မကွေးတိုင်း၊ ပေါက်မြို့နယ်၊ ကပစ ၂၄ မှ ထွက်လာသော အကြမ်းဖက်စစ်ကြောင်းက ရေနံမှော်နှင့် ကျေးရွာများကို ဝင်ရောက်ပြီး မီးရှို့နေကြောင်း Successful Force – Pauk မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောကြားသည်။
ယနေ့ ဩဂုတ်လ ၃၁ ရက် နံနက် ၁၁ နာရီခန့်အချိန် ပေါက်မြို့နယ်၊ ကပစ ၂၄ မှ ဇီးပြားပျူရွာသို့ ရိက္ခာ ပို့ရန် ထွက်လာသော ရိက္ခာတင်ကား ၃ စီးပါ စစ်တပ် စစ်ကြောင်းသည် ထန်း ပင်ချောင် မှ တဆင့် မြောက်ဘက်သို့ ထွက်ခွာလာရာ ရေဖြူရွာသို့ ရှေ့ပြေးစစ်ကြောင်း ရောက်ရှိနေကြောင်း သိသည်။
ထို့အပြင် ထန်းပင်ချောင်ရွာ၌ ကျန်ရှိနေသော စစ်သားများကိုလည်း ကျေးရွာမြောက်ဘက်ရှိ ရေနံ မှော်သစ်ကို ဝင်ရောက်ကာ ရေနံတွင်းများမှ ရေနံများကို ခပ်ယူခြင်း၊ ရေနံလုပ်သားနေများ နေထိုင်ရာ တဲများကို မီးရှို့ခြင်းတို့လုပ်ဆောင်နေကြောင်း ၊ မကြီးကုန်းကျေးရွာသို့ ဖြန့်ခွဲနေရာယူထား သော အကြမ်းဖက်စစ်သားများကလည်း ပြည်သူပိုင်နေအိမ် ၁ လုံးကို မီးရှို့ထားကြောင်း သိရသည်။
“တစ်နေရာနဲ့တစ်နေရာက နီးတယ်၊ အင်အားကများတော့ တပ်ဖြန့်ထားတာ။ မီးရှို့ခံရတဲ့အရေအတွက် နဲ့ ဘယ်လောက်ဆုံးရှုံးထားလဲတော့ မသိရသေးဘူး။ စစ်ကြောင်းက အခုထိရှိနေသေးတယ်။ အသေး စိတ်အချက်အလက် သိရအောင်တော့ စုံစမ်းနေတုန်းပါ” ဟု Successful Force – Pauk မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောကြားသည်။
ပေါက်မြို့နယ်တွင် အကြမ်းဖက်စစ်တပ်က စစ်ကြောင်းထိုးခြင်းများကို အဖွဲ့များစွာခွဲ၍ အင်အားအလုံးအရင်းဖြင့် ပေါက်မြို့နယ်အတွင်းရှိ ကျေးရွာများသို့ ဝင်ရောက်စီးနင်း ဖျက်ဆီးမှုများ လုပ်ဆောင်နေသဖြင့် ပြည်သူထောင်ချီ၍ ထွက်ပြေးတိမ်းရှောင်နေရကြောင်း စစ်ဘေးရှောင်ကူညီသူများထံမှ သိရှိရသည်။
ဓာတ်ပုံ- အညာဒေသတွင် စစ်တပ်က ပြည်သူပိုင်နေအိမ်များနှင့်ကျေးရွာများကို မီးရှို့ဖျက်ဆီးနေစဉ်။
