အကြမ်းဖက် စစ်ခေါင်းဆောင် မင်းအောင်လှိုင် အပါအဝင် စစ်ခေါင်းဆောင်များကို ဆဲဆိုမှုများဖြင့် ထောင်ဒဏ် ၁၁ နှစ်ချမှတ်ခံထားရသည့် ဇော်ဘုန်းဟိန်းကို ပြန် လွှတ်ပေးရေးအတွက် ၎င်းကို ထောက်ခံသော စစ်တပ်ထောက်ခံသူတချို့ စုပေါင်း၍ အသနားခံစာ တင်ပြထားသော်လည်း အကြောင်းတစ်စုံ တစ်ရာ ပြန်ကြားမှုမရှိကြောင်း အသနားခံစာတင်ရာတွင် ပါဝင်သူတစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။
ဩဂုတ်လ ၇ ရက်နေ့ အကြမ်းဖက် စစ်ခေါင်းဆောင် မင်းအောင်လှိုင် အပါ အဝင် စစ်ခေါင်းဆောင်များကို ဆဲဆိုမှု အပါအဝင် ပုဒ်မများဖြင့် ဇော်ဘုန်းဟိန်းကို ထောင်ဒဏ် ၁၁ နှစ်ချမှတ်ခဲ့ကြောင်း၊ ယင်းသို့ ချမှတ်ခံရပြီးနောက် ဇော်ဘုန်းဟိန်းကို ထောက်ခံသော စစ်တပ်ဘက်တော်သားတချို့ စုပေါင်းကာ မင်းအောင်လှိုင်ထံသို့ အသနားခံစာ တင်ပြလိုက်ကြကြောင်း၊ သို့ရာတွင် မည်သည့် အကြောင်းပြန်ကြားမှုမှ မရရှိကြောင်း သိရှိရသည်။
“ဩဂုတ်လ ၁၂ ရက်နေ့လောက်မှာ နေပြည်တော်၊ တပ်မတော်အကြီးအကဲတွေဆီကို လိပ်မူပြီး တင်လိုက်တာပါ။ ဒီနေ့ဆိုရင် ၁၈ ရက်ရှိသွားပြီ ။ ဘာအကြောင်း ပြန်ကြားချက်မှ မရရှိပါဘူး။ မိသားစုကိုတော့ တပ်ဘက်က အရာရှိတချို့က လာမယ့် ၂၀၂၆ ခုနှစ် လွတ်လပ်ရေးနေ့နဲ့ နှစ်သစ်ကူး သင်္ကြန်ကာလ လွတ်ငြိမ်းတွေမှာ ပါလာနိုင်တယ်လို့ပြောတယ်။ တရားဝင် အသနားခံစာတင်တာတော့ ဘာမှကို အကြောင်း မပြန်တာ။ ဘာပဲပြောပြော သူက တပ်မတော်အတွက် တကယ်ရပ်တည်ခဲ့တာပဲ။ အခုတော့ ဒီလိုကြီး လက်လွတ်စပယ် အလုပ် ခံရတာက ဝမ်းနည်းစရာပါ” ဟု အသနားခံစာတင်ပြရာတွင် ပါဝင်ခဲ့သူတစ်ဦးက ဆိုသည်။
ဇွန်လ ၂ ရက်နေ့ မွန်းလွဲ ၁ နာရီကျော်အချိန် ပြင်ဦးလွင်တွင် နေထိုင်သော စစ်လော်ဘီ ဇော်ဘုန်းဟိန်းကို စစ်တပ်က ဝင်ရောက် ဖမ်းဆီးသွားခဲ့ပြီးနောက် ဇွန်လ ၁၂ ရက်နေ့တွင် နိုင်ငံတော်အကြည်ညိုပျက်စေမှု ပုဒ်မ ၅၀၅ (က) ၊ ဆက်သွယ်ရေးဥပဒေ ပုဒ်မ ၆၆ (ဃ) အပါအဝင် အမှုများစွာဖြင့် ဖမ်းဆီးထောင်ချခဲ့ခြင်းဖြစ်သည်။
မင်းအောင်လှိုင် အပါအဝင် စစ်အရာရှိကြီးများကို ဆဲဆိုသည့်အတွက် ရန် ကုန်တိုင်း၊ ဒဂုံမြို့သစ်တောင်ပိုင်းမြို့ နယ် ရဲစခန်းတွင် (ပ)အမှတ် ၃၅၈/၂၀၂၅ ဆက်သွယ်ရေးဥပဒေပုဒ်မ ၆၆(ဃ)ဖြင့် မဘသနှင့်စစ်တပ်ထောက်ခံသူ ဒေါ်မိုးမိုးခိုင်က ဇော်ဘုန်းဟိန်းကို အမှုဖွင့်ခဲ့ကြောင်း သိရှိရသည်။
