ရန်ကုန်၊ ဇွန် ၂၈
လူထုခေါင်းဆောင် ဒေါ်အောင်ဆန်းစုကြည်ကို နေပြည်တော်စစ်ဆင်ရေးအထူးအဖွဲ့ရုံးစိုက်ရာနေရာတွင် လုံခြုံ ရေး တင်းကျပ်စွာဖြင့် ဖမ်းဆီးချုပ်နှောင်ထား၊ သွားနှင့် နှလုံးရောဂါ ဆိုင်ရာ ဆက်စပ် ဝေဒနာများခံစားနေရသော် လည်း ဆေးကုသခွင့် အပြည့်အ၀ မပေးဘဲ ရည်ရွယ်ချက်ရှိရှိ ညှဉ်းပန်းနှိပ်စက်နေကြောင်း Myanmar Prison Witness မှ ဒုတိယပြန်ကြားရေးတာဝန်ခံ မဆူးငယ်က ရန်ကုန်ခေတ်သစ်သတင်းဌာနသို့ ပြောကြားသည်။
ဒေါ်အောင်ဆန်းစုကြည်ကို နေပြည်တော် အချုပ်ထောင်နှင့် ၁၄ မိုင်အကွာတွင် ရှိသည့် စစ်ဆင်ရေးအထူးအဖွဲ့ရုံးစိုက်ရာနေရာတွင် လုံခြုံရေးတင်းကျပ်စွာဖြင့် မတရားဖမ်းဆီးချုပ်နှောင်ထားကြောင်း၊ လူထုခေါင်းဆောင်မှာ သွားနှင့်ပတ်သက်သည့် ရောဂါနှင့် နှလုံးနှင့် ပတ်သက်သည့် ရောဂါဝေဒနာများ ခံစားနေရပြီး ဆေးဝါးကုသခွင့် အပြည့်အဝ မရှိကြောင်း သိရှိရသည်။
Myanmar Prison Witness အဖွဲ့၏ စုံစမ်းအတည်ပြုချက်အရ လူထုခေါင်းဆောင် ဒေါ်အောင်ဆန်းစုကြည်သည် လက်ရှိအချိန်တွင် အခြေခံအကျဉ်းသားအခွင့်အရေးဖြစ်သည့် ထောင်ဝင်စာဧည့်တွေ့ခွင့်မရရှိဘဲ အကျဉ်းသားအခွင့်အရေးများပါ ချိုးဖောက်ခံနေရကြောင်း၊ ဒေါ်အောင်ဆန်းစုကြည်၏ ချုပ်နှောင်ထားသည့်နေရာကို လက်ရှိအချိန်တွင် ဒုတိယဗိုလ်ချုပ်ကြီး အဆင့်ရှိသူက တာဝန်ယူဦးစီး ကွပ်ကဲနေကြောင်း သိရှိရသည်။
“ကျမတို့ အဖွဲ့အစည်းအနေနဲ့ သိရှိထားသလောက်ကတော့ အန်တီဒေါ်အောင်ဆန်းစုကြည်က လက်ရှိမှာ သွားနဲ့ ပတ်သက်တဲ့ ရောဂါဝေဒနာနဲ့ နှလုံးနဲ့ ပတ်သက်တဲ့ ရောဂါဝေဒနာတွေကို ခံစားနေရပါတယ်။ နောက်ပြီး အသက် ကြီးလာတဲ့အတွက်ကြောင့် စိုးရိမ်နေရတဲ့ အခြေအနေ၊ နောက်ပြီး လတ်တလောမှာလည်း အသက်အရွယ်ကြီးတဲ့ ပါတီထိပ်ပိုင်းခေါင်းဆောင်တွေ သေဆုံးနေတာဖြစ်တဲ့အတွက် အန်တီဒေါ်အောင်ဆန်းစုကြည်အတွက် ကျွန်မတို့အဖွဲ့အနေနဲ့ များစွာ စိုးရိမ်မိပါတယ်” ဟု Myanmar Prison Witness မှ ဒုတိယပြန်ကြားရေးတာဝန်ခံ မဆူးငယ်က ရန်ကုန်ခေတ်သစ်သတင်းဌာနသို့ ပြောကြားသည်။
ဒေါ်အောင်ဆန်းစုကြည်၏ ကျန်းမာရေးနှင့် ပတ်သက်၍ ဆေးဝါးကုသမှု အချို့ ရရှိထားသော်လည်း အပြည့်အဝ ဆေးဝါးကုသခွင့် မရရှိကြောင်း ၊ ထောင်တွင်းရှိ ဆရာဝန်ကသာ တာဝန်အရ ဆေးမြီးတိုများနှင့် ကုသပေးသည့် ပုံစံမျိုးဖြစ်နေကြောင်း ၎င်းက ရှင်းပြသည်။
