ထိုင်းနိုင်ငံ Uthai Thani ခရိုင်တွင် တရားမဝင် ဝင်ရောက်လာသော မြန်မာ ၅၅ ဦးကို ဖမ်းဆီးရရှိကြောင်း ထိုင်းအခြေစိုက် Khaosod သတင်းဌာနက သတင်းဖော်ပြသည်။
ယမန်နေ့ ဩဂုတ်လ ၁၁ ရက်နေ့ Uthai Thani အတွင်းရှိ တောထဲတွင် ရပ်နားထားသော ကား ၃ စီးကို ထိုင်းအာဏာပိုင်များက သွားရောက် စစ်ဆေးရာ ကားအတွင်းနှင့် အနီးအနားတွင် မြန်မာနိုင်ငံသား ၅၅ ဦး ကို တွေ့ရှိရကြောင်း၊ ၎င်းတို့မှာ အထောက် အထား စာရွက်စာတမ်းမပါဘဲ ထိုင်းနိုင်ငံအတွင်းသို့ ဝင်ရောက်လာခြင်းဖြစ်ပြီး အမျိုးသား ၃၆ ဦးနှင့် အမျိုးသမီး ၁၉ ဦးရှိကြောင်း သိရှိရသည်။
အဆိုပါဖြစ်စဉ်တွင် ယာဉ်မောင်းမှာ ထွက်ပြေးလွတ်မြောက်သွားခဲ့ပြီး တရားမဝင် မြန်မာများမှာ ဘန်ကောက်တွင် အလုပ်လုပ်ရန်အတွက် လာရောက်ကြခြင်းဖြစ်ကြောင်း၊ မြန်မာနိုင်ငံသားများမှာ မဲဆောက်မြို့မှတစ်ဆင့် တရားမဝင် ဖြတ်ကျော် ဝင်ရောက်လာကြခြင်းဖြစ်ပြီး အဆိုပါ မြန်မာများမှာ လူကုန်ကူးခံရသူများ ဟုတ်၊ မဟုတ် ထိုင်းအာဏာပိုင်များက စိစစ်လျက်ရှိကြောင်း သိရှိရသည်။
