ရန်ကုန်၊ ဩဂုတ် ၃၀
ထိုင်းနိုင်ငံမှ တစ်ဆင့် မလေးရှားနိုင်ငံသို့ သွားရောက် အလုပ်လုပ်ကြမည့် တရားမဝင် မြန်မာနိုင်ငံသား ၅၂ ဦးကို ထိုင်းအာဏာပိုင်များက ဖမ်းဆီးရရှိကြောင်း ထိုင်းသတင်းဌာနများက သတင်းဖော်ပြသည်။
ယနေ့ ဩဂုတ်လ ၃၀ ရက်နေ့ ထိုင်းစံတော်ချိန် နံနက် ၂ နာရီ ၃၀ မိနစ်အချိန် ထိုင်းနိုင်ငံ၊ ကန်ချနဘူရီခရိုင်တွင် ထိုင်းအာဏာပိုင်များက ကင်းလှည့်နေစဉ် မသင်္ကာဖွယ်ရာ ကား ၁ စီးကို တွေ့ရှိရကြောင်း၊ ယင်းကားမှာ အလွန်လေးလံစွာဖြင့် ကုန်များစွာ တင်ဆောင်ထားသည့်ပုံစံရှိနေသဖြင့် စစ်ဆေး ရပ်တန့်ခိုင်းခဲ့ကြောင်း၊ သို့ရာတွင် ရပ်တန့်ပေးခြင်းမရှိဘဲ မောင်းပြေးသွားသဖြင့် လိုက်လံဖမ်းဆီးရာ ဖမ်းမိခဲ့ကြောင်း သိရှိရသည်။
ဖမ်းဆီးရရှိသော ကားပေါ်တွင် တရားမဝင် မြန်မာနိုင်ငံသား ၅၂ ဦး ဖမ်းဆီးရရှိကြောင်း၊ အမျိုးသား ၃၇ ဦးနှင့် အမျိုးသမီး ၁၅ ဦးတို့ဖြစ်ပြီး ရန်ကုန်မှ ဖြစ်ပြီး ထိုင်း-မြန်မာနယ် နယ်စပ်၊ ဘုရားသုံးဆူမှတစ်ဆင့် ထိုင်းနိုင်ငံ ကန်ချနဘူရီ ခရိုင်အတွင်းသို့ တောလမ်း၊ ရေလမ်းများအတိုင်း ဝင်ရောက်လာခြင်းဖြစ်ကြောင်း သိရှိရသည်။
ဖမ်းဆီးခံရသော မြန်မာနိုင်ငံသားများမှာ ထိုင်းနိုင်ငံမှတစ်ဆင့် မလေးရှားနိုင်ငံသို့ သွားရောက် အလုပ်လုပ်ကြရန်ဖြစ်ပြီး ပွဲစားခအဖြစ် တစ်ဦးလျှင် ထိုင်းဘတ် ၁၅,၀၀၀ မှ ထိုင်းဘတ် ၄၀,၀၀၀ အထိ ပေးရကြောင်း သိရှိရသည်။
ဖမ်းဆီးရရှိသူအားလုံးကို ထိုင်းအာဏာပိုင်များက စစ်ဆေးမေးမြန်းနေပြီး ထိုင်းနိုင်ငံအတွင်းသို့ တရားမဝင် ဝင်ရောက်မှုဖြင့် အမှုဖွင့်တရားစွဲဆို အရေးယူကာ နေရပ်သို့ ပြန်လည် ပို့ဆောင်မည်ဖြစ်ကြောင်း သိရှိရသည်။
