တနင်္သာရီတိုင်း၊ ရေဖြူမြို့နယ် အတွင်း စစ်ကြောင်းထိုးနေသည့် အကြမ်းဖက် စစ်တပ်မှ ထွက်ပြေးလာသော စစ်သား ၁ ဦးနှင့် စစ်မှုထမ်း တပ်သား ၃ ဦးကို အရှင်ဖမ်းမိခဲ့ကြောင်း အထူးတိုင်း နည်းဗျူဟာ ၃၃ စစ်ဆင်ရေးမှုး ရဲဘော်စောဒါးကိုက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဩဂုတ်လ ၂၅ ရက်နှင့် ၂၆ ရက်နေ့တို့တွင် ရေဖြူမြို့နယ် ကော့လှိုင်းရွာ၊ မရမ်းချောင်းရွာ၊ မိုင် ၆၀ ရွာ နှင့် သာယာမွန်ကျေးရွာတို့ကို စစ်ကြောင်းထိုးနေသော အကြမ်းဖက် စစ်တပ်မှ ထွက်ပြေးလာသော စစ်သား ၁ ဦးနှင့် စစ်မှုထမ်း တပ်သားသစ် ၃ ဦးကို ရှေ့တန်း စစ်မြေပြင် တနေရာတွင် အရှင် ဖမ်းဆီးရမိခဲ့ကြောင်း သိရသည်။
အဆိုပါ အဖမ်းဆီးရမိသော စစ်မှုထမ်း တပ်သားသစ် ၃ ဦးသည် စစ်မှုထမ်း အပတ်စဉ် ၈ မှ တပ်သား နန်းကိုကို၊ တပ်သား နိုင်လင်းအောင်နှင့် ရန်နိုင်မင်း (ခ) ချစ်စမ်းမောင် တို့ဖြစ်ပြီး ကျန်တစ်ဦးသည် ခမရ ၄၀၅ တပ်ရင်းမှ စစ်သား ဇေယျာဝင်း(ခ)ကျော်ဝင်း ဖြစ်ကြောင်း သိရှိရသည်။
ထို စစ်မှုထမ်း တပ်သားသစ် ၃ ဦးသည် မတရားစစ်မှုထမ်း ဥပဒေကြောင့် ပေါ်တာဆွဲ ဖမ်းဆီးခြင်းခံရကာ စစ်သင်တန်း ၂ လခွဲခန့်သာသင်တန်းတက်ရောက်ခဲ့ပြီး စစ်မြေပြင်သို့ပို့ဆောင်စဥ် ထွက်ပြေးခိုလှုံလာခြင်းဖြစ်ကြောင်း သိရသည်။
အကြမ်းဖက် စစ်တပ်မှ အထက်အရာရှိများသည် မတရားခိုင်းစေခြင်း၊ စစ်မြေပြင်၌ရှေ့ဆုံးမှ ထားပြီး မတရား အမိန့်ပေးကာ တက်ခိုင်းခြင်း၊ ကျေးရွာအတွင်းရှိ ပြည်သူပိုင်နေအိမ်များထံမှ ပစ္စည်းများကို ဖောက်ယူ ခိုးယူခိုင်းခြင်း၊ အရပ်သားပြည်သူများကို ဖမ်းဆီးနှိပ်စက် သတ်ဖြတ်ခြင်းများ ပြုလုပ်ခိုင်းကြောင်း ထွက်ဆိုခဲ့သည်ဟု သိရှိရသည်။
အကြမ်းဖက် စစ်တပ်သည် ကျေးရွာများ အတွင်းသို့လက်နက်ကြီးဖြင့် ပစ်ခတ်ခြင်းနှင့် မတရားဖမ်းဆီးသတ်ဖြတ်ခြင်း တို့ကို ခလရ (၂၈၂) ၊ ခမရ (၄၀၇) ၊ ခမရ (၄၀၈) ၊ ခမရ (၄၀၉) ၊ ခမရ (၄၁၀) ၊ ခလရ (၂၇၃) တို့က ကျူးလွန်ခဲ့ပြီး ဗိုလ်မှူးစိုးမိုးကျော် ဒုတပ်ရင်းမှူး ခမရ (၄၀၉ )၊ ဗိုလ်ကျော်မျိုးခိုင် ခမရ ( ၄၀၉ )၊ ဗိုလ်ကြီးဝင်းမင်းစိုး၊ ဗိုလ်ကြီးအံ့ဘုန်းကျော်၊ ဗိုလ်ကြီးအာကာစိုး ခလရ ( ၂၈၂ )၊ ဗိုလ်မှူးကျော်ဆန်းထွန်း ခမရ ( ၄၀၇ )တို့က ခိုင်းစေခဲ့ကြောင်း စစ်မှုထမ်း တပ်သားများက ထွက်ဆိုခဲ့ကြောင်း သိရသည်။
“တိုက်ပွဲဖြစ်တဲ့ ဒီရက်ပိုင်းအတွင်း ထွက်ပြေးလာကြတယ်။ ၂၅ ရက်နေ့ကပါ။ သေနတ်မပါဘူး။ ညဘက်ကင်း သေနတ်မပေးထားဘူးလို့သိရတယ်။ မိုင် ၆၀ ရွာ တိုက်ပွဲက ထွက်ပြေးလာတယ်။ ဩဂုတ်လ ၂၅ ရက်နေ့ မှာ ၃ယောက် ဩဂုတ်လ ၂၆ ရက်နေ့မှတစ်ယောက် ကျနော်တို့ တော်လှန်ရေးတပ်ဘက်ကိုရောက်လာတယ်။ ကျန်ပြေးတဲ့သူတွေလည်းရှိတယ်။ တချို့ပြန်ဖမ်းမိသွားကြတယ်။ တချို့က အခုထိ တောထဲမှာပဲ ကျန်နေသေးတယ်။ သူတို့က နေရာအစုံပဲ ပဲခူးဘက်ကလည်းပါလာတယ်။ ရန်ကုန်ဘက်ကလည်းပါလာတယ် လို့ပြောတယ်။ စစ်မှုထမ်း တပ်သားသစ်က ၃ ဦးနဲ့ နောက်တစ်ဦးက စစ်သားပါ။ စစ်ဆင်ရေးနယ်မြေထဲမှာ ထွက်ပြေးလာတာဖြစ်တဲ့အတွက် NUG က ချမှတ်ထားတဲ့ စစ်သုံ့ပန်း ဥပဒေနဲ့ပဲ အရေးယူဆောင်ရွက်ထားပါတယ်” ဟု အထူးတိုင်း နည်းဗျူဟာ ၃၃ စစ်ဆင်ရေးမှုး ရဲဘော်စောဒါးကိုက ပြောဆိုသည်။
အဆိုပါ စစ်ဆင်ရေးကို နည်းဗျူဟာ (၃၃) အထူးစစ်ဆင်ရေးအဖွဲ့၊ ဒေါနစစ်ကြောင်း -၂ (YGF)၊ ဒေါနစစ်ကြောင်း – ၃ (KBDF)၊
မွန်ပြည်တော်လှန်ရေးတပ် (MSRF)၊ ရေးဘီလူးတပ်ရင်း၊ ရာမညမွန်တပ်တော် (R.M.A)၊ ကရင်အမျိုးသားလွတ်မြောက်ရေးတပ်မတော် (KNLA) တပ်မဟာ (၆) တပ်ရင်း (၂၇) နှင့် ကြယ်လင်းရောင်(ဆာကပေါ)တပ်ရင်း (KTLA) တို့က ပူးပေါင်း လုပ်ဆောင်ခဲ့ကြောင်း သိရသည်။
