မန္တလေးအိုးဘိုအကျဉ်းထောင်တွင် ငလျင်ကြောင့် အဆောင်တချို့ပြိုကျပြီး နိုင်ငံရေးအကျဉ်းသူ ၆ ဦး သေဆုံး
မန္တလေး အိုးဘိုအကျဉ်းထောင်တွင် ငလျင်ဒဏ်ကြောင့် အမျိုးသမီး အဆောင် ၁ နှင့် အဆောင် ၂ တို့ ပြိုကျခဲ့သည့် အတွက် မတရားဖမ်းဆီးအကျဉ်းချခံထားရသည့် နိုင်ငံရေးအကျဉ်းသူ ၆ ဦး အသက်ဆုံးရှုံးခဲ့ရသည်ကို အတည်ပြုနိုင် ခဲ့ကြောင်း မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက် (PPNM) မှ ဦးဆောင်ကော် မတီဝင် ကိုသိုက်ထွန်းဦးက ရန်ကုန်ခေတ်သစ်သတင်းဌာနသို့ ပြောကြားသည်။
မတ်လ ၂၈ ရက်နေ့ လှုပ်ခတ်ခဲ့သော ငလျင်ကြောင့် အဆောင်ပြိုကာ သေဆုံးခဲ့ရသည့် နိုင်ငံရေးအကျဉ်းသူများမှာ မမိုးသူဇာခိုင်၊ ဒေါ်လဲ့လဲ့စိုး၊ ဒေါ်ခင်အုန်းရွှေ၊ မကေကေဝင်း၊ မပပဝင်းနှင့် မဖူးဝေဝေတို့ ဖြစ်ကြောင်း သိရှိရသည်။
“အကျဉ်းထောင်တွေဘက်က တရားဝင် သတင်းထုတ်ပြန်ပြီး ပြောဆိုနေတာမျိုးကို မတွေ့ရသေးဘူး။ သေဆုံးမှု အရေအတွက်တွေက ပိုပြီးမှ များပြားနိုင်တယ်။ အထူးသဖြင့်တော့ အကျဉ်းထောင်တွင်းက သေဆုံးမှုတွေကို ပြည် သူ တွေ ကြားသိခြင်းအားဖြင့် ထောင်တွေကို ပိုပြီး အာရုံစိုက်လာမှာ ထောင်တွင်းက အခြေအနေတွေ ထောင် တွင်းက စီမံခန့်ခွဲမှု ညံ့ဖျင်းမှုတွေကို ပေါ်လွင်သွားမှာစိုးတဲ့အတွက် သတင်းဖုံးကွယ်ထားတယ်လို့ သုံးသပ်ပါတယ်ဗျ” ဟု မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) မှ ဦးဆောင်ကော်မတီဝင် ကိုသိုက်ထွန်းဦးက ရန်ကုန်ခေတ်သစ်သတင်းဌာနသို့ ပြောကြားသည်။
ငလျင်ဒဏ်ကြောင့် မန္တလေး အကျဉ်းထောင်အတွင်းရှိ အချုပ်ဆောင်များ၊ အကျဉ်းဆောင်များတွင် အက်ကွဲ တိမ်း စောင်း မှုများ ဖြစ်ပေါ်ခဲ့သော်လည်းလက်ရှိအချိန်အထိ အကျဉ်းသားများ၊ အချုပ်သားများကို ချုပ်နှောင်ရာတွင် ယင်းအဆောက်အအုံများကို ဆက်လက် အသုံးပြုနေသဖြင့် စိုးရိမ်ရသည့် အခြေအနေများဖြစ်ပေါ်နေကြောင်း နိုင်ငံရေး အကျဉ်းသားမိသားစုဝင်များက သုံးသပ်ပြောဆိုကြသည်။
