ယခုနှစ်အတွင်း စစ်တပ်၏ လေကြောင်းတိုက်ခိုက်မှုများကြောင့်လူ ၈၆ ဦး သေဆုံးခဲ့ပြီး စစ်တပ် ကျူးလွန်သော စစ်ရာဇဝတ်မှုများကို နိုင်ငံတကာထံသို့ ပေးပို့မည်
ရန်ကုန်၊ ဩဂုတ် ၂၆
ရခိုင်ပြည်၊ မြောက်ဦးမြို့ကို စစ်တပ်က လေယာဉ်ဖြင့် ဗုံးကျဲချခဲ့သဖြင့် သေဆုံးသူ ၁၂ ဦးရှိလာပြီး ၂၀၂၅ ခုနှစ်အတွင်း ရခိုင်ပြည်သူ ၈၆ ဦး စစ်တပ်၏ လေကြောင်းတိုက်ခိုက်မှုများကြောင့် သေဆုံးခဲ့ကြောင်း အာရက္ခတပ်တော် AA က သတင်းထုတ်ပြန်သည်။
ယမန်နေ့ ဩဂုတ်လ ၂၅ ရက်နေ့၊ ည ၁၁ နာရီ ၂၅ မိနစ်အချိန်ခန့်တွင် အာရက္ခပြည်၊ မြောက်ဦးမြို့၊ ဒိုင်းကျီရပ်ကွက်ကို အကြမ်းဖက်စစ်တပ်က ဂျက်ဖိုက်တာဖြင့် ဗုံး ၂ လုံး ကျဲချတိုက်ခိုက်ခဲ့ကြောင်း၊ ယင်းသို လေကြောင်း တိုက်ခိုက်မှုကြောင့် အလှူလုပ်ရန် ပြင်ဆင်နေကြသော မိသားစုဝင်များ နှင့် ၎င်းပတ်ဝန်းကျင်အနီးအနားမှ ကလေးငယ် ၅ ဦး အပါအဝင် အပြစ်မဲ့ အရပ်သားပြည်သူ ၁၂ ဦး သေဆုံးခဲ့ရပြီး ပြည်သူ ၂၀ ဦးလည်း ထိခိုက်ဒဏ်ရာများ ရရှိကာ လူနေအိမ် ၈ လုံး ပျက်စီးခဲ့ရကြောင်း သိရှိရသည်။
စစ်တပ်က ညအချိန် လူအများ အိပ်မောကျနေသည်ကို အခွင့်ကောင်းယူပြီး ယခုကဲ့သို အပြစ်မဲ့အရပ်သားပြည်သူများ ထိခိုက်သေဆုံးမှုများပြားစေရန် တမင်တကာ ရည်ရွယ်ချက်ရှိရှိဖြင့် ဗုံးကျဲတိုက်ခိုက်ခဲ့ခြင်း ဖြစ်ကြောင်း၊ ၂၀၂၅ ခုနှစ် ဇန်နဝါရီလမှ ယခုအချိန် စစ်တပ်၏ လေကြောင်းတိုက်ခိုက်မှု ကြောင့် သေဆုံးသူ ပြည်သူ ၈၆ ဦးရှိကြောင်း သိရှိရသည်။
စစ်တပ်၏ လေကြောင်းတိုက်ခိုက်မှုများအနေဖြင့် ၂၀၂၅ ခုနှစ်၊ မေလ ၁၄ ရက်နေ့နှင့် မေလ ၁၅ ရက်နေ့များတွင်လည်း စစ်တပ်က ကျောက်တော်မြို၊ ရွာမရပ်ကွက်ကို ဂျက်ဖိုက်တာဖြင့် ၂ ရက်ဆက်တိုက် ဗုံးကျဲတိုက်ခိုက်ခဲ့မှုကြောင့် အပြစ်မဲ့အရပ်သားပြည်သူ ၈ ဦး သေဆုံးခဲ့ရပြီး ဒဏ်ရာရသူ စုစုပေါင်း ၁၄ ဦးအထိ ရှိခဲ့ကြောင်း သိရှိရသည်။
