နောင်ချိုတွင် မတ်လ ၂၁ ရက်မှ ဧပြီလ ၁ ရက်နေ့အထိ စစ်တပ်၏ လေကြောင်း တိုက်ခိုက်မှုကြောင့် ပြည်သူ ၅ ဦးသေဆုံးပြီး ၁ဝ ဦး ဒဏ်ရာရ
ရှမ်းပြည်နယ်၊ နောင်ချိုမြို့နယ်တွင် မတ်လ ၂၁ ရက် မှ ဧပြီလ ၁ ရက်နေ့အထိ အကြမ်းဖက် စစ်တပ်၏ လေကြောင်း တိုက်ခိုက်မှုကြောင့် ပြည်သူ ၅ ဦးသေဆုံးပြီး ၁၀ ဦး ဒဏ်ရာရကာ နေအိမ်ပေါင်းများစွာ ပျက်စီးခဲ့ကြောင်း ရှမ်းလူ့အခွင့်အရေးမဏ္ဍိုင်က ပြောဆိုသည်။
မတ်လ ၂၁ ရက်နေ့ နံနက်ပိုင်းတွင် အကြမ်းဖက် စစ်တပ်က Y-12 ဂျက်ဖိုက်တာဖြင့် လောက်ဖန်း၊ အုမ္မတီး၊ အုမ္မခါးနှင့် ကျောက်ကြမ်းကျေးရွာအနီးတစ်ဝိုက်ကို ဗုံးကျဲ တိုက်ခိုက်ခဲ့ရာ နေအိမ် အများအပြားပျက်စီးခဲ့ပြီး မတ်လ ၂၂ ရက်နေ့တွင်လည်း စစ်တပ်က ဒရုန်းဖြင့် အုမ္မခါးကျေးရွာကို ဗုံး ၄ လုံးကျဲချခဲ့ရာ ပြည်သူ တစ်ဦး ဒဏ်ရာရခဲ့ပြီး နေအိမ်တစ်လုံးပျက်စီးခဲ့ကြောင်း သိရသည်။
ထို့ပြင် မတ်လ ၂၆ ရက်နေ့ ညနေ ၆ နာရီတွင် အကြမ်းဖက် စစ်တပ်၏ ဂျက်ဖိုက်တာများသည် အုမ္မခါးကျေးရွာ၊ သုံးဆယ်နှင့် ရွှေညောင် ပင်ကျေးရွာတို့ကို ဗုံး ၅ လုံးကျဲချခဲ့ရာ ဗုံးနှစ်လုံးသည် သုံးဆယ်ကျေးရွာသို့ ကျရောက် ပေါက်ကွဲခဲ့ပြီး ပြည်သူ ၄ ဦး သေဆုံးခဲ့ကာ နေအိမ် ၄လုံး ပျက်စီးခဲ့ကြောင်း ၊ ဗုံး ၂လုံးသည် အုမ္မခါးကျေးရွာသို့ ကျရောက်ပေါက်ကွဲခဲ့ပြီး ပြည်သူ ၄ ဦး ဒဏ်ရာရရှိကာ နေအိမ် ၄ လုံးပျက်စီးခဲ့ကြောင်း သိရှိရသည်။
မတ်လ ၂၈ ရက်နေ့ မွန်းလွဲ ၁ နာရီ ၀န်းကျင်ခန့်တွင် မန္တလေးမြို့အနီးကို ဗဟိုပြုလှုပ်ခတ်သော ၇.၇ ပြင်းအားရှိသော ငလျင် နှင့် မိနစ်ပိုင်းသာခြား၍ စစ်ကောင်စီ လေတပ်က နောင်လင်ကျေးရွာ နှင့်ကံကြီးကျေးရွာတို့ကို ဗုံး ၈ လုံးကျဲချခဲ့ရာ နေအိမ် ၁၀ လုံးပျက်စီးခဲ့ကြောင်း၊ မတ်လ ၃၀ ရက် မွန်းလွဲ ၁၂ နာရီဝန်းကျင်အချိန်တွင် အကြမ်းဖက် စစ်ကောင်စီ လေတပ်က ပေါင် ၂၅၀ ဗုံးနှစ်လုံးကို အုမ္မသီး ကျေးရွာ သို့ကျဲချခဲ့ရာ နေအိမ် အများအပြားပျက်စီးခဲ့ကြာင်း သိရသည်။
ထို့ပြင် မတ်လ ၃၁ ရက်နေ့ နံနက် ၁၀ နာရီခွဲဝန်းကျင်တွင် ကျောက်ကြမ်းကျေးရွာကို ဒရုန်းဖြင့် ဗုံးများ ကျဲချခဲ့ရာ နေအိမ် ၂ လုံး၊ ဧပြီလ ၁ ရက်နေ့ နံနက် ၁၁ နာရီဝန်းကျင်ခန့်တွင် သုံးဆယ်ကျေးရွာနှင့် အုမ္မသီး ကျေးရွာကို ဒရုန်းဖြင့် ဗုံးကျဲချခဲ့ရာ ပြည်သူ ၁ ဦးသေဆုံးပြီး နေအိမ်တစ်လုံး ပျက်စီးခဲ့ကြောင်း သိရှိရသည်။
ဧပြီလ ၁ ရက်နေ့ နံနက် ၁၁ နာရီ ၂၄ မိနစ်ခန့်တွင်လည်း အကြမ်းဖက် စစ်ကောင်စီတပ်က တောင်းခမ်းကျေးရွာအနီးရှိ တောင်လှ ကျေးရွာကို လေကြောင်းတိုက်ခိုက်မှုများပြုလုပ်ခဲ့ရာ ပြည်သူ ၅ ဦးဒဏ်ရာရရှိခဲ့ပြီး နေအိမ် ၂ လုံးပျက်စီးကာ တစ်ချိန် တည်းမှာပင် ရေမောင်းတန်းကျေးရွာနှင့် လွယ်ခွင်ကျေးရွာတို့ကို လေကြောင်းဖြင့် ဗုံးကျဲခဲ့ရာ နေအိမ်အများအပြားပျက်စီးခဲ့ကြောင်း ရှမ်းလူ့အခွင့်အရေးမဏ္ဍိုင်က ပြောဆိုသည်။
အကြမ်းဖက် စစ်ကောင် စီ၏ တိုက်ခိုက်မှု အများစုသည် မတ်လ ၂၈ ရက်နေ့က ဖြစ်ပွားခဲ့သော ငလျင်ကပ်ဘေးအပြီးတွင်ဖြစ်ပြီး စစ်ကောင်စီ အစိုးရသည် ယခုကဲ့သို့နိုင်ငံအကျပ်အတည်းကာလတွင် အသက်ကယ်ရန်ထက် နည်းအမျိုးမျိုးဖြင့် အာဏာကို ဆက်လက် ဆုပ်ကိုင်ထားရန်သာ ဦးစားပေးနေသည်မှာ ထင်ရှားနေကြောင်း ရှမ်းလူ့အခွင့်အရေးမဏ္ဍိုင်က ပြောဆိုထားသည်။