“သွားနဲ့ ပတ်သက်တဲ့ရောဂါရော နှလုံးနဲ့ ပတ်သက်တဲ့ရောဂါရော ခံစားနေရတာ အတော်ကြာခဲ့ပါပြီ။ ဆေးမြီးတိုနဲ့ပဲ ကုသနေတဲ့အတွက်ကြောင့် ဘယ်လိုမှ သက်သာလာမှာ မဟုတ်ပါဘူး။ အခုအချိန်အထိလည်း ရောဂါဝေဒနာကို ခံစားနေရဆဲ ဖြစ်ပါတယ်” ဟု မဆူးငယ်က ဆက်လက်ပြောဆိုသည်။
ထို့အပြင် အကျဉ်းသားတစ်ဦး၏ အခွင့်အရေးဖြစ်သည့် မိသားစုနှင့်ထောင်ဝင်စာဧည့်တွေ့ခွင့်ကို မရရှိအောင် ပိတ် ပင်ခံထားရသည့် တစ်ဦးတည်းသော နိုင်ငံရေးအကျဉ်းသားဖြစ်ပြီး ထောင်ဝင်စာဧည့်တွေ့ခွင့်သည် အကျဉ်း သားတိုင်း ရရှိရမည့်အခွင့်အရေးဖြစ်သည်ဟု အကျဉ်းထောင်လက်စွဲ ဥပဒေတွင် တရားဝင်ပြဌာန်းထားသော်လည်း ယခုကဲ့သို့ မိသားစုဝင်များနှင့်ထောင်ဝင်စာဧည့်တွေ့ခွင့်မပေးခြင်း၊ လုံလောက်သည့် ကျန်းမာရေးစောင့်ရှောက်မှုမပေးခြင်းသည် ရည်ရည်ချက်ရှိရှိဖြင့် စိတ်ပိုင်းဆိုင်ရာ ညှဉ်းပန်းနှိပ်စက်နေခြင်းဖြစ်ကြောင်း Myanmar Prison Witness က တရားဝင်သတင်းထုတ်ပြန်ထားသည်။
ထိုသို့ ထောင်တွင်းရှိ လူထုခေါင်းဆောင်၏ အခြေအနေများနှင့် ပတ်သက်၍ Myanmar Prison Witness – MPW အဖွဲ့နှင့် ယုံကြည်စိတ်ချရသည့် သတင်းရင်းမြစ်၊ မိတ်ဖက်အဖွဲ့အစည်းများနှင့် ဆွေးနွေးတိုင်ပင်၍ သတင်းထုတ်ပြန်ခဲ့ခြင်းဖြစ်ကြောင်း သိရှိရသည်။
“မိတ်ဖက်အဖွဲ့အစည်းတွေရဲ့ နာမည်ကိုတော့ လုံခြုံရေးအရ ထည့်သုံးပိုင်ခွင့်မရရှိသေးတဲ့အတွက်ကြောင့် ကျွန်မတို့ အဖွဲ့အစည်းအနေနဲ့ပဲ တာဝန်ယူထုတ်ပြန်ထားရခြင်းဖြစ်ပါတယ်” ဟု မဆူးငယ်က ရှင်းပြသည်။
မြန်မာ့အကျဉ်းထောင်သက်သေ (MPW)အဖွဲ့အနေဖြင့် ဒေါ်အောင်ဆန်းစုကြည်ကို အာဏာသိမ်းစစ်ကောင်စီက မတရားချုပ်နှောင်ထားမှု၊ အကျဉ်းသားအခွင့်အရေးပယ်ဖျက်မှုနှင့် စိတ်ပိုင်းဆိုင်ရာညှဉ်းပန်းမှုအပေါ် အပြည်ပြည်ဆိုင်ရာ အသိုင်းအဝိုင်းက ပြင်းပြင်းထန်ထန် တုံ့ပြန်မှုများ ပြုလုပ်ရန် တောင်းဆိုကြောင်းလည်း ထုတ်ပြန်ချက်တွင် ပါရှိသည်။
ဒေါ်အောင်ဆန်းစုကြည်ကို မတရားဖမ်းဆီး အကျဉ်းချမှုနှင့် နောက်ဆက်တွဲ အတွက် တာဝန်ခံရမည့်သူများတွင် အကြမ်းဖက် မင်းအောင်လှိုင်၊ စိုးဝင်း တို့အပါအဝင် ပြည်ထဲရေးဝန်ကြီးဟောင်း စိုးထွဋ်(လက်ရှိ အနားပေးခံထားရ)၊ပြည်ထဲရေးဝန်ကြီးဟောင်း ရာပြည့်(လက်ရှိ နယ်စပ်ရေးရာဝန်ကြီး)၊ပြည်ထဲ ရေးဝန်ကြီး