ရှမ်းပြည်နယ်မြောက်ပိုင်း၊ TNLA က သိမ်းပိုက်ထားသော ကျောက်မဲမြို့နယ်တွင် စစ်တပ်က လေယာဉ်ဖြင့် ဗုံးကျဲချခဲ့ကြောင်း ဒေသပြည်သူများ၏ ပြောဆိုချက်နှင့် TNLA၏ ထုတ်ပြန်ချက်အရ သိရှိရသည်။
ယမန်နေ့ ဩဂုတ်လ ည ၉ နာရီ ၄၈ မိနစ်အချိန်၊ ည ၉ နာရီ ၅၀ မိနစ်အချိန်တို့တွင် ကျောက်မဲ မြို့နယ်၊ နားခေါ်ကျေးရွာအတွင်းသို့ ပေါင် ၂၅၀ ဗုံး ၂ လုံးကျဲချခဲ့ကြောင်း၊ ဗုံးကျဲမှုကြောင့် နေအိမ် ၄ လုံး ပျက်စီးသွားခဲ့ကြောင်း သိရှိရသည်။
အကြမ်းဖက်စစ်တပ်က ကျောက်မဲမြို့ပေါ်သို့ ဦးတည်၍ စစ်ကြောင်းထိုးနေပြီးလေ ကြောင်း တိုက်ခိုက်မှုများကိုလည်း ဆက်တိုက် ဆိုသလို လုပ်ဆောင်နေရာ ပြည်သူများ ထိခိုက်သေဆုံးမှုများ ဆက်တိုက်ဖြစ်ပေါ်လျက်ရှိသည်။
ဩဂုတ်လ ၂၉ ရက်နေ့ စစ်ကောင်စီတပ် တိုက်ပွဲဖြစ်ပွားခြင်းမရှိဘဲ ကျောက်မဲမြို့နယ်၊ မိုင်းလုံမြို၊ ပန်သပြေကျေးရွာအတွင်း ပေါင် ၂၅၀ ဗုံး ၄ လုံး လာရောက်ကျဲချတိုက်ခိုက်မှုကြောင့် သီလရှင်၊ သံဃာတော်နှင့် ပြည်သူလူထုများ သေဆုံးထိခိုက်ဒဏ်ရာရရှိခဲ့ပြီး နေအိမ် ၄ အိမ်၊ကျောင်းဆောင် ၅ ဆောင်နှင့် ဓမ္မာရုံ ၁ ရုံတို ဗုံးစထိမှန်ပျက်စီးသွားခဲ့ရသည်။
အလားတူ ဩဂုတ်လ ၂၉ ရက်နေ့ မွန်းလွဲ ၂ နာရီဝန်းကျင်အချိန် ရှမ်းပြည်နယ်မြောက်ပိုင်း၊ ကျောက်မဲမြို့နယ်၊ ခိုက်တုန်ဟုန်းကျေးရွာသို့ စစ်တပ်က လက်နက်ကြီးဖြင့် ပစ်ခတ်ခဲ့ရာ လက်နက်ကြီးကျည်ထိမှန်၍ အသက် ၅၁ နှစ်အရွယ် စစ်ဘေးရှောင် ဦးစိုးမောင် သေဆုံးသွားခဲ့ကြောင်း သိရှိရသည်။
ဩဂုတ်လ ၂၄ ရက်နေ့ မွန်းလွဲပိုင်း ကျောက်မဲမြို့နယ်၊ လုံကြိမ်(ကျောင်းကုန်း) ကျေးရွာကို အကြမ်းဖက်စစ်တပ်က လေယာဉ်ဖြင့် ပေါင် ၅၀၀ ဗုံးကျဲချသဖြင့် ပြည်သူ ၂ ဦး သေဆုံးခဲ့ကြောင်း သိရှိရသည်။
ဩဂုတ်လ ၂၁ ရက်နေ့တွင်လည်း ကျောက်မဲမြိုနယ်သို့ စစ်ကောင်စီတပ်က တိုက်ပွဲဖြစ်ပွား ခြင်းမရှိဘဲ လေကြောင်းဖြင့် ပေါင် ၂၅၀ ဗုံး (၂)လုံးနှင့် လက်နက်ကြီး ၁၁ လုံး ပစ်ခတ်တိုက်ခိုက်မှုကြောင့် ပြည်သူလူထုနေအိမ် ၆ အိမ် ဗုံးစထိမှန်ပျက်စီးသွားခဲ့သည်။
ဩဂုတ်လ ၂၀ ရက်နေ့ ကျောက်မဲမြို့နယ် ပင်တီးကျေးရွာ၊ ပင်တီးဘုန်းတော်ကြီးကျောင်း လေကြောင်းတိုက်ခိုက်ခံရမှုကြောင့် စစ်ရှောင် ပြည်သူ ၁၀ ဦး သေဆုံးကာ ၁၂ ဦး ပြင်းထန်စွာ ဒဏ်ရာရရှိခဲ့သည်။
