မန္တလေးတိုင်း၊ မတ္တရာမြို့နယ်ရှိ ကျေးရွာများကို အကြမ်းဖက် စစ်တပ်က လေယာဉ်၊ လက်နက်ကြီးများဖြင့် ဆက်တိုက် ဗုံးကျဲ တိုက်ခိုက်နေပြီး တိုက်ပွဲများလည်း ဖြစ်ပွားနေကြောင်း Voice Of Mandalay အဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
မေလ ၂၃ ရက်နေ့ နံနက် ၇ နာရီ ၂၂ မိနစ်ခန့်မှ စတင်ပြီး မတ္တရာမြို့နယ် အရှေ့ခြမ်းကို တံတားဦးလေတပ်မှ တက်လာသည့် အကြမ်းဖက် စစ်တပ်၏ ဂျက်ဖိုက်တာ ၁ စီးဖြင့် တိုက်ပွဲ ဖြစ်ပွားလျက်ရှိသော နေရာများကို စက်လက်ဖြင့်၂ ကြိမ် ပစ်ခတ်ခဲ့ကြောင်း သိရသည်။
ထို့ပြင် နံနက် ၉ နာရီ ၅၆ မိနစ်ခန့်တွင် ဂျက်ဖိုက်တာ ၁ စီးဖြင့် လေကြောင်း တိုက်ခိုက်မှု ၂ ကြိမ် ပြုလုပ်ခဲ့ကြောင်း၊ မွန်းလွဲ ၁၂ နာရီကျော်ခန့်တွင် လေကြောင်း တိုက်ခိုက်မှု ၂ ကြိမ် ပြုလုပ်ခဲ့ကြောင်း၊ မွန်းလွဲ ၃ နာရီ ၄၅ မိနစ်ခန့်တွင်လည်း တိုက်ပွဲဖြစ်ပွားရာ နေရာများကို အကမ်းဖက် စစ်တပ်က ဂျက်ဖိုက်တာဖြင့် ဗုံးကျဲ တိုက်ခိုက်ပြီး စက်လက်များဖြင့် ထပ်မံ ပစ်ခတ်ခဲ့ကြောင်း သိရှိရသည်။
အကြမ်းဖက် စစ်တပ်သည် တောင်ကန်ကင်းရွာဘက် အနီးတစ်ဝိုက်ကိုလည်း မွန်းလွဲ ၁ နာရီခန့်တွင် လက်နက်ကြီးများဖြင့် ရမ်းသမ်းပစ်ခတ်ခဲ့ကြောင်း သိရသည်။
“ပြည်သူတွေ ထိခိုက်မှုရှိပါတယ်။ အရေအတွက်ကိုတော့ အတည်မပြုနိုင်သေးဘူး။ တိုက်ပွဲတွေကလည်း ဖြစ်နေတော့ ပြည်သူတွေလည်း ထွက်ပြေး တိမ်းရှောင်နေရတယ်” ဟု Voice Of Mandalay အဖွဲ့မှ တာဝန်ရှိသူ တစ်ဦးက ပြောဆိုသည်။
