မန္တလေးတိုင်း၊ မတ္တရာမြို့နယ်၊ စကားပင်ရွာ ဘုန်းကြီးကျောင်းကို အကြမ်းဖက် စစ်တပ်က လေယာဉ်ဖြင့် ဗုံးကျဲ တိုက်ခိုက်ခြင်းကြောင့် ဘုရား ဆင်းတုတော်များ အပါအဝင် အဆောက်အဦးများ ထိခိုက်ပျက်စီးခဲ့ကြောင်း Voice Of Mandalay မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ယနေ့ ဩဂုတ်လ ၂၃ ရက်နေ့ နံနက် ၉ နာရီ ၁၆ မိနစ်ခန့်တွင် မတ္တရာမြို့နယ်၊ စကားပင်ကျေးရွာ ဘုန်းကြီးကျောင်းကို အကြမ်းဖက် စစ်တပ်၏ တံတားဦး လေတပ်မှ တက်လာသော ဂျက်ဖိုက်တာ ၁ စီးက ပေါင် ၅၀၀ ဗုံးကျဲချ တိုက်ခိုက်ခဲ့ခြင်းဖြစ်ကြောင်း သိရသည်။
ထို တိုက်ခိုက်မှု အတွင်း ဘုန်းကြီးကျောင်းရှိ ဘုရားဆင်းတုတော်များ အပါအဝင် အဆောက်အဦးများလည်း ထိခိုက်ပျက်စီးခဲ့ပြီး ပြည်သူများ ထိခိုက်မှု မရှိကြောင်း သိရှိရသည်။
“စကားပင်ကျေးရွာအတွင်းက ဘုန်းကြီးကျောင်းကို အကြမ်းဖက် စစ်တပ်ရဲ့ တံတားဦး လေတပ်ကနေ တက်လာတဲ့ ဂျက်ဖိုက်တာ ၁ စီးက ဒီနေ့ နံနက် ၉ နာရီကျော်လောက်မှာ ပေါင် ၅၀၀ ဗုံးကျဲချ တိုက်ခိုက်သွားတာ ဘုရားဆင်းတုတော်နဲ့ အဆောက်အဦးတွေ ထိခိုက်ပျက်စီးတယ်။ ပြည်သူတွေတော့ ထိခိုက်မှုမရှိဘူး” ဟု Voice Of Mandalay မှ တာဝန်ရှိသူ တစ်ဦးက ပြောဆိုသည်။
အလားတူ ယမန့်နေ့ ည ၇ နာရီ ၃၀ မိနစ်ခန့်ကလည်း အကြမ်းဖက် စစ်တပ်၏ အသေခံ ဒရုန်း ၁ စီးက စကားပင်ကျေးရွာ ဘုန်းကြီးကျောင်းကို လေကြောင်း တိုက်ခိုက်မှု ပြုလုပ်ခဲ့ပြီး ပြည်သူများ ထိခိုက်မှုမရှိကြောင်း သိရသည်။
