက ပြောသည်။
ထို့အတူ မတ်လ ၃၁ ရက်နေ့ နံနက် ၉ နာရီကျော်အချိန် ကျောက်ဖြူမြို့နယ် ဇင်ချောင်းရွာကြီးကိုလည်း စစ်တပ် ၏ ရေတပ်သင်္ဘောက လက်နက်ကြီးဖြင့် ပစ်ခတ်၍ သံဃာတော် ၁ ပါး အပါအဝင် အရပ်သား ၂ ဦးသေဆုံးပြီး ဆရာတော်ကြီးတစ်ပါးနှင့် ကိုရင်အပါအဝင် အရပ်သား ၇ ဦး ဒဏ်ရာ ပြင်းထန်စွာ ရရှိသွားကြောင်း၊ မင်းရပ်တိုက် နယ် ဝါးနက်ချွိန်ကျေးရွာအနီး ပင်လယ်ပြင်တွင် ရပ်နားထားသော စစ်ကောင်စီ နေဗီက လက် နက်ကြီး ၃ လုံးဖြင့် ဇင်ချောင်းကျေးရွာကို ပစ်ခတ် တိုက်ခိုက်ခဲ့ကြောင်း သိရှိရသည်။
စစ်တပ်၏ တိုက်ခိုက်မှုကြောင့် ပျံလွန်တော်မူသွားသော သံဃာမှာ ကျောက်ဖြူမြို့နယ် ဇင်ချောင်း ကုန်ဘွေရွာက အသက် ၃၂ နှစ်အရွယ် အသျှင်အာဒိစ္စ ဖြစ်ပြီး သေဆုံးသွားသော အရပ်သားက အသက် ၃၀ အရွယ် ဦးဘဂျမ်းဖြစ်ပြီး ကုန်ဘွေကျေးရွာကပဲ ဖြစ်သည်။
ဒဏ်ရာရသူများမှာ အသက် ၇၄ နှစ်အရွယ် ဆရာတော်ကြီး အသျှင်ဇနိတ၊ အသက် ၁၂ နှစ်အရွယ် ကိုရင် သျှင်ဓမ္မာနန္ဒ၊ အသက် ၄၅ နှစ်အရွယ် ဦးမောင်ထွန်းမြ၊ အသက် ၅၀ အရွယ် ဒေါ်သန်းသန်းအေးတို့ဖြစ်ပြီး ဇင်ချောင်းကုန်ဘွေရွာက ဖြစ်သည်။
ယင်းအပြင် အုန်းတောကျေးရွာမှ ဇင်ချောင်းတွင် စစ်ရှောင်နေသော အသက် ၃၁ နှစ်အရွယ် ဒေါ်ဖြိုးဖြိုးဝင်း၊ ကင်းပင်လယ်ရွာက စစ်ရှောင်လာသော အသက် ၅၅ နှစ်အရွယ် ဒေါ်သိန်းဟန်နု၊ ဆင်တက်မော်ရွာက စစ်ရှောင်လာသော အသက် ၁၆ နှစ်အရွယ် မခင်မြအေး တို့မှာလည်း ဒဏ်ရာ ရရှိသွားကြသည်။
စစ်ကောင်စီ၏ နေဗီက လက်နက်ကြီး ပစ်ခတ်မှုကြောင့် ကျောက်ဖြူ ဇင်ချောင်းက ဘုန်းတော်ကြီးကျောင်း၊ နေအိမ်အချို့လည်း ပျက်စီးသွားကြောင်း သိရသည်။
မတ်လ ၂၈ ရက်နေ့က လှုပ်ခတ်ခဲ့သော ငလျင်ကြောင့် မန္တလေး၊ စစ်ကိုင်း၊ နေပြည်တော်၊ ရှမ်း၊ မကွေး၊ ပဲခူးတိုင်းတို့တွင် ထိခိုက်သေဆုံး၊ ဒဏ်ရာရ၊ အိုးအိမ်များပျက်စီးပြီး တစ်နိုင်ငံလုံး ဝမ်းနည်းပူဆွေးသောက ရောက်နေချိန်တွင် စစ်ကောင်စီက ရခိုင်ပြည်ကို ဆက်တိုက် ဗုံးကျဲတိုက်ခိုက်နေသည်။
မတ်လ ၃၀ ရက် ညနေ ၇ နာရီကျော်အချိန်ကလည်း ကျောက်ဖြူမြို့နယ် ကုလဘာကျေးရွာကို ဓညဝတီရေတပ်က ဒရုန်းတစ်စီးဖြင့် ဗုံးကြဲတိုက်ခဲ့ကြောင်း၊ ကုလဘာကျေးရွာ အနောက်ဘက်ခြမ်းကို ဗုံးသီးများ ကျရောက်ပေါက်ကွဲခဲ့ပြီး နေအိမ်အချို့နှင့် ဆိုင်ခန်းတစ်ခု ပျက်စီးသွားသည်။
မတ်လ ၂၈ ရက်နေ့ ငလျင်လှုပ်ခတ်ချိန်နှင့် လှုပ်ခတ်ပြီးနောက် တိုင်းနှင့်ပြည်နယ်မှ နေရာ ၅ ခုကိုလည်း စစ်ကောင်စီက လေကြောင်းဗုံးကျဲတိုက်ခိုက်ခဲ့သည်။
နောင်ချိုမြို့နယ် ကံကြီးကျေးရွာ၊ နောင်လင်ကျေးရွာ၊ ကရင်ပြည်နယ် KNU တပ်မဟာ ၇ နယ်မြေရှိ လေးဝါးကျေးရွာ၊ စစ်ကိုင်းတိုင်း ချောင်းဦးမြို့နယ် နွယ်ခွေးကျေးရွာနှင့် စစ်တောင်းမြစ် အရှေ့ဘက်ကမ်း ဖြူးမြို့နယ် ကျေး ရွာများကို စစ်ကောင်စီက ဗုံးကျဲတိုက်ခိုက်ခဲ့ကြောင်း၊ အဆိုပါ ဗုံးကြဲတိုက်ခိုက်မှုအားလုံးသည် ငလျင်လှုပ်ခတ် ချိန်နှင့် လှုပ်ခတ်ပြီး နာရီပိုင်းအကြာတွင် စစ်ကောင်စီက အရပ်သားပြည်သူများရှိရာ နေရာများသို့ အကြမ်း ဖက် ဗုံးကျဲတိုက်ခိုက်ခဲ့ခြင်းဖြစ်ကြောင်း သိရှိရသည်။
Photo- APM။
(Western News သည် ရန်ကုန်ခေတ်သစ်၏ မဟာမိတ်ဖြစ်သည်။)
