ကရင်ပြည်နယ်၊ ကော့ကရိတ်မြို့နယ် အာရှလမ်း တတန်ကူးရွာ တိုက်ပွဲအတွင်း အကြမ်းဖက် စစ်တပ်ဘက်မှ ဗိုလ်မှူး ၁ ဦးနှင့် အရာရှိ ၄ ဦး အပါအဝင် ၄၀ ကျော် ထက်မနည်းသေဆုံးခဲ့ကြောင်း ဒေသတွင်း စစ်ရေးသတင်းရင်းမြစ်များက ရန်ကုန်ခေတ်သစ်သတင်းဌာနသို့ ပြောကြားသည်။
ဩဂုတ်လ ၄ ရက်နေ့မှ ၁၇ ရက်နေ့အတွင်း ကော့ကရိတ်မြို့နယ် အာရှလမ်း တတန်ကူးရွာတွင် ဖြစ်ပွားခဲ့သော တိုက်ပွဲများတွင် အကြမ်းဖက် စစ်တပ်ဘက်မှ ဗိုလ်မှူး ၁ ဦးနှင့် အရာရှိ ၄ ဦး အပါအဝင် ၄၀ ကျော် ထက်မနည်းသေဆုံးခဲ့ခြင်းဖြစ်ပြီး ပျောက်ဆုံးသူများလည်း ရှိကြောင်း သိရသည်။
ထိုသို့ တိုက်ပွဲများ အတွင်း စစ်တပ်ဘက်မှ ထိခိုက်သေဆုံးမှု များပြားပြီး စစ်ဆင်ရေး ထိခိုက်ဆုံးရှုံးမှုကြောင့် တပ်မ ၅၅ နောက်တန်း ဗျူဟာ နှင့် ခမရ ၅၄၅ တပ်ရင်းမှ စစ်ဗျူဟာမှူးများ အချင်းချင်း ရန်ဖြစ် ဆဲဆိုနေကြောင်း သိရှိရသည်။
လက်ရှိအချိန်တွင် အကြမ်းဖက် စစ်တပ်ဘက်က ကော့ကရိတ်မြို့နယ် အတွင်းရှိ ကျေးရွာအားလုံးကို KNLA စစ်ရေး မလှုပ်ရှားနိုင်ရေးအတွက် လေကြောင်း တိုက်ခိုက်မှုများ လုပ်ဆောင်နေကြောင်း၊ ယနေ့ ဩဂုတ်လ ၁၇ ရက်နေ့ နံနက် ၈ နာရီ ၃၇ မိနစ်ခန့်တွင်လည်း အကြမ်းဖက် စစ်တပ်၏ ဂျက်ဖိုက်တာ ၁ စီးက ကျုံဒိုး၊ သရက်တော၊ တောင်ကြာအင်း၊ အန်ကောင်ရွာ လမ်းကြောင်းမှ ပျံသန်းလာပြီး ကျိုက်သလိုက်၊ ဘော့ဒိုင်းဘက် နှင့် အံဖလေး တဝိုက်နှင့် အာရှလမ်းရှိ တိုက်ပွဲဖြစ်ပွားနေသော နေရာများကို ဗုံးကျဲ တိုက်ခိုက်သွားကြောင်း သိရသည်။
“ဩဂုတ် ၄ ရက်ကနေ ၁၇ ရက်အတွင်း ကော့ကရိတ် အာရှလမ်း တတန်ကူး ကျေးရွာ တိုက်ပွဲ အတွင်းမှာ စစ်ခွေးတွေဘက်က ဗိုလ်မှူး အပါအပါအဝင် အရာရှိ ၅ ကောင်လောက်သေတယ်။ ပြီးတော့ စစ်ခွေး စစ်ကြောင်း ကနေ ပျောက်ဆုံးနဲ့ သေဆုံးတာက ၄၀ ကျော်လောက်ရှိတယ်။ တပ်မ ၅၅ နောက်တန်း ဗျူဟာနဲ့ ခမရ ၅၄၅ တပ် စစ်ဗျူဟာမှူးတွေ စစ်ဆင်ရေး ဆုံရှုံးမှုကြောင့် စကားများ ပြဿနာ ဖြစ်နေတယ်လို့ သိရတယ်” ဟု ဒေသတွင်း စစ်ရေးသတင်းရင်းမြစ်က ပြောဆိုသည်။
