ချောက်မြို့နယ်တွင် စစ်မှုထမ်း အပတ်စဉ် ၁၇ အတွက် တပ်သား လုံလောက်စွာ မရရှိဟုဆိုကာ မြို့နယ် စီမံအုပ်ချုပ်ရေးအဖွဲ့ဝင် ဗိုလ်မှူး တင်ထွန်းဦးက နေအိမ်များအပေါ်အထိပါ လူငယ် မှန်သမျှကို တက်ဖမ်းခိုင်းနေ

ရန်ကုန်၊ ဩဂုတ် ၃၀

မကွေးတိုင်း၊ ချောက်မြို့နယ်တွင် လာမည့် စက်တင်ဘာလ စတင်မည့် စစ်မှုထမ်း အပတ်စဉ် ၁၇ အတွက် စစ်မှုထမ်းအင်အား လုံလောက်စွာ မရရှိဟုဆိုကာ ချောက်မြို့နယ် စီမံအုပ်ချုပ်ရေးအဖွဲ့ဝင် ၁ ဗိုလ်မှူး တင်ထွန်းဦးက စစ်တပ်နှင့်ပျူစောထီးများကို နေအိမ်များအပေါ်အထိပါ လူငယ်မှန်သမျှကို တက်ဖမ်းခိုင်းနေကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။

ဩဂုတ်လ ၂၀ ရက်နေ့မှစတင်ပြီး ချောက်မြို့နယ်၊ စီမံအုပ်ချုပ်ရေးအဖွဲ့ဝင် ၁ ဗိုလ်မှူးတင်ထွန်းဦးက စစ်မှုထမ်းအပတ်စဉ် ၁၇ အတွက် စစ်မှုထမ်းအင်အား လုံလောက်စွာ မရရှိသေးသည့်အတွက် ပျူစောထီးများ၊ စစ်တပ်နှင့်ရဲများကို နေ့ရောညပါ ချောက်မြို့ပေါ်တွင် လူငယ်မှန်သမျှကို ပေါ်တာဆွဲ ဖမ်းဆီးခိုင်း နေကြောင်း၊ ယင်းသို့ ဖမ်းဆီးခိုင်းရာတွင် စျေးဆိုင်များအတွင်း ဝင်ဆွဲခြင်း၊ နေအိမ်များအပေါ်အထိ တက်၍ လူငယ်များကို အကြမ်းဖက် ဖမ်းဆီးခြင်းများ လုပ်ဆောင်နေကြောင်း သိရှိရသည်။

“ချောက်မှာက နဂိုကတည်းက ပျူစောထီးတွေက သောင်းကျန်းနေတာပါ။ အခု လာမယ့် စစ်မှုထမ်း အပတ်စဉ် ၁၇ အတွက် လူက လုံး၀ မရတော့ မနက်ပိုင်းတောင် ဆိုင်တွေ၊ အိမ်တွေအထဲအထိကို ဝင်ဆွဲနေတယ်။ လူငယ်တွေ တော်တော်များများ ပါကုန်တယ်။ တချို့ ကလေးတွေက အရွယ်ကသာ ထွားနေတာ အသက်မပြည့်သေးတဲ့ ကလေးတွေပါ စစ်မှုထမ်း ဖမ်းခေါ်ခံရတယ်။ ငွေပေးပြီး ရွေးယူလို့ရတဲ့သူတွေ ရပေမယ့် တော်တော်များများ မရကြဘူး။ ပျူ၊ စစ်တပ်နဲ့ရဲတွေက အိမ်စီးကားတွေနဲ့ မြို့ပေါ်မှာ ပတ်ပြီး လူငယ်တွေကို လိုက်ဆွဲနေတာပါ” ဟု ဒေသပြည်သူတစ်ဦးက ပြောဆိုသည်။

စစ်တပ်က ယင်းသို့ လူငယ်များကို ဦးတည် ဖမ်းဆီးနေသဖြင့် ချောက်မြို့ပေါ်ရှိ စျေးဆိုင်များတွင် လူငယ် အမျိုးသားများမရှိတော့ကြောင်း၊ အလုပ်သမား လူငယ်များမှာလည်း စားဝတ်နေရေးအတွက် အလုပ်ပင် မသွားရဲသည့်အခြေအနေများ ဖြစ်ပေါ်နေကြောင်း သိရှိရသည်။

“ဆိုင်တွေမှာ အလုပ်သမား လူငယ် အမျိုးသားက မရကြတော့ဘူး။ ရှိတဲ့အလုပ်သမားလူငယ်တွေကလည်း မလုပ်ရဲကြတော့ဘူး။ အလုပ်တောင် မလာရဲတော့ဘူး။ စစ်တပ်က အခု ဖမ်းဆီးနေတာတွေက စည်းကျော်ဘောင်ကျော်တွေ လုပ်နေတာ။ စစ်မှုထမ်းဖို့ အဖမ်းခံရတဲ့ လူငယ်တွေကို လက်ထိပ်တွေပါ ခတ်နေတာ” ဟု ဒေသပြည်သူက ရှင်းလင်းပြောဆိုသည်။

ချောက်မြို့ပေါ်တွင် စစ်တပ်က လုံခြုံရေးအဓိက ထိန်းချုပ်ရာတွင် မြို့ပေါ် လုံခြုံရေးအတွက် ဂိတ်ပေါင်းများစွာ ချထားကြောင်း၊ ယင်းဂိတ်များတွင် လူငယ်များကို ပုံစံမျိုးဖြင့် စစ်ဆေး ဖမ်းဆီးလျက်ရှိကြောင်း သိရှိရသည်။

“ချောက်မှာက မြို့ပေါ်ပဲ တပ်ရှိတာ။ ရွာတွေမှာ PDF တွေချည်းပဲ။ အဲဒီတော့ မြို့ပေါ် စစ်ဆေးရေးဂိတ်တွေမှာ လူငယ်တွေ ဝင်လာရင် ဘာမှ မပြောတော့ဘဲ တစ်ခါတည်း ဖမ်းထားလိုက်တယ်။ ဘာအကြောင်းမှ မရှိဘဲ ဖမ်းတာ။ အဲဒီအဖမ်းခံရတဲ့ လူငယ်တွေက တစ်နေ့ကို ဆယ်ဂဏန်းချီရှိနေတယ်။ ယောင်္ကျားလေး လူပျိုပေါက်တွေ မွေးထားတဲ့ မိဘတွေလည်း ဘာလုပ်လို့ ဘာကိုင်ရမှန်းမသိဖြစ်နေကြတယ်” ဟု ချောက်မြို့နယ်မှ ပွဲရုံပိုင်ရှင် စီးပွားရေးသမားတစ်ဦးက ပြောဆိုသည်။

ချောက်မြို့နယ်အတွင်းတွင် စစ်တပ်နှင့် တော်လှန်ရေးတပ်များမကြာခဏ ဆိုသလို တိုက်ပွဲဖြစ်ပွားလေ့ရှိပြီး စစ်တပ်က ကျေးရွာများကို ဖျက်ဆီးရန် မကြာခဏဆို စစ်ကြောင်းထိုးလျက်ရှိကြောင်း သိရှိရသည်။

ဓာတ်ပုံ- ချောက်မြို့နယ် စီမံအုပ်ချုပ်ရေးအဖွဲ့ဝင် ဗိုလ်မှူး တင်ထွန်းဦးနှင့် မြို့နယ်ရဲတပ်ဖွဲ့မှူး ရဲမှူးဝင်းသန်း။