စစ်ကိုင်းတိုင်း၊ စစ်ကိုင်းမြို့နယ်၊ ရုံးပင်ကန်ရွာတွင် တပ်စွဲထားသော စစ်စခန်းကို ဝင်ရောက် တိုက်ခိုက်ရာ စစ်သား ၅ ဦးသေဆုံးပြီး စစ်အသုံးဆောင်ပစ္စည်းများ သိမ်းဆည်းရရှိခဲ့ကြောင်း PHOENIX (SGG) မီးလျှံငှက် (စစ်ကိုင်း) မှ တာဝန်ရှိသူတစ်ဦး ရန်ကုန်ခေတ် သစ်သတင်းဌာနထံသို့ပြောဆိုသည်။
ဩဂုတ်လ ၁၀ ရက်နေ့ နံနက် ၅ နာရီ ၃၀ မိနစ်ခန့်တွင် စစ်ကိုင်းမြို့နယ်၊ ရုံးပင်ကန်ကျေရွာတွင် အင်အား ၄၀ ခန့်ဖြင့် တပ်စွဲထားသော စစ်စခန်းကို တော်လှန်ရေး တပ်ဖွဲ့များက ဝင်ရောက်တိုက်ခိုက်ခဲ့ခြင်းဖြစ်ကြောင်း သိရသည်။
ထိုတိုက်ခိုက်မှုအတွင်း အကြမ်းဖက် စစ်တပ်ဘက်မှ ၅ ဦး သေဆုံးပြီး ထိခိုက် ဒဏ်ရာရှိသူ များပြားကာ စစ်အသုံးဆောင် ပစ္စည်းများ သိမ်းဆည်းရရှိခဲ့ကြောင်း သိရှိရသည်။
“စစ်ခွေး အင်အားကတော့ ၄၀ လောက်နဲ့ တပ်ဆွဲထားတဲ့ စစ်ခွေးစခန်းပါ။ စစ်ခွေးတွေတော့ ထွက်ပြေးသွားကြတယ်။ ထိခိုက်မူကတော့ ၁၅ ယောက်လောက်ရှိမယ်ထင်တယ်။ စစ်ခွေး ထိခိုက်မှုများတယ်။ အသေစာရင်းကတော့ ၅ ကောင်လောက်ရှိတယ်။ စစ်ခွေး အရှင် ဖမ်းမိတာမျိုး မရှိခဲ့ပါဘူး။ လက်နက်ခဲယမ်းတော့ သိမ်းဆည်းရမိတာမျိုး မရှိပါဘူး။ စစ်ခွေး အသုံးအဆောင် ပစ္စည်းတွေပဲ သိမ်းဆည်းရခဲ့တယ်”ဟု PHOENIX (SGG) မီးလျှံငှက် (စစ်ကိုင်း) မှ တာဝန်ရှိသူကပြောဆိုသည်။
အဆိုပါ တိုက်ခိုက်မှုကို PHOENIX (SGG) မီးလျှံငှက် (စစ်ကိုင်း) ၊ မဟာမိတ် တပ်ဖွဲ့များက ပူးပေါင်းလုပ်ဆောင်ခဲ့ပြီး တော်လှန်ရေး ရဲဘော်များ အထိအခိုက်မရှိ ပြန်လည် ဆုတ်ခွာနိုင်ခဲ့ကြောင်း သိရသည်။
