ရန်ကုန်၊ ဇူလိုင် ၁၅
ရခိုင်သို့ ရိက္ခာနှင့်ဆေးဝါးများ သိန်းထောင်ပေါင်း များစွာ ရယူ ခွင့်ပြုခဲ့မှု အတွက် အနောက်တောင်တိုင်းစစ်ဌာနချုပ်မှ တိုင်းဦးစီးချုပ် ဗိုလ်မှူးချုပ်ကျော်စိုးလွင်၊ ဗိုလ်မှူးကြီးအောင်ဆန်းလွင် အပါအဝင် အရာရှိကြီးများကို သေဒဏ်၊ တစ်သက် တစ် ကျွန်းထောင်ဒဏ်နှင့်နှစ်ရှည်ထောင်ဒဏ်များချမှတ်လိုက်ကြောင်း သိရှိရသည်။
ဧရာဝတီတိုင်းမှရခိုင်ပြည်နယ်သို့ ရေနံ့သာ စစ်ဆေးရေးဂိတ်မှတဆင့် စက်သုံးဆီ၊ ဆေးဝါး အပါအဝင် ကုန်ပစ္စည်းများ တင်သွင်းခွင့်ကို လာဘ်ငွေယူ၍ ခွင်ပြုခဲ့သော နတခ စစ်ဌာနချုပ်မှ ဦးစီးချုပ် ဗိုလ်မှူချုပ်ကျော်စိုးလွင် အပါအဝင် ၅ ဦးကို ထောင်ဒဏ်များ ချမှတ်ခဲ့ပြီး ဒုဗိုလ်မှူးကြီး ကျော်စွာထွန်းကို သေဒဏ်ချမှတ်ခဲ့ကြောင်း သိရှိရသည်။
၂၀၂၄ ခုနှစ် စက်တင်ဘာလ ၇ ရက်နေ့တွင် စက်သုံးဆီ၊ ဆေးဝါး အပါအဝင် ကုန်ပစ္စည်းများကို ရခိုင်သို့ ပို့ရန် လာဘ်ငွေယူ ခွင့်ပြုခဲ့သော အနောက်တောင်တိုင်းစစ်ဌာနချုပ်မှ တိုင်း ဦးစီးချုပ် ဗိုလ်မှူချုပ်ကျော်စိုးလွင် ၊ စစ်ဦးစီး ဗိုလ်မှူးကြီးအောင်ဆန်းလွင် ၊ ဒုဗိုလ်မှူးကြီး ကျော်စွာထွန်း၊ ဒုဗိုလ်မှူးကြီးမျိုးဇော်အောင် အပါအဝင် အရာရှိ ၆ ဦးကို အကြမ်းဖက် စစ်ကောင်စီက တပ်တွင်း စစ်ဆေးမှုများ လုပ်ဆောင်ခဲ့ခြင်းဖြစ်ကြောင်း သိရသည်။
၁၀ လအကြာ စစ်ခုံရုံးဖြင့် စစ်ဆေးမှုများ ပြုလုပ်ပြီးနောက် နတခတိုင်း ဦးစီးချုပ် ဗိုလ်မှူချုပ်ကျော်စိုးလွင်ကို ထောင်ဒဏ် ၁၀ နှစ်၊ စစ်ဦးစီး ဗိုလ်မှူးကြီးအောင်ဆန်းလွင်ထောင်ဒဏ် နှစ် ၂၀ ၊ ဒုဗိုလ်မှူးကြီးမျိုးဇော်အောင်ကို ထောင်ဒဏ် တစ်သက်တစ်ကျွန်း နှင့် အခြားအရာရှိများလည်း စစ်ကောင်စီ၏ စစ်ခုံရုံးက အပြီးသတ် အမိန့်များ ချမှတ်ခဲ့ပြီး ဒုဗိုလ်မှူးကြီးကျော်စွာထွန်းကို သေဒဏ် ချမှတ်ခဲ့ကြောင်း သိရှိရသည်။
