စစ်ဘက်နှင့်အရပ်ဘက် အရာရှိများက အိမ်ရာစီမံကိန်း မြေကွက်များ ခွဲတမ်းများရရှိပြီး လယ်ယာမြေများကို အခြားနည်းသုံးစွဲခွင့်မကျသေးဘဲ ဆောက်လုပ်ရေးများ လုပ်ခွင့်ပြု
ရန်ကုန်၊ ဩဂုတ် ၃၀
NLD အစိုးရလက်ထက်တွင် ဆိုင်းငံ့ တားမြစ်ခဲ့သော ပုသိမ်မြို့ Green Land City စီမံကိန်းကို စစ်အာဏာသိမ်းပြီးနောက် စစ်တပ်နှင့်ဧရာ၀တီတိုင်းဝန်ကြီးချုပ် တင်မောင်ဝင်းက တက်သုတ်ရိုက် အ ကောင် အထည်ဖော်နေကြောင်း ပုသိမ်မြို့အခြေစိုက် ဒေသသတင်းရင်းမြစ်က ပြောဆိုသည်။
ပုသိမ်မြို့ပေါ် လယ်ယာမြေများကို သိမ်းယူပြီး Green City အမည်ဖြင့် အိမ်ရာဖွံ့ဖြိုးရေးစီမံကိန်းကို ယခင် သန်းရွှေ စစ်အာဏာရှင်လက်ထက် အိုးအိမ်ညွှန်ချုပ်ဟောင်း အံ့ကျော်၏ ညီ ဖြစ်သူအောင်မင်း နှင့် ကြံ့ဖွတ်ပါတီ၏ အမာခံ အေးကျော်တို့က NLD အစိုးရလက်ထက် ၂၀၁၈ ခုနှစ်စတင်လုပ်ဆောင်ခဲ့ကြောင်း၊ စီမံကိန်း စတင်ပြီးနောက် NLD အစိုးရက လယ်ယာမြေများကို အခြားနည်းလမ်းအသုံးပြုခွင့် မရမီ ဆောက်လုပ်ရေးလုပ်ငန်းများ ဆောင်ရွက်သဖြင့် ဥပဒေ၊ လုပ်ထုံးလုပ်နည်းများကို ကျော်လွန်ဆောင်ရွက်နေသောကြောင့် စီမံကိန်းကို ရှေ့ဆက် တိုးချဲ့ခြင်းမပြုလုပ်ရန် ယာယီဆိုင်းငံ့ထားခဲ့ကြောင်း သိရှိရသည်။
သို့ရာတွင် စစ်အာဏာသိမ်းပြီးနောက် စစ်အရာရှိများ၊ ဧရာ၀တီတိုင်းဝန်ကြီးချုပ် တင်မောင်ဝင်း၊ နယ်လုံဝန်ကြီး ဗိုလ်မှူးကြီး မိုးမင်းနိုင် အပါအဝင် စစ်ဘက်နှင့်အရပ်ဘက် တာဝန်ရှိသူများကို မြေကွက်ခွဲတမ်းများ ချထားပေးကာ Green Land City စီမံကိန်းကို အရှိန်အဟုန်ဖြင့် တိုးမြှင့် လုပ်ဆောင်ခဲ့ကြောင်း သိရှိရသည်။
“ပုသိမ်မြို့၊ ဘုရားကြီးကုန်းလမ်းမှာရှိတဲ့ လယ်ယာမြေတွေကို အိမ်ရာစီမံကိန်းလုပ်တာ။ ဦးဆောင်တာက အောင်မင်း၊ သူက အရင် ရန်ကုန်မှာ တကယ့် ဆောက်လုပ်ရေးစတင်ခါစအချိန် ညောင်ပင်လေးစျေး ပလာဇာတို့ ရွှေဂုဏ်ပလာဇာတို့ ဆောက်ခဲ့တာ။ သူ့အကိုက ခင်ညွှန့်လက်ထက်က အိုးအိမ် ညွှန်ချုပ်အံ့ကျော်ပါ။ NLD အစိုးရလက်ထက်တုန်းက မြေယာသုံးစွဲမှုမှာ ဥပဒေနဲ့မညီလို့ စီမံကိန်းကို ဆိုင်းငံ့ခိုင်းခဲ့တာ။ အခု စစ်အာဏာသိမ်းတော့ အရှိန်အဟုန်နဲ့ကို စစ်တပ်နဲ့ အုပ်ချုပ်ရေးတွေကို မြေကွက်တွေပေးပြီး စီမံကိန်းကို တက်သုတ်ရိုက်လုပ်ဆောင်နေတာပါ” ဟု ပုသိမ်မြို့အခြေစိုက် ဒေသသတင်းရင်းမြစ်က ပြောဆိုသည်။
စစ်အာဏာသိမ်းပြီးနောက် Green Land City စီမံကိန်းကို အမြန်အကောင်အထည်ဖော်ရာတွင် လယ်ယာမြေများကို အခြားနည်းသုံးစွဲခွင့်မကျခင် ဆောက်လုပ်ရေးလုပ်ငန်းများ အရှိန်အဟုန်မြှင့် လုပ်ဆောင်ခဲ့ကြောင်း၊ ထိုသို့ လုပ်ဆောင်ရန် ဧရာ၀တီတိုင်းဝန်ကြီးချုပ် တင်မောင်ဝင်းကို အဆိုပါ အိမ်ရာစီမံကိန်းတွင် မြေကွက် ၁၀ ကွက်၊ နယ်လုံဝန်ကြီး ဗိုလ်မှူးကြီး မိုးမင်းနိုင်ကို မြေကွက် ၅ ကွက် နှင့် အခြားသော စစ်ဘက်အရပ်ဘက် တာဝန်ရှိသူများကို မြေကွက်များ အသီးသီးပေးအပ် လာဘ်ထိုးခဲ့ကြောင်း သိရှိရသည်။
” ဝန်ကြီးချုပ် တင်မောင်ဝင်း နှင့် လုံ/နယ် ဝန်ကြီး မိုးမင်းနိုင်တို့ကို မြေကွက်တွေခွဲတမ်းပေးပြီးတော့ သူတို့က လယ်မြေကို အိမ်ဆောက်ခွင့်ရသွားတာ။ Green Land City မှာ မြေကွက်ဝယ်ရင် ဘယ်ရုံးမှ သွားစရာမလိုဘဲ အိမ်တန်းဆောက်လို့ရတယ်ဆိုတာမျိုးနဲ့ မြေကွက်တွေရောင်းတယ်။ ဧရာ၀တီတိုင်းဝန်ကြီးချုပ် တင်မောင်ဝင်းနဲ့ နယ်/လုံဝန်ကြီး ဗိုလ်မှူးကြီး မိုးမင်းနိုင်တို့အတွက် မြေကွက်တွေကိုတော့ ခြံခတ် မြေဖို့ပြီး အိမ်ပါဆောက်ပေးဖို့ လုပ်နေပြီ” ဟု ဒေသသတင်းရင်းမြစ်က ဆိုသည်။
အဆိုပါ စီမံကိန်းကို ဦးဆောင်နေသူ အောင်မင်းက Boffo Myanmar Co., Ltd (Green Land City) နှင့် အောင်မြင်ပြည့်စုံ ကုမ္ပဏီအမည်များဖြင့် လုပ်ကိုင်နေခြင်းဖြစ်ပြီး တိုက်ခန်းများ၊ ကွန်ဒိုများ၊ လုံးချင်းအိမ်ရာများ၊ စျေးဝယ်စင်တာများ၊ အားကစားကွင်း၊ ဆေးရုံဆေးခန်း၊ ကျောင်းများစွာ ပါဝင်မည့် အိမ်ရာဖွံ့ဖြိုးရေး အမည်ခံထားသော စီမံကိန်းကြီးတစ်ခုလည်းဖြစ်သည်။
