ရန်ကုန်၊ ဇူလိုင် ၁၇
ရှမ်းပြည်နယ်၊ သီပေါမြို့၊ နောင်ချိုမြို့၊ ကျောက်မဲမြို့များနှင့် မန္တလေးတိုင်း မိုးကုတ်မြို့များကို အကြမ်းဖက် စစ်တပ်က ဇူလိုင်လ ၄ ရက်နေ့မှ ၁၄ ရက်နေ့အထိ လေယာဉ်ဖြင့် ဗုံးကျဲ တိုက်ခိုက်ခြင်းကြောင့် ပြည်သူ ၁၃ ဦးသေဆုံးပြီး ကလေးငယ်များ အပါအဝင် ပြည်သူ ၃၁ ဦး ထိခိုက် ဒဏ်ရာရရှိခဲ့ကြောင်း ရှမ်းလူ့အခွင့်အရေးမဏ္ဍိုင်က ထုတ်ပြန်လိုက်သည်။
ထို့ပြင် လေကြောင်း တိုက်ခိုက်မှုများကြောင့် ဆေးရုံ ၁ ရုံ၊ ကျောင်း ၂ ကျောင်း၊ ဆိုင် ၅ ဆိုင်နှင့် အပန်းဖြေ စခန်း ၁ ခု အပါအဝင် အဆောက်အအုံ ၅၆ လုံးကျော် ထိခိုက်ပျက်စီးခဲ့ကြောင်း သိရသည်။
ဇူလိုင်လ ၁၄ ရက်နေ့ ညနေ ၆ နာရီအချိန်တွင် အကြမ်းဖက် စစ်တပ်က သီပေါမြို့ ၊ တောင်မြို့ရပ်ကွက်ကို လေယာဉ်ဖြင့် ဗုံး ၂ လုံး ကျဲချ တိုက်ခိုက်ခြင်းကြောင့် ပြည်သူ ၂ ဦးသေဆုံးပြီး ၂ ဦး ထိခိုက် ဒဏ်ရာရရှိကာ နေအိမ် ၃ လုံး ၊ ဆိုင် ၅ ဆိုင်နှင့် အပန်းဖြေ စခန်း ၁ ခု ထိခိုက် ပျက်စီးခဲ့ကြောင်း၊ ဇူလိုင်လ ၁၃ ရက်နေ့ ည ၁၀ နာရီခွဲခန့်တွင်လည်း မိုးကုတ်မြို့ ၊ ပန်းမထိပ်ရွာအနီးရှ် ဂေါ်ရခါးကျေးရွာကို အကြမ်းဖက် စစ်တပ်က တိုက်လေယာဉ်ဖြင့် ပေါင် ၅၀၀ ဗုံး ၁ လုံး ကျဲချ တိုက်ခိုက်ခဲ့ခြင်းကြောင့် ကလေးငယ် ၃ ဦးအပါအဝင် အမျိုးသား ၄ ဦး၊ အမျိုးသမီး ၄ ဦး စုစုပေါင်း ၈ ဦး ဒဏ်ရာရကာ နေအိမ် ၇ ဦး ပျက်စီးခဲ့ကြောင်း သိရှိရသည်။
ဇူလိုင်လ ၁၃ ရက်နေ့ နံနက် ၆ နာရီခန့်တွင်လည်း အကြမ်းဖက် စစ်တပ်က ကျောက်မဲမြို့ အနောက်ဘက်ကို ဂျက်ဖိုက်တာဖြင့် ဗုံး ၆ လုံး ကျဲချ တိုက်ခိုက်ခဲ့ရာ ပိန္နဲကုန်း၊ မန်းနားနှင့် ကျောက်တောင်ကျေးရွာ အကြားရှိ အမက ၁၃ မူလတန်းကျောင်း၊ ဝါဆိုဘုန်းကြီးကျောင်းလမ်းတို့ ဗုံးများ ထိမှန်ခဲ့ပြီး အမျိုးသမီး ၁ ဦး ထိခိုက် ဒဏ်ရာရရှိကာ ကျောင်းနှင့် နေအိမ်အချို့ ထိခိုက် ပျက်စီးခဲ့ကြောင်း၊ ဇူလိုင်လ ၁၁ ရက်နေ့ ညနေ ၃ နာရီခန့်တွင်လည်း အကြမ်းဖက် စစ်တပ်က နောင်ချိုမြို့ ဈေးရပ်ကွက်ပေါ်ကို ဂျက်ဖိုက်တာဖြင့် ပေါင် ၂၅၀ ဗုံး ၂ လုံး ကျဲချ တိုက်ခိုက်ခဲ့ပြီး နေအိမ် ၆ လုံး ထိခိုက်ပျက်စီးကာ နောင်ချိုမြို့ အနောက်ဘက် ၅ ကီလိုမီတာအကွာရှိ ကျောက်ကြမ်းကျေးရွာကိုလည်း ပေါင် ၂၅၀ ဗုံး ၂ လုံးကျဲချခဲ့ကြောင်း၊ ဇူလိုင်လ ၁၁ ရက်နေ့ နံနက် ၃ နာရီခန့်တွင်လည်း ကျောက်မဲမြို့ကို ဂျက်ဖိုက်တာဖြင့် ပေါင် ၅၀၀ ဗုံး ၃ လုံး ကျဲချ တိုက်ခိုက်ခဲ့ရာ ပြည်သူ ၁ ဦး သေဆုံးပြီး ၃ ဦး ထိခိုက် ဒဏ်ရာရရှိခဲ့ကြောင်း ရှမ်းလူ့အခွင့်အရေးမဏ္ဍိုင်၏ ထုတ်ပြန်ချက်တွင် ဖော်ပြထားသည်။
ထို့ပြင် ဇူလိုင်လ ၉ ရက်နေ့ ည ၈ နာရီခန့်တွင်လည်း အကြမ်းဖက် စစ်တပ်က မိုးကုတ်မြို့ ပန်းမထိပ်ရွာကို ဂျက်ဖိုက်တာဖြင့် ပေါင် ၅၀၀ ဗုံး ၂ လုံး ကျဲချခဲ့ရာ ကလေး ၃ ဦးအပါအဝင် ပြည်သူ ၅ ဦး သေဆုံးပြီး ၆ ဦး ထိခိုက် ဒဏ်ရာရရှိကာ နေအိမ်အချို့ ထိခိုက်ပျက်စီးခဲ့ကြောင်း၊ ဇူလိုင်လ ၈ ရက်နေ့တွင် နောင်ချိုမြို့ အရှေ့တောင်ဘက် ၃ ကီလိုမီတာ အကွာရှိ ရွှေပြည်ညွန့်ကျေးရွာကိုလည်း ဂျက်ဖိုက်တာဖြင့် ဗုံးကျဲခဲ့ရာ အမျိုးသား ၁ ဦး သေဆုံးခဲ့ကြောင်း၊ ဇူလိုင်လ ၈ ရက်နေ့ နံနက် ၉ နာရီခွဲခန့်တွင်လည်း ကျောက်မဲမြို့ ငြိမ်းချမ်းရေးကုန်းနှင့် ရပ်ကွက် ၁ တို့ကို ဂျက်ဖိုက်တာဖြင့် အကြမ်းဖက် စစ်တပ်က ပေါင် ၅၀၀ ဗုံး ၂ လုံး ကျဲချ တိုက်ခိုက်ခဲ့ပြီး ပြည်သူ ၁ ဦးသေဆုံးကာ ၄ ဦး ဒဏ်ရာရရှိခဲ့ကြောင်း သိရသည်။
အလားတူ မိုးကုတ်မြို့ ခေါင်းဦးဘာ ရပ်ကွက်ကိုလည်း ဇူလိုင်လ ၈ ရက်နေ့ နံနက် ၉ နာရီ ၁၀ မိနစ်ခန့်လည်း အကြမ်းဖက် စစ်တပ်က ပေါင် ၅၀၀ ဗုံး ၂ လုံးကျဲချ ခဲ့ရာ ပြည်သူ ၃ ဦး သေဆုံးပြီး ၅ ဦးဒဏ်ရာ ရရှိကာ နေအိမ် ၁၀ လုံးနှင့် ကိုယ်ပိုင်ကျောင်း တစ်ကျောင်း ထိခိုက်ပျက်စီးခဲ့ကြောင်း၊ ဇူလိုင်လ ၆ ရက်နေ့ ည သန်းခေါင်ဝန်းကျင်တွင်လည်း အကြမ်းဖက် စစ်တပ်က ကျောက်မဲမြို့ ရေဦးရပ်ကွက်ကို ဂျက်ဖိုက်တာဖြင့် ဗုံးကျဲ တိုက်ခိုက်ခဲ့ခြင်းကြောင့် နေအိမ်တချို့ ပျက်စီးခဲ့ကြောင်း သိရှိရသည်။
ထို့ပြင် ဇူလိုင်လ ၄ ရက်နေ့ ည ၁၀ နာရီတွင် အကြမ်းဖက် စစ်တပ်က သီပေါမြို့ မြို့လေးရပ်ကွက်နှင့် တောင်းရပ်ကွက်ကို လေယာဉ်ဖြင့် ဗုံး ၂ လုံးကျဲချ တိုက်ခိုက်ခဲ့ရာ ပြည်သူ့ ဆေးရုံ၊ စိုက်ပျိုးရေးရုံးတို့ အပါအဝင် နေအိမ် ၁၀ လုံးကျော် ထိခိုက်ပျက်စီးခဲ့ကြောင်း ရှမ်းလူ့အခွင့်အရေးမဏ္ဍိုင်ထံမှ သိရသည်။
