မန္တလေးတိုင်း၊ စဉ့်ကူးမြို့ပေါ်ရှိ ကြံ့ဖွတ် ပါတီရုံးကို အကြမ်းဖက် စစ်တပ်က လေယာဉ်ဖြင့် ဗုံးကျဲ တိုက်ခိုက်ခဲ့ကြောင်း ပြင်ဦးလွင်ခရိုင် ပကဖ မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဇွန်လ ၂၉ ရက်နေ့ ည ၁၀ နာရီခန့်တွင် စဉ့်ကူးမြို့ပေါ်ရှိ ကြံ့ဖွတ်ပါတီရုံးကို အကြမ်းဖက် စစ်တပ်၏ တံတားဦး လေတပ်မှ တက်လာသည့် MIG 29 ဂျက်ဖိုက်တာ ၁ စီးဖြင့် လေကြောင်း တိုက်ခိုက်မှု ပြုလုပ်ခဲ့ခြင်းဖြစ်ကြောင်း သိရသည်။
အကြမ်းဖက် စစ်တပ်၏ လေကြောင်းတိုက်ခိုက်မှု အတွင်း ကြံ့ဖွတ်ပါတီရုံး အဆောက်အဦး ထိမှန် ပျက်စီးခဲ့ပြီး ပြည်သူများ အထိအခိုက်မရှိကြောင်း သိရှိရသည်။
“စဉ့်ကူးမြို့ပေါ် ကြံ့ဖွတ် ပါတီရုံးကို အကြမ်းဖက် စစ်တပ်ရဲ့ တံတားဦးလေတပ်က တက်လာတဲ့ MIG 29 ဂျက်ဖိုက်တာ ၁ စီးနဲ့ လေကြောင်း တိုက်ခိုက်မှု ပြုလုပ်သွားတာ ကြံ့ဖွတ်ပါတီ ရုံးအဆောက်အဦးတစ်ခု ထိမှန်ပျက်စီးပြီး ပြည်သူ အထိအခိုက်မရှိပါဘူး” ဟု ပြင်ဦးလွင်ခရိုင် ပကဖ မှ တာဝန်ရှိသူ တစ်ဦးက ပြောဆိုသည်။
ပြည်သူများအနေဖြင့် အကြမ်းဖက် စစ်ကောင်စီ တပ်နှင့် ဝေးရာတွင် နေထိုင်ကြရန်နှင့် လေကြောင်းရန် ကာကွယ်နိုင်ရန် အတွက် ဗုံးခိုကျင်းများ တူးဖော်ထားကြရန် ပြင်ဦးလွင်ခရိုင် ပကဖ က အသိပေး နှိုးဆော်ထားသည်။
