ရှမ်းပြည်နယ်မြောက်ပိုင်း၊ ကျောက်မဲမြို့နယ်တွင် စစ်တပ်က ဒရုန်းဖြင့် ဗုံးကျဲမှုနှင့်လက်နက်ကြီးဖြင့် ပစ်ခတ်မှုတို့ကြောင့် စစ်ဘေးရှောင် ဦးစိုးမောင် ကျည်ထိမှန်သေဆုံးသွားကြောင်း ဒေသပြည်သူများနှင့် ကျောက်မဲအခြေစိုက် ပရဟိတအဖွဲ့ဝင်တချို့က ပြောဆိုသည်။
ယမန်နေ့ ဩဂုတ်လ ၂၉ ရက်နေ့ မွန်းလွဲ ၂ နာရီဝန်းကျင်အချိန် ရှမ်းပြည်နယ်မြောက်ပိုင်း၊ ကျောက်မဲမြို့နယ်၊ ခိုက်တုန်ဟုန်းကျေးရွာသို့ စစ်တပ်က လက်နက်ကြီးဖြင့် ပစ်ခတ်ခဲ့ရာ လက်နက်ကြီးကျည်ထိမှန်၍ အသက် ၅၁ နှစ်အရွယ် စစ်ဘေးရှောင် ဦးစိုးမောင် သေဆုံးသွားခဲ့ကြောင်း သိရှိရသည်။
“ကျောက်မဲမှာ တိုက်ပွဲတွေ ပြင်းထန်လို့ တိမ်းရှောင်နေရင်းနဲ့ အိမ်ခဏပြန်ပြီးတော့ ဆန်၊ဆီ၊တစ်ခေါက်ပြန် ယူနေတုန်းမှာ လက်နက်ကြီးကျတာပါ။ ပွဲချင်းပြီး ဆုံးပါတယ်။ မနေ့က နေ့ချင်း သဂြိုလ်လိုက်ပါတယ်” ဟု ကျောက်မဲဒေသပြည်သူတစ်ဦးက ပြောဆိုသည်။
အကြမ်းဖက်စစ်တပ်က ကျောက်မဲမြို့နယ်သို့ လက်နက်ကြီး၊ ဒရုန်းများဖြင့် ဆက်တိုက် ပစ်ခတ်လျက်ရှိပြီး လက်နက်ကြီးကျည်များနှင့် ဒရုန်းဗုံးများမှ ကျောက်မဲမြို့၊ နားအိုက်ခန်ကျေးရွာအုပ်စုအတွင်းနှင့် ပြည်ထောင်စုလမ်းမဘေးရှိ လွယ်ခေါ်ရွာနတ်စင်မျက်နှာချင်းဆိုင်ရှိ တောင်ပေါ် နှင့် ရွာအထွက် တို့တွင်လည်း ဗုံးများ ကျရောက်ပေါက်ကွဲခဲ့ကြောင်း သိရှိရသည်။
လက်ရှိတွင် စစ်တပ်က နောင်ပိန်ကျေးရွာကို ပြန်လည် သိမ်းပိုက်သွားပြီး ဂုတ်ထိပ်တံတားကိုလည်း ပြန်လည်း သိမ်းပိုက်သွားကြောင်း သိရှိရသည်။
