ရန်ကုန်၊ ဩဂုတ် ၃၁
မကွေးတိုင်း၊ ပေါက်မြို့နယ် အရှေ့ခြမ်းရှိ ကျေးရွာများကို အကြမ်းဖက် စစ်တပ်က Y-12 လေယာဉ်ဖြင့် ၆ ကြိမ် ဗုံးကျဲ တိုက်ခိုက်ခဲ့ကြောင်း အညာမြေတပ်ပေါင်းစုမှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ယနေ့ ဩဂုတ်လ ၃၁ ရက်နေ့ မွန်းလွဲ ၂ နာရီ ၁၅ မိနစ်ခန့်တွင် အကြမ်းဖက် စစ်တပ်က ပေါက်မြို့နယ် အရှေ့ပိုင်းရှိ ကျေးရွာများကို Y-12 လေယာဉ်ဖြင့် ၆ ကြိမ် ဗုံးကျဲ တိုက်ခိုက်ခဲ့ကြောင်း သိရသည်။
အကြမ်းဖက် စစ်တပ်၏ ဗုံးကျဲ တိုက်ခိုက်မှု ပြည်သူများ ထိခိုက်မှုမရှိသော်လည်း လေကြောင်း တိုက်ခိုက်မှုများ ဆက်လက် ပြုလုပ်လာမည်ကို စိုးရိမ်သောကြောင့် ပြည်သူများ ဘေးလွတ်ရာထွက်ပြေး တိမ်းရှောင်နေရကြောင်း သိရှိရသည်။
“ပြည်သူတွေ ထိခိုက်မှုမရှိဘူးလို့တော့ သိရတယ်။ စစ်ခွေးတွေ လေကြောင်း တိုက်ခိုက်တာတွေ ဆက်လက် လုပ်ဆောင်မှာကို စိုးရိမ်လို့ ပြည်သူတွေ ဘေးလွတ်ရာ ထွက်ပြေး တိမ်းရှောင်နေရတယ်” ဟု အညာမြေတပ်ပေါင်းစုမှ တာဝန်ရှိသူ တစ်ဦးက ပြောဆိုသည်။
အလားတူ ရှမ်းပြည်နယ်၊ ကျောက်မဲမြို့နယ်၊ နောင်ပစ်ရွာကိုလည်း အကြမ်းဖက် စစ်တပ်က လက်နက်ကြီးများဖြင့် ဆက်တိုက် ပစ်ခတ် တိုက်ခိုက်နေကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။
ယနေ့ ဩဂုတ်လ ၃၁ ရက်နေ့ ည ၇ နာရီ ၂၀ မိနစ်ခန့်က စတင်ပြီး နောင်ချိုမြို့ပေါ်တွင် တပ်စွဲထားသော အကြမ်းဖက် စစ်တပ်က ကျောက်မဲမြို့နယ်၊ နောင်ပစ်ရွာဘက်ကို လက်နက်ကြီးများဖြင့် ဆက်တိုက် ပစ်ခတ် တိုက်ခိုက်နေခြင်းဖြစ်ကြောင်း သိရသည်။
“နောင်ချိုမြို့ပေါ်ကနေကို ဆက်တိုက် လက်နက်ကြီးတွေနဲ့ ပစ်တာပါ။ နောက်ပစ်ရွာဘက်ကို စစ်ခွေးတွေ ထိုးစစ်ဆင်ပြီး တိုက်ခိုက်နေတာထင်တယ်။ လက်နက်ကြီးပေါက်ကွဲသံတွေကတော့ ဆူညံနေတာပဲ” ဟု ဒေသပြည်သူတစ်ဦးကပြောဆိုသည်။
