စလင်းမြို့နယ်အတွင်း ထိုးစစ်ဆင်လာသော စစ်တပ် စစ်ကြောင်းမှ ထွက်ပြေးလာသည့် စစ်မှုထမ်း တပ်သားသစ် ၁ ဦးကို အရှင်ဖမ်းမိ
မကွေးတိုင်း၊ စလင်းမြို့နယ်အတွင်း ထိုးစစ်ဆင်လာသော အကြမ်းဖက် စစ်တပ် စစ်ကြောင်းမှ ထွက်ပြေးလာသည့် စစ်မှုထမ်း တပ်သားသစ် ၁ ဦးကို အရှင် ဖမ်းမိခဲ့ကြောင်း Peacock Brother Urban Guerrilla အဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဧပြီလ ၅ ရက်နေ့တွင် စလင်းမြို့နယ်၊ ကံပြားရွာမှ မိုင် ၂၀ ဘက်သို့ ထိုးစစ်ဆင်လာသော အကြမ်းဖက် စစ်တပ် စစ်ကြောင်းတွင် လိုက်ပါလာသည့် တပ်မ ၁၀၁ လက်အောက်ခံ ပခုက္ကူတပ်မ ၂၃၅ တပ်ရင်းမှ စစ်မှုထမ်း တပ်သားသစ် ကိုချစ်ဖွေးကို တော်လှန်ရေး တပ်ဖွဲ့များက အရှင်ဖမ်းဆီးနိုင်ခဲ့ခြင်းဖြစ်ကြောင်း သိရသည်။
ဖမ်းဆီးရမိသော စစ်မှုထမ်း တပ်သားသစ် ကိုချစ်ဖွေးသည် စစ်မှုထမ်း အပတ်စဉ် ၆ သင်တန်းဆင်းဖြစ်ပြီး အသက် ၂၁ အရွယ်သာရှိသေးကြောင်း၊ လက်ရှိချိန်တွင် ၎င်းကို ဒေါင်းညီနောင် မြို့ပြ ပြောက်ကျားအဖွဲ့က စစ်ဆေးမှုများ ဆက်လက် လုပ်ဆောင်နေကြောင်း သိရှိရသည်။
“လက်နက်တွေတော့ ယူဆောင်လာတာမရှိပါဘူး။ လက်နက်မဲ့ ထွက်ပြေးနေတုန်း ကျနော်တို့ ဒေါင်းညီနောင် မြို့ပြ ပြောက်ကျားအဖွဲ့ရဲ့ ကင်းပုန်းက အရှင်ဖမ်းဆီးရရှိခဲ့တာပါ။ လက်ရှိချိန်ထိတွေ စစ်ဆေးမှုတွေ ဆက်လက် လုပ်ဆောင်နေပါတယ်” ဟု Peacock Brother Urban Guerrilla အဖွဲ့မှ တာဝန်ရှိသူ တစ်ဦးက ပြောဆိုသည်။
စစ်မှုထမ်း တပ်သားသစ် ကိုချစ်ဖွေးသည် ၂၀၂၄ ခုနှစ် စက်တင်ဘာလ ၈ ရက်နေ့တွင် အကြမ်းဖက် စစ်ကောင်စီ တပ်သားများက ပေါ်တာဆွဲ ဖမ်းဆီးခဲ့ခြင်းဖြစ်ပြီး စစ်သင်တန်းတက်ရောက်ပြီးနောက် စလင်းမြို့နယ်အတွင်း ရောက်ရှိလာခြင်းဖြစ်ကြောင်း၊ လက်ရှိချိန်တွင် ဒေါင်းညီနောင် မြို့ပြပြောက်ကျားအဖွဲ့က ကောင်းမွန်စွာ ထိန်းသိမ်းထားရှိကြောင်း သိရသည်။
