ရန်ကုန်၊ ဩဂုတ် ၂၉
တနင်္သာရီတိုင်း၊ သရက်ချောင်းမြို့နယ်အတွင်းရှိ ပြည်သူလူထု နေထိုင်နေသော ကျေးရွာများကို စစ်အရာရှိများက ဖျက်ဆီးရန် အမိန့်ပေးခဲ့၍ မီးတင်ရှို့ခဲ့ရကြောင်း သရက်ချောင်းမြို့ အခြေစိုက် ခမရ ၄၀၄ မှ အလင်းဝင်လာသော တပ်သား မောင်ဇင်ကိုကိုက ဝန်ခံထွက်ဆိုသည်။
ဧရာ၀တီတိုင်းတွင် နေထိုင်သော အသက် ၁၆ နှစ်အရွယ် ၆ တန်းကျောင်းသား မောင်ဇင်ကိုကိုသည် ယခုနှစ်ကျောင်းပိတ်ရက် အိမ်၏ စီးပွားရေး အဆင်မပြေ၍ စပါးထွက်ထမ်းခဲ့ရာမှ လမ်းတွင် ပေါ်တာဆွဲ ဖမ်းဆီးခံခဲ့ရသူဖြစ်ပြီး သရက်ချောင်းမြို့နယ်၊ ခမရ ၄၀၄ တပ်ရင်းတွင် စစ်မှုထမ်းနေစဉ် ဩဂုတ် လ ၂၅ ရက်နေ့တွင် လက်နက်ခဲယမ်းများနှင့်အတူ သရက်ချောင်းမြို့နယ်အခြေစိုက် တော်လှန် ရေးတပ်ထံသို့ အလင်းဝင်ရောက်ခဲ့သူဖြစ်သည်။
တပ်သားမောင်ဇင်ကိုကို ခမရ ၄၀၄ တွင် တာဝန်ထမ်းဆောင်ခဲ့စဉ် ဩဂုတ်လ ၁၂ ရက်နေ့ မှ ဩဂုတ် လ ၂၅ ရက်နေ့ အထိ သရက်ချောင်းမြို့နယ်အတွင်း စစ်ကြောင်းခဲ့ရပြီး စစ်တပ်က ဥတ္တူရွာ ၊ စော်ဖျားရွာနှင့် မိုးရွှေကုန်းရွာမှ နေအိမ်များကို နေ့စဉ် မီးရှို့ဖျက်ဆီးခဲ့ရကြောင်း၊ စစ်တပ်၏ မီးရှို့မှုကြောင့် နေအိမ် ၅၁ လုံးပြာကျခဲ့ရကြောင်း သိရှိရသည်။
“အထက်က ညွှန်ကြားတော့ သူတို့ (စစ်တပ်) ခံခဲ့ရတဲ့အတွက် သူတို့ ရွာတစ်ရွာလုံးကို မီးရှို့ဖို့ မှာခဲ့တာပါ။ မီးရှို့တာက အကုန်လုံးရှို့ခိုင်းခဲ့တာပါ။ သူတို့ရဲ့ လက်အောက်ငယ်သားတွေက အကုန်မရှို့ဘူး ဘာလို့လဲဆိုတော့ အကုန်ရှို့ရင် သူတို့ ဟိုဟာဖြစ်မယ်ဆိုတာ သူတို့ သိတယ်။ အဲဒါကြောင့် အကုန်မရှို့ဘူး။ အဲဒါတောင်မှ တော်တော်များများ ပါသွားတယ်လို့ ကျွန်တော်တို့ အသံကြားပါတယ်။ အိမ်အလုံး ၇၀ ၊ ၈၀လောက် ပါသွားတယ်လို့ ကြားပါတယ်။ တိုက်အိမ်တွေလည်း ပါတယ်၊ သစ်သားအိမ်တွေလည်း ပါတယ် ပြောပါတယ်။ ဒီအတိုင်း သူများရဲ့ရွာထဲ ဝင်သွားရင် သူများရဲ့ ပစ္စည်းယူပါတယ်။ ပစ္စည်းယူတာ အများကြီးပါ။ ဆန်တွေ၊ ဆီတွေ၊ အင်္ကျီတွေ၊ ဖိနပ်တွေလည်း အကုန်ယူတာ။ အိမ်တွေရင် အကုန်ဖောက်တယ်။ ပစ္စည်းရှိ အကုန်ယူတယ်။ တပ်ရင်းမှူးက ရှို့ဆိုတဲ့ အိမ်ကို မီးရှို့ခဲ့တယ်၊ မရှို့နဲ့ဆို မီးမရှို့ဘူး” ဟု အလင်းဝင်တပ်သား မောင်ဇင်ကိုကိုက ဝန်ခံထွက်ဆိုသည်။
စစ်တပ်အတွင်းတွင် အလင်းဝင်လိုသော စစ်မှုထမ်းတပ်သားများစွာရှိနေကြောင်း၊ အဓိက အားဖြင့် ပြည်သူကျွေးသော ထမင်းကိုစား၍ ပြည်သူများ၏ အိမ်များနှင့် ရွာများကို မီးရှို့နေရကြောင်း ၎င်းက ဆက်လက်ရှင်းပြသည်။
“အလင်းဝင်မယ်ဆို ဝင်လာလို့ ရတယ်။ ငါတို့လည်း ရှိနေတာပဲ ။ ။ ငါတို့လည်း စောင့်နေပါတယ်။ အဲဒီအတွက်ကြောင့်မို့ မင်းတို့ အဲဒီမှာတင် ပြည်သူကျွေးတာ စားပြီး မင်းတို့ ပြည်သူကို ဒုက္ခပေးနေတယ်။ မင်းတို့ စစ်ကြောင်းဆင်းတယ်။ အိမ်တွေ မီးရှို့တယ်၊ ရွာတွေကို မီးရှို့တယ်။ မင်းတို့ စဉ်းစားကြည့်ပါ ငါအခု သင်တန်းဆင်းခဲ့တယ်။ အပတ်စဉ်က သူငယ်ချင်းတွေလည်း ငါတို့ ဘက်ထဲကို ဝင်ခဲ့ပါလို့ ငါ အမှာစကားပါးချင်ပါတယ်” ဟု အလင်းဝင်တပ်သား မောင်ဇင်ကိုကိုက ဆက်လက်ပြောဆိုသည်။
သရက်ချောင်းမြို့နယ်အတွင်း စစ်တပ်က စစ်ကြောင်းထိုးနေသော်လည်း တော်လှန်ရေးတပ်များ၏ ခုခံ တိုက်ခိုက်မှုများကြောင့် အထိနာနေကာ ကျေးရွာများကို မီးရှို့ဖျက်ဆီးမှုများနှင့် ပြည်သူပိုင်ပစ္စည်းများကို လုယက်ခြင်းများကို တောက်လျှောက်ဆိုသလို လုပ်ဆောင်နေကြောင်း ဒေသပြည်သူများက ပြောဆိုကြသည်။
