ရန်ကုန်၊ ဩဂုတ် ၃၀
စစ်ကိုင်းတိုင်း၊ ကန့်ဘလူမြို့နယ်တွင် အကြမ်းဖက် စစ်တပ်က ကျီကျင်းရွာမှ ပြည်သူ ၈ ဦးကို သတ်ဖြတ်ပြီး ပြည်သူ ၄၀ ကျော်ကို ဖမ်းဆီးကာ နေအိမ်များကိုလည်း ၄ ရက်ဆက်တိုက် မီးရှို့ဖျက်ဆီး၍ ဘုန်းကြီးကျောင်းမှ ငွေကျပ် သိန်း ၈၀ ကိုပါ ခိုးယူ လုယက်သွားကြောင်း ကျွန်းလှတက်ကြွလှုပ်ရှားသူများအဖွဲ့မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနသို့ ပြောကြားသည်။
ဩဂုတ်လ ၂၃ ရက်နေ့မှ ၂၆ ရက်နေ့အထိ ကန့်ဘလူမြို့နယ်၊ကျီကျင်းရွာသို့ စစ်ကြောင်းထိုးဝင်ရောက်လာသော အင်အား ၂၀၀ ခန့်ပါ စစ်ကြောင်းသည် ရွာထဲ၌ ပိတ်မိနေသော ပြည်သူ အမျိုးသား ၈ ဦးကို ဖမ်းဆီး သတ်ဖြတ်ခဲ့ပြီး ပြည်သူ ၄၀ ကျော်ကို ဖမ်းဆီးကာ နေအိမ်များကိုလည်း ၄ ရက်ဆက်တိုက် မီးရှို့ဖျက်ဆီးခဲ့ကြောင်း သိရသည်။
အဆိုပါ အကြမ်းဖက် စစ်တပ် စစ်ကြောင်းသည် ဩဂုတ်လ ၂၃ ရက်နေ့တွင် ဘူးကုန်းရွာမှ တစ်ဆင့် ကျီကျင်းရွာကို စစ်ကြောင်းထိုး ဝင်လာခဲ့ခြင်းဖြစ်ပြီး ကျေးရွာအတွင်းရှိ ပြည်သူပိုင်နေအိမ်များအား မီးရှို့ဖျက်ဆီးခဲ့ကြောင်း၊ ထို့ပြင် စစ်ကြောင်းသည် ကျေးရွာအတွင်းမှ ထွက်ပြေးသည့် ပြည်သူများကို လိုက်လံ ပစ်သတ်ရာ ပြည်သူ ၆ ဦး သေဆုံးခဲ့ကြောင်း၊ ကျန်ပြည်သူ ၂ ဦးကို ဩဂုတ်လ ၂၅ ရက်နေ့တွင် ကတ္တရာလမ်းပေါ်၌ ထပ်မံ ပစ်သတ်ခဲ့ခြင်းဖြစ်ပြီး ရုပ်အလောင်းများကို တွေ့ရှိခဲ့ကြောင်း သိရှိရသည်။
ထို့ပြင် အကြမ်းဖက် စစ်တပ် စစ်ကြောင်းသည် ကျီကျင်းရွာရှိ ကျောင်းထိုင်ဆရာတော် ဦးကောဝိဒထံမှ ဝတ္ထုငွေ သိန်း ၈၀ ကို ခိုးယူ လုယက်သွားပြီး ဆရာတော်ကို ရွာပြင်နှင်ထုတ်ခြင်းများ လုပ်ဆောင်ခဲ့ကြောင်း သိရသည်။
“လက်ရှိအချိန်အထိ ပြည်သူတွေကို ဖမ်းထားဆဲပါ။ စစ်ခွေးတွေ ပြည်သူ ၈ ဦးကို သတ်ဖြတ်သွားတာ ထွက်ပြေး လွတ်မြောက်လာသူတွေထံကနေ အတည်ပြုနိုင်ခဲ့ပါတယ်” ဟု ကျွန်းလှတက်ကြွလှုပ်ရှားသူများအဖွဲ့မှ တာဝန်ရှိသူတစ်ဦးက ပြောဆိုသည်။
လက်ရှိအချိန်တွင် အကြမ်းဖက် စစ်တပ် စစ်ကြောင်း မီးရှို့ဖျက်ဆီးခြင်းကြောင့် ဩဂုတ်လ ၁၆ ရက်နေ့မှ ၂၈ ရက်နေ့ အထိ ကန့်ဘလူမြို့နယ် တောင်ခြမ်းရှိ ဗျူဟာလမ်း အနောက်ဘက်နှင့် အရှေ့ဘက်ခြမ်းတို့မှ ပြည်သူပိုင် နေအိမ် ၅၀၀ ကျော်ခန့်အထိ ပျက်စီးဆုံးရှုံးထားပြီး ပြည်သူ ၂၀ ဦးခန့် သတ်ဖြတ်ခံထားရကြောင်း၊ အဆိုပါ စစ်ကြောင်းသည် ယခုချိန်ထိ ကျီကျင်းရွာနှင့် ရေကြည်ဦးရွာဘက်တွင် အထိုင်ချတပ်စွဲထားကြောင်း သိရသည်။
ဓာတ်ပုံ – ဩဂုတ်လ ၁၉ ရက်နေ့တွင် ကန့်ဘလူမြို့နယ်၊ ကျေးပင်အက်ရွာကို စစ်တပ်က ဝင်ရောက် စီးနင်းပြီး ပြည်သူ ၄ ဦးကို ဖမ်းဆီးသတ်ဖြတ်ကာ ရုပ်အလောင်းများကို မီးရှို့ဖျောက်ဖျက်၍ နေအိမ်များကို မီးရှို့ဖျက်ဆီးသွားပုံ