ယင်းသို့ ရခိုင်ပြည်နယ် စက်သုံးဆီ၊ ဆေးဝါး အပါအဝင် ကုန်ပစ္စည်းများ ပို့ဆောင်ခွင့်ပြုရာတွင် လာဘ်ငွေအများဆုံးရယူထားသည့် တိုင်းရဲတပ်ဖွဲ့ တိုင်းဒ/န ခေါင်းဆောင် ချစ်စမ်းမောင် ၊ ခရိုင် ဒ/န ခေါင်း ဆောင် မြင့်အောင် နှင့် မြို့နယ်မှူး ရဲရန်အောင်တို့သည် ပြည်ထဲရေးဝန်ကြီးဌာနကို ငွေလာဘ်ထိုးထားသောကြောင့် ရာထူးတစ်ဆင့်လျှော့ချသည့် ပြစ်ဒဏ်သာ ချမှတ်ခဲ့ကြောင်း သိရသည်။
ထို ရဲအရာရှိ ၃ ဦးကို ရဲမင်းကြီး တင်ဇော်ထွန်းကိုယ်တိုင်က ၎င်း နယ်ပြောင်းရွေ့စရိတ်ရရှိရန် ငွေကျပ် သိန်းရာချီ ရယူ၍ ပြစ်ဒဏ်လျှော့ပေါ့ရန် လုပ်ဆောင်ပေးခဲ့ကြောင်း၊ ထို့ပြင် တိုင်းရဲတပ်ဖွဲ့ရုံး ဦး ၁ တာဝန်ခံ ရဲမှူးအောင်နိုင်မိုးနှင့် တိုင်း ဒန ချစ်စမ်းမောင်တို့သည် မယားညီအကို တော်စပ်ပြီး ဆီကိစ္စအမှုတွင်လည်း ငွေကျပ် သိန်းထောင်ချီဖြင့် လိုက်ခဲ့ပြီး နေရာမပျောက်ရန် ခြေကုတ်ယူထားသော သူဖြစ် ကြောင်း သိရှိရသည်။
ရဲမင်းကြီး အသစ်ဖြစ်သူ ကျော်ထွန်းကိုလည်း ရဲမှူးအောင်နိုင်မိုးက ကြိုးကိုင်ခြယ်လှယ်နေပြီး မူးယစ်ဆေး၊ လိုင်စင်မဲ့ကား၊ လောင်းကစားဝိုင်း အမျိုးမျိုးတို့ကို ရဲတပ်ဖွဲ့တိုင်း/ခရိုင် ဒန ခေါင်းဆောင်များ ၊ စရဖ ဗိုလ်မှူးအောင်မျိုးဟိန်း၊ စရဖ ဗိုလ်ကြီးမျိုးပိုင်၊ စရဖ ဗိုလ်ကြီးဝင်းမင်းသန်း တို့က ဦးဆောင်လုပ်ကိုင်နေသူများဖြစ်ကြောင်း သိရသည်။
” ဒုဗိုလ်မှူးကြီး ကျော်စွာထွန်း ကတော့ သေဒဏ်လို့ သိရတယ်။ နတခ စစ်ဌာနချုပ်မှ ဦးစီးချုပ် ဗိုလ်မှူးချုပ်ကျော်စိုးလွင် အပါအဝင် ကျန်တဲ့ ကောင်တွေကတော့ ထောင်ဒဏ်၊ တစ်သက်တစ်ကျွန်းနဲ့ ရာထူးလျှော့တာတွေ လောက်ပဲ အရေးယူခံရတယ်။ ရခိုင်ကို ကုန်ပစ္စည်းတွေ ပို့တဲ့ အထဲမှာ အများ ဆုံး လာဘ်စားထားတဲ့ ရဲအရာရှိ ခွေး ၃ ကောင်ကတော့ ပြစ်ဒဏ် အနည်းဆုံးပဲ” ဟု နမခ စစ်ဌာချုပ် သတင်းရင်းမြစ်က ပြောဆိုသည်။
ဧရာ၀တီတိုင်း၊ ရေကြည်မြို့နယ်၊ ငါးသိုင်းချောင်းမြို့၊ ပုသိမ်-မုံရွာလမ်းမကြီးနှင့် ဂွ-ငါးသိုင်းချောင်းတွင် ရခိုင်သို့ ပစ္စည်းတင်ပို့ရန် အဓိကဖြတ်သန်းရသော ရေနံ့သာစစ်ဆေးရေးဂိတ်မှာ စစ်တပ်၏ ထိန်းချုပ်မှု အောက်တွင် အပြည့်အ၀ ရှိနေပြီး ယခုအခါ ရခိုင်ဘက်သို့ မည်သည့် ပစ္စည်းမှ လုံး၀ တင်ပို့ခွင့်မပြုဘဲ စစ်ကောင်စီက ပိတ်ဆို့တားမြစ်ထားသည်။