ထို့အတူ ၂၀၂၅ ခုနှစ်၊ မေလ ၁၃ ရက်နေ့၊ နံနက် ၁၀ နာရီ ၀၅ မိနစ်အချိန်တွင်လည်း ရသေ့တောင်မြိုနယ်၊ ထွန်းရဝေရွာဟောင်းကို စစ်တပ်က ဂျက်ဖိုက်တာဖြင့် ဗုံးကျဲချသဖြင့် ပြည်သူ ၁၂ ဦးသေဆုံးခဲ့ကြောင်း သိရှိရသည်။
ယင်းအပြင် ဇန်နဝါရီလ ၁၈ ရက်နေ့ ညနေပိုင်းတွင်လည်း မြောက်ဦးမြိုနယ်၊ ရမ်းချောင်းရွာအနီးတစ်ဝိုက်ကို စစ်တပ်က ဂျက်ဖိုက်တာဖြင့် ဗုံးကျဲတိုက်ခိုက်ခဲ့မှုကြောင့် စစ်သုံပန်းမိသားစုဝင်များထဲမှ ကလေးငယ်နှင့် အမျိုးသမီးစုစုပေါင်း ၂၈ ဦးသေဆုံးကာ ၂၅ ဦးဒဏ်ရာရရှိခဲ့ကြောင်း သိရှိရသည်။
ဇန်နဝါရီလ ၈ ရက်နေ့၊ မွန်းလွဲ ၁ နာရီ ၂၀ မိနစ်တွင် ရမ်းဗြဲမြိုနယ်၊ ကျောက်နီမော်ကျေးရွာကို စစ်တပ်က ဂျက်ဖိုက်တာဖြင့် ဗုံးကျဲတိုက်ခိုက်ခဲ့မှုကြောင့် သေဆုံးသူ ၂၆ ဦးရှိကြောင်း သိရှိရသည်။
စစ်တပ်က စစ်ဘက်နှင့်မသက်ဆိုင်သော စာသင်ကျောင်းများ၊ ဆေးရုံဆေးခန်းများ၊ ဈေးများ၊ ဘာသာရေးအဆောက်အုံများ၊ လမ်းတံတားများ၊ စစ်ဘေးရှောင်စခန်းများ နှင့် လူနေထူထပ်သော မြို့ ရွာ ရပ်ကွက် နေရာများ စသည်ဖြင့် အပြစ်မဲ့ပြည်သူများကို ပစ်မှတ်ထား တိုက်ခိုက်သည့် လုပ်ရပ်များ လူစိတ်ကင်းမဲ့သောတိုက်ခိုက်မှုမျိုးကို အာရက္ခဒေသအတွင်းသာမက နိုင်ငံအနှံအပြား၌ နေ့စဉ် ရက်ဆက် ပြုလုပ်နေကြောင်း၊ စစ်တပ်က စစ်ရာဇဝတ်မှုများကို ပြောင်ပြောင်တင်းတင်း ချိုးဖောက်ကျူးလွန်လျက်ရှိကြောင်း AA က ပြောဆိုသည်။
အာရက္ခပြည်သူများကို အစုလိုက်အပြုံလိုက် သတ်ဖြတ်ကာ စစ်ရာဇဝတ်မှုများကို နိုင်ငံအနှံ နေ့စဉ် ရက်ဆက် ကျူးလွန်နေသော စစ်ကောင်စီ၏ စစ်ရာဇဝတ်မှုနှင့် လူသားမျိုးနွယ်အပေါ် ပြစ်မှုကျူးလွန်နေသော လုပ်ရပ်များကို ပြင်းထန်စွာရှုတ်ချပြီး အဆိုပါလုပ်ရပ်များကို နိုင်ငံတကာအဖွဲအစည်းများထံသို့ ပေးပို့သွားမည်ဖြစ်သည့်အပြင် AA က လုပ်သင့်လုပ်ထိုက်သည်များအား ဆက်လက် လုပ် ဆောင်သွားမည်ဖြစ်ကြောင်း AA က ထုတ်ပြန်ပြောဆိုသည်။
