ရန်ကုန်၊ ဩဂုတ် ၃၁
စစ်ကိုင်းတိုင်း၊ မုံရွာမြို့ အခြေစိုက် အနောက်မြာက်တိုင်း စစ်ဌာနချုပ်ကို ရော့ကတ် အလုံး ၂၀ ဖြင့် ပစ်ခတ် တိုက်ခိုက်မှု အရာရှိ ၃ ဦး အပါအဝင် ၈ ဦး ပွဲချင်းပြီး သေဆုံးကာ ယမ်းသိုလှောင်ရုံ မီးလောင်ပျက်စီးခဲ့ကြောင်း Chindwin Rocket Brother -CRB မှ တာဝန်ခံက ရန်ကုန်ခေတ်သစ်သတင်းဌာနထံသို့ပြောဆိုသည်။
ဇူလိုင်လ ၂၉ ရက်နေ့နှင့် ဩဂုတ်လ ၂၆ ရက်နေ့ တို့တွင် မုံရွာမြို့အခြေစိုက် အနောက်မြောက်တိုင်း စစ်ဌာနချုပ် (နမခ) အတွင်းကို မုံရွာခရိုင် ကွပ်ကဲရေးမှု၏ စီစဉ်ညွန့်ကြားမှုဖြင့် Chindwin Rocket Brothers-CRB အဖွဲ့က ရော့ကတ် အလုံး ၂၀ ဖြင့် ၂ ကြိမ် ပစ်ခတ် တိုက်ခိုက်ခဲ့ကြောင်း သိရသည်။
ထိုတိုက်ခိုက်မှုအတွင်း စစ်တိုင်းရုံးမှ အရာရှိ ၃ ဦးနှင့် စစ်သည် ၅ ဦး ပွဲချင်း ပြီး သေဆုံးခဲ့ကာ ၇ ဦး ထိခိုက်ဒဏ်ရာရရှိခဲ့ပြီး ယမ်းသိုလှောင်ရုံလည်း မီးလောင်ပျက်စီးခဲ့ကြောင်း၊ ပြင်းထန် ဒဏ်ရာရရှိသော စစ်သား ၇ ဦးကို တဆ(ခွဲ)၄/၃၀၀ တပ်ဆေးရုံသို့ အရေးပေါ်ပို့ဆောင်ထားကြောင်း သိရှိရသည်။
“စစ်ခွေး သေစာရင်း စုစုပေါင်း အရာရှိ ၃ ဦးနဲ့ တပ်သား ၅ ဦး စုစုပေါင်း ၈ ဦးကတော့ နေရာတင် ပွဲချင်းပြီး သေဆုံးတယ်။ ထိခိုက်ဒဏ်ရာရရှိတဲ့ စစ်ခွေးတွေကတော့ အရေးပေါ် ဆေးကုသမှု ခံယူနေတာတွေရှိပါတယ်” ဟု Chindwin Rocket Brother -CRB မှ တာဝန်ခံက ပြောဆိုသည်။
အဆိုပါ တိုက်ခိုက်မှုကို ချင်းတွင်းရော့ကတ်ညီနောင် (Chindwin Rocket Brothers -C.R.B)ဦးဆောင်၍ မဟာမိတ်အဖွဲ့များ ဖြစ်သော ချိုမိုင်မိုင်(ကနီ)၊ Anonymous Heroes၊Bandula Defense Force၊ Budalin Defense Force၊Federal Democratic Force ၊ Chindwin Brothers ၊ အုပ်ကြီးနှင့်အဖွဲ့တို့နှင့် ပူးပေါင်းလုပ်ဆောင်ခဲ့ခြင်းဖြစ်ကြောင်း သိရှိရသည်။
