ကရင်ပြည်နယ်၊ ကော့ကရိတ်-မြ၀တီ အာရှလမ်းပိုင်းကို စစ်ကြောင်းထိုးလာသည့် စစ်တပ်ကို ကြားဖြတ် တိုက်ခိုက်မှု စစ်တပ်ဘက်မှ ၇၀ ကျော် သေဆုံးရာတွင် စစ်မှုထမ်းတပ်သား သစ်များအများဆုံးပါဝင်ကြောင်း ကရင်စစ်ရေးသတင်းရင်းမြစ်ကရန်ကုန်ခေတ်သစ်သတင်း ဌာနထံသို့ ပြောဆိုသည်။
ဩဂုတ်လ ၉ ရက်နေ့နှင့် ၁၅ ရက်နေ့တို့တွင် ကော့ကရိတ်-မြ၀တီမြို့နယ် အာရှလမ်းပိုင်းသို့ အင်အား အလုံးအရင်းဖြင့် စစ်ကြောင်းထိုးလာသော အကြမ်းဖက် စစ်တပ်ကို ဗျူဟာ ၃၁ အပါအဝင် KNU ၊ KNLA ၊ KNDO နှင့် PDF ပူးပေါင်းတပ်များက တတန်ကူးကျေးရွားအနီးတွင် ခုခံ တိုက်ခိုက်ခဲ့ပြီး တိုက်ပွဲပြင်းထန်စွာ ဖြစ်ပွားခဲ့ကြောင်း ၊ ထို ထိတွေ့ တိုက်ပွဲ ၂ ကြိမ် အတွင်း အကြမ်းဖက် စစ်တပ်ဘက်မှ ၇၀ ကျော်သေဆုံးကာ ထိခိုက်ဒဏ်ရာရရှိသူ ၆၀ နီးပါးရှိကြောင်း၊ တိုက်ပွဲများ အတွင်း အကြမ်းဖက် စစ်တပ်ဘက်မှ အထိနာပြီး တပ်လှန်ကာ အကြိမ်ကြိမ် နောက်ပြန်ဆုတ်သွားသော်လည်း အင်အားများ ထပ်မံ ဖြည့်တင်းကာ ထိုးစစ်ဆင်နေသောကြောင့် တိုက်ပွဲများ နေ့စဉ် ဖြစ်ပွားလျက်ရှိကြောင်း သိရှိရသည်။
“သေဆုံးတဲ့ စစ်သားအများစုက စစ်မှုထမ်းတပ်သားတွေ၊ လူငယ်အရွယ်တွေပဲ။ လက်နက်တွေကလည်း အသစ်တွေ။ မြင်ရတာကတော့ စစ်မှုထမ်းတပ် သားသစ်တွေကို ရှေ့ဆုံးမှာ တက်ခိုင်းနေတော့ သူတို့ သေဆုံးကုန်တာ။ လူငယ်တွေချည်းပဲ။ လက်နက်ခဲယမ်းတွေလည်း တော်တော်များများရထားတယ်” ဟု ကရင်စစ်ရေးသတင်းရင်းမြစ်က ရှင်းပြသည်။
အကြမ်းဖက် စစ်တပ်သည် အာရှလမ်းပိုင်းကို ပြန်လည် စိုးမိုးနိုင်ရန်အတွက် ကော့ကရိတ်မြို့ထဲတွင် အင်အား ထောင်နှင့်ချီဖြည့်တင်းထားကာ အောင်ဇေယျ စစ်ကြောင်းသည်လည်း တောနော်ရေတံခွန်း အနီးတွင်ရှိနေသေးကြောင်း သိရသည်။
အလားတူ မြဝတီမြို့တွင်းတွင်လည်း အကြမ်းဖက် စစ်တပ်က တပ်အင်အား ဖြည့်တင်းနေကာ အာရှလမ်းပိုင်းကို နှစ်ဖက် ညှပ်၍ စစ်ကြောင်းထိုးရန် ပြင်ဆင်နေပြီး တိုက်ပွဲများ ဆက်လက် ပြင်းထန်လာနိုင်ကြောင်း သိရှိရသည်။
ဩဂုတ်လ ၂၈ ရက်နေ့ကလည်း စစ်တပ်က စစ်အင်အား ၅၀၀ ကျော်ကို စစ်ကား အစီး ရေ၅၀ ကျော်ပါဝင်သော ယာဉ်တန်းဖြင့် အာရှလမ်းမဘက်သို့ အင်အားဖြည့်တင်းလာကြောင်း၊ အဆိုပါ အကြမ်းဖက် စစ်တပ်တွင် တပ်ပေါင်းစုပုံစံဖြင့် ဒရုန်း ဗုံးကျဲ တပ်ဖွဲ့၊ ယန္တယားတပ်ဖွဲ့ ၊ လက်နက်ကြီးမစ်ဇိုင်းတပ်ဖွဲ့နှင့် စစ်မှုထမ်း တပ်သားသစ်များ ပါဝင်ပြီး မြေပြင် ထိုးစစ်ဆင်ကို အရှိန်မြှင့် လာကြောင်း ကရင်စစ်ရေးသတင်းရင်းမြစ်များထံမှ သိရှိရသည်။
(ဓာတ်ပုံများမှာ Facebook ၏ Community Standard ကို လိုက်နာရပါသဖြင့် ရန်ကုန်ခေတ်သစ်၏ တယ်လီဂရမ်တွင် ဆင်ဆာ ဖြတ်တောက်ခြင်းမရှိဘဲ သွားရောက် ကြည့်ရှု အားပေးနိုင်ကြပါသည်။)
