မကွေးတိုင်း၊ နတ်မောက်မြို့နယ်၊ သနပ်ပေါက်တော တဲတိုက်ကို အကြမ်းဖက်စစ်တပ်က ပါရာမိုတာ ဖြင့် ဗုံးကျဲတိုက်ခိုက်ခဲ့ရာ အသက် ၁၄ နှစ်အရွယ် မိန်းကလေးတစ်ဦးသေဆုံးပြီး အမျိုးသား ၁ ဦး ဒဏ် ရာရရှိခဲ့ကြောင်း နတ်မောက်မြို့နယ် ပကဖ တာဝန်ခံက ရန်ကုန်ခေတ်သစ်သတင်းဌာနထံသို့ ပြော ကြားသည်။
ယနေ့ ဩဂုတ်လ ၃၀ ရက်နေ့ နံနက် ၉ နာရီ ၁၅ မိနစ်အချိန် နတ်မောက်မြို့နယ်၊ ကံသာကျေးရွာ၊ စက် တောကျေးရွာ၊ ကျောက်အိုးကျေးရွာကြားရှိ ဒေသအခေါ် သနပ်ပေါက်တောတဲတိုက်အတွင်းသို့ မိတ္ထီလာလေတပ်မှ တက်လာသော စက်တပ်လေထီးဖြင့် ဗုံးကျဲခဲ့ရာ အသက် ၁၄ နှစ်အရွယ်မိန်းကလေးတစ်ဦးသေဆုံးပြီး အမျိုးသား ၁ ဦး အပြင်း အထန်ဒဏ်ရာရရှိခဲ့ကြောင်း သိရသည်။
“ကံသာရယ်၊ စက်တောရယ်၊ ကျောက်အိုးရယ်ကြားထဲမှာ သနပ်ပေါက်တောဆိုတာရှိတယ်၊ အဲဒီ တဲ တိုက်ထဲကို ကျဲချသွားတာ၊ အသက် ၁၄ နှစ် သမီးလေးတစ်ယောက်သေတယ်။ သူ့အဖေကတော့ ဒဏ်ရာ အပြင်းအထန်ရတယ်။ မိတ္ထီလာဘက်က တက်လာတဲ့ စက်တပ်လေထီးပဲ၊ တခြားနေရာတွေ ကျဲတာမျိုးတော့မရှိဘူး။ လူနာကိုတော့ ဆေးကုသပေးထားတယ်။ တိုက်ပွဲဖြစ်တာမရှိဘဲနဲ့ ကျဲသွား တာဖြစ်ပါတယ်၊ သူတို့က တိုက်ပွဲမရှိလည်း အဲဒီလိုပဲ ရွာတွေထဲကို ခဏခဏကျဲချနေတာပါ” ဟု နတ်မောက်မြို့နယ် ပကဖ တာဝန်ခံက ရန်ကုန်ခေတ်သစ်သတင်းဌာနထံသို့ ပြောကြားသည်။
အကြမ်းဖက်စစ်ကောင်စီတပ်က အပြစ်မဲ့ပြည်သူလူထုနေထိုင်ရာ ကျေးရွာများ၊ ဘာသာရေး အ ဆောက်အအုံများ၊ စစ်ဘေးရှောင်စခန်းများ၊ စာသင် ကျောင်းများကို ပစ်မှတ်ထားကာ လေကြောင်း ဖြင့် ဗုံးကျဲတိုက်ခိုက်နေသော ကြောင့်ပြည်သူများအနေဖြင့် လေကြောင်းရန် ကာကွယ်ရေး ဆိုင် ရာနည်းလမ်းများလိုက်နာကျင့်သုံးပေးကြပါရန်နှင့် ဗုံးခိုကျင်းများ ခိုင်ခိုင်မာမာ တူးထားကြပါရန် တော်လှန်ရေးအင်အားစုများက တိုက်တွန်းထားသည်။