ထွန်းထွန်းနောင်(လက်ရှိ)၊ကစထ(၆)မှူးများဖြစ်သည့်ဒုတိယဗိုလ် ချုပ် ကြီး သန်းလှိုင်၊ ဒုတိယဗိုလ်ချုပ်ကြီး သန်းထွန်းဦး၊ဒုတိယဗိုလ်ချုပ်ကြီး တေဇာကျော်၊ဒုတိယဗိုလ်ချုပ်ကြီး ဖုန်းမြတ်၊ အကျဉ်းဦးစီးဌာန ညွန်ကြားရေးမှူးချုပ်ဟောင်း ဇော်ဝင်း၊ အကျဉ်းဦးစီးဌာန ညွန်ကြားရေးမှူးချုပ် မျိုးဆွေ (လက်ရှ)၊ နေပြည် တော်အချုပ်ထောင်ထောင်ပိုင် – ဦးသိန်းဇော်မောင်၊ဒုထောင် ပိုင် – ဦးကျော်သူရ၊ ဦးစီးအရာရှိ – ဦးအောင်သန်းမြင့်၊လက်ထောက်ကြီးကြပ်ရေးမှူး – ကျော်မင်းထိုက်၊ ဦးစီးအရာရှိ – သိင်္ဂီမြင့်၊ လက်ထောက်ကြီးကြပ်ရေးမှူး – မေသူအောင် တို့ ပါဝင်ကြောင်း သိရှိရသည်။
အလားတူ လူထုခေါင်းဆောင် ဒေါ်အောင်ဆန်းစုကြည်ကို တရားစွဲ အကျဉ်းချရာတွင် အကြမ်းဖက်စစ်ကောင်စီ၏ အလိုကျ ဇဗ္ဗူသီရိမြို့နယ်တရားသူ ကြီး ဦးမောင်မောင်လွင်၊ ဒဏ္ခိဏခရိုင်တရားသူကြီး ဦးရဲလွင်၊ မန္တလေးတိုင်းတရားလွှတ်တော်တရားသူကြီး ဦးမြင့်သန်းနှင့် မန္တလေးတိုင်းဒေသကြီးတရားလွှတ် တော် တရားသူကြီးချုပ် ဒေါ်ခင်သင်းဝေတို့မှ တသွေမသိမ်းလိုက်ပါဆောင်ရွက်ခဲ့ကြကြောင်း သိရှိရသည်။
ထို့ပြင် မြန်မာ့အကျဉ်းထောင်သက်သေ(MPW)အဖွဲ့အစည်းအနေဖြင့် ဒေါ်အောင်ဆန်းစုကြည်နှင့် နိုင်ငံရေးအကျဉ်း သားများအား ချက်ချင်းပြန်လွှတ်ရေးနှင့်ပတ်သက်၍ နိုင်ငံတကာခေါင်းဆောင်များအနေဖြင့် စုပေါင်းတောင်းဆိုချက်ထုတ်ပြန်ပေးရန်၊ မြန်မာနိုင်ငံရှိ အာဏာသိမ်းစစ်တပ်အပေါ် သံတမန်ရေးဖိအားပေးခြင်းအပြင် စစ်ခေါင်းဆောင်များ နိုင်ငံပြင်ပ သွားလာမှုများကို ကန့်သတ်ခြင်းပြုရန်၊ ဒေါ်အောင်ဆန်းစုကြည်ကို လွတ်လပ်သော လူ့အခွင့်အရေးအဖွဲ့များနှင့် ICRC က ချက်ချင်းသွားရောက် စစ်ဆေးခွင့်ရရှိရေးတောင်းဆိုရန်၊ ဒေါ်အောင်ဆန်းစုကြည် တစ်ဦးတည်းချိုးဖောက်ခံထားရသည့် မိသားစုဝင် သို့ သက် ဆိုင်သူများနှင့် ထောင်ဝင်စာဧည့်တွေ့ခွင့်ကို အကျဉ်းသားအခွင့်အရေးအရ အပြည့်အဝပေးရေး အာဏာသိမ်း စစ်ခေါင်းဆောင်များကို ဖိအားပေး ဝောာင်းဆိုရန် စသည့် အချက် ၄ ချက်ကိုလည်း MPW က နိုင်ငံတကာအဖွဲ့အစည်းများနှင့် နိုင်ငံတကာခေါင်း ဆောင်များထံသို့ တောင်းဆိုထားသည်။
ဓာတ်ပုံ- အကြမ်းဖက်စစ်ကောင်စီ၏ တရားရုံးတွင် ယမန်နှစ်များအတွင်း တရားရင်ဆိုင်ခဲ့ရသော ဒေါ်အောင်ဆန်းစုကြည်။
